राष्ट्रपति पौडेलद्धारा राष्ट्रिय कविता महोत्सवका उत्कृष्ट १० कविलाई पुरस्कार

काठमाडौं । राष्ट्रपति रामचन्द्र पौडेलले राष्ट्रिय ‘राष्ट्रिय कविता महोत्सव २०८०’ का उत्कृष्ट १० जना कविहरूलाई बिहिवार पुरस्कार प्रदान गरेका छन् । नेपाल प्रज्ञा प्रतिष्ठानको ६६ औँ वार्षिकोत्सवका उपलक्ष्यमा सम्पन्न भएको कविता महोत्सवका उत्कृष्ट कविहरूलाई राष्ट्रपति पौडेलले राष्ट्रपति भवन शीतल निवासमा आयोजित कार्यक्रममा पुरस्कार प्रदान गरेका हुन् । पुरस्कृत हुने कविहरूमा काठमाडौंका मेश पुन (छोरी, सिमाना र देश शीर्षकको कविता), कृपा करुणा पोखरेल (रक्तिम कथा) सुनसरी, खिमानन्द जोशी (ईजा ! मुई गोठ नाइँझान्याहुँ) दार्चुला, जीवनआरोही (प्रश्नहरुको विज्ञप्ति) उदयपुर, टङ्कबहादुर झाँक्री मगर (हुन्के बे बड्डा) रोल्पा, तीर्थराज विश्वकर्मा (कविले के सम्झियो ?) सुनसरी, नविनअभिलाषी (भेरीः अभिशप्त बगिरहेछ) दाङ, पूर्णानन्द ओझा (सन्निको मान्स) डोटी, प्रकाश दिप्साली राई (नौरानको नाम) सुनसरी र राधिका कल्पित ( परिचयपत्र) काठमाडौं छन् । कार्यक्रममा संस्कृति, पर्यटन तथा नागरिक उड्डयनमन्त्री सुदन किराँतीले साहित्यको विकासमा सरकारले सदैव सहयोग गर्ने धारणा राखे । स्रष्टाहरूले नेपाली समाजको सुक्ष्म अवलोकन, अध्ययन र अनुसन्धान गरेर मौलिक रचना सृजना गर्नुपर्नेमा जोड दिदै आफ्नो मौलिक रचना विश्व साहित्यमाझ प्रस्तुत गर्नुपर्नेमा उनले जोड दिए ।