इटहरीमा वीपी साहित्य सन्ध्या

इटहरी । सुनसरीको इटहरीमा वीपी साहित्य सन्ध्या कार्यक्रम आयोजना गरिएको छ । नेपाली कांग्रेस सुनसरी क्षेत्र नम्बर २, प्रदेशसभा (क) द्वारा आयोजित कार्यक्रममा विभिन्न सर्जकहरुको सहभागिता थियो । कार्यक्रमको पहिलो चरणमा पाँचजना कविले आफ्ना कविता वाचन गरेका थिए । कविहरू सुदीप पाख्रीन, टीका आत्रेय, प्रज्वल पराजुली, सविता गौतम दाहाल र रमेश सायनले दुई–दुईवटा कविता वाचन गरेका थिए । दोस्रो चरणमा साहित्यमा वीपी कार्यक्रमको आयोजना गरिएको थियो । डा. रामजी तिमल्सिना वक्ता रहेको कार्यक्रमको सहजीकरण मन्दीप भट्टराईले गरेका थिए । तिमल्सिनाले कांग्रेसीहरूले वीपी बुझ्न पहिला उनलाई साहित्यकारका रूपमा पढ्नुपर्ने बताए । वीपीको समाजवादी चिन्तन र साहित्य बुझाउनुपरे आफू तयार रहेको उनले उल्लेख गरे । कार्यक्रमको तेस्रो चरणमा ‘स्ल्याम पोयट्री’ शृङ्खला थियो । कवि युवराज काफ्लेले सहजीकरण गरेको कार्यक्रममा कविहरू शकुन्तला मञ्जरी, किरण चौलागाईँ र योगेन्द्र पराजुलीले प्रस्तुति दिएका थिए । कार्यक्रमका प्रमुख अतिथि नेपाली कांग्रेसका केन्द्रीय सदस्य तथा नेविसंघका निवर्तमान अध्यक्ष राजीव ढुंगानाले वीपीले नेपाली साहित्यमा पुर्याएको योगदान जीवन्त रहने बताए । नेपाली कांग्रेस सुनसरी क्षेत्र नम्बर २ (क) का सभापति सुवेक्छु देवान राईले यो कार्यक्रम नितान्त साहित्यसँग सम्बन्धित रहेको बताए । उनले वीपी कोइरालाको एक सय १० औँ जन्मजयन्तीको अवसर पारेर वीपी सप्ताह कार्यक्रम मनाइरहेको बताए । कार्यक्रमको समापनका क्रममा थारु सांस्कृतिक नृत्य प्रस्तुत गरिएको थियो । यसैगरी ११ औँ बीपी जयन्तीमा सम्झनास्वरूप ११० वटा मैनबत्ती प्रज्ज्वलन गरिएको थियो ।