कृषि क्षेत्रका समस्या र चुनौतिहरुका विषयमा छलफल गर्दै सम्पन्न भयो प्रादेशिक कृषि प्राविधिक कार्यसमूह बैठक

प्रादेशिक कृषि प्राविधिक कार्यसमूह बैठक मंगलवार तरहरामा सम्पन्न भएको छ । कृषि अनुसन्धान निर्देशनालय तरहरामा आयोजित कार्यक्रममा कृषि क्षेत्रमा देखिएका समस्या,प्रदेश १ का कृषकहरुमा आइपर्ने विविध समस्याहरु, कृषि क्षेत्रका चुनौतिहरु लगायतका विषयमा कृषि क्षेत्रका बिज्ञहरुले आ आफ्नो धारणा प्रस्तुत गरेका थिए । कार्यक्रममा नेपाल कृषि अनुसन्धान परिषदबाट विकसित नयाँ प्रविधिहरु,वाहिय अनुसन्धानस्थलबाट संकलित कृषकका समस्याहरु साथै प्रविधि हस्तान्तरणमा निर्देशनालयको भुमिका विषयमा कृषि अनुसन्धान निर्देशनालय,प्रदेश १ तरहराका निर्देशक केशव प्रसाद श्रेष्ठले आफ्नो धारण प्रस्तुत गरेका थिए । निर्देशक श्रेष्ठले कृषि क्षेत्रमा दक्ष जनशक्तिको अभाव भएको उल्लेख गर्दै अनुदानका समस्याहरुलाई कृषकसम्म पुर्याउन चुनौति रहेको उल्लेख गरे । कार्यक्रममा बोल्दै राष्ट्रिय पशु बिज्ञान अनुसन्धान प्रतिष्ठान, खुमलटार काठमाण्डौका प्रमुख डा स्वयम प्रकाश श्रेष्ठले पशुपन्छीका सम्बन्धमा नेपालको कानुन नै सच्याउनु पर्ने धारणा राखे । नेपालको कानुन अनुसार गाइ मार्न हुदैन भन्ने उल्लेख गरिएको प्रसंगमा श्रेष्ठले यदी गाइहरुमा मान्छे समेतलाई सर्ने खालको प्राणघातक रोग देखा पर्न गए त्यस्तो अवस्थामा के गर्न सकिन्छ ? भन्दै प्रस्न गरेका थिए । श्रेष्ठले गाइको मासु खान हुदैन भन्ने नेपालको कानुनमा उल्लेख गरेको भन्दै हिमाली क्षेत्रमा चौरीको मासु अत्याधिक प्रयोगमा आउने उल्लेख गरे । चौरी गाइ हो की हैन ? हो भने चौरी गाइको मासु खान कस्ले अनुमति दिन्छ ? कि त चौरीलाई गाइ हैन भन्नुपर्यो हैन भने नेपालको उक्त कानुन परिमार्जन गर्नुपर्यो, प्रमुख डा श्रेष्ठको धारणा थियो । कृषि विकास निर्देशनालय,प्रदेश १ बिराटनगरका निर्देशक प्रकाश कुमार डाँगीले प्रदेशस्तरका कृषकहरुको कृषि,अनुसन्धान मुलक साथै प्रसार गर्नुपर्ने मुख्य मुख्य समस्याहरु र कृषि प्रविधि प्रसारमा निर्देशनालयको भुमिकाका विषयमा आफ्नो धारणा प्रस्तुत गरेका थिए । उनले नेपालकै रैथाने बालीहरुमा प्रविधिको विकास गर्नुपर्ने धारणा राखे । कृषि क्षेत्रमा नयाँनयाँ प्रविधिहरु भित्रिरहेको उल्लेख गर्दै डाँगीले कम लागतमा राम्रो उत्पान गर्न सक्ने प्रविधिको अनुसन्धान गर्नुपर्ने उल्लेख गरे । कार्यक्रममा बोल्दै प्रदेश १ कृषि मन्त्रालय बिराटनगरका योजना महाशाखा प्रमुख पशुपति पोखरेलले प्रदेशस्तरका कृषकहरुको कृषि र पशुपन्छी अनुसन्धान मुलक तथा प्रसार गर्नुपर्ने मुख्य मुख्य समस्याहरुका विषयमा आफ्नो धारण प्रस्तुत गरेका थिए । महाशाखा प्रमुख पोखरेलले प्रविधि प्रसारमा मन्त्रालयको भुमिकाका विषयमा पनि आफ्नो धारणा व्यक्त गरेका थिए । प्रदेश स्तरमा सञ्चालित प्रधानमन्त्री कृषि आधुनिकिकरण परियोजनाका तर्फबाट प्राप्त अनुसन्धानमुलक सामाग्रीहरुका विषयमा बोल्दै प्रधानमन्त्री कृषि आधुनिकिकरण परियोजना प्रदेश १ बिराटनगरका प्रमुख मनोज यादवले कृषि क्षत्रमा प्रसार गर्नुपर्ने मुख्य मुख्य समस्याहरु साथै कृषि प्रविधि प्रसारमा प्रधानमन्त्री कृषि आधुनिकिकरण परियोजनाको भूमिका विषयकमा आफ्नो धारणा प्रस्तुत गरेका थिए । कृषि क्षेत्रमा बिभिन्न जटिल समस्याहरु आइरहने र त्यसको समाधान गर्न सहज नहुने भएकाले कृषि क्षेत्र कृषकहरुका लागि चुनौति बनिरहेको परियोजना प्रमुख यादवको भनाई थियो । कार्यक्रममा बिभिन्न क्षेत्रलाई प्रतिनिधित्व गरेर उपस्थित व्यक्तित्वहरुले प्रदेश १ मा कृषि क्षेत्रमा देखिएका बिभिन्न चुनौतिहरुका विषयमा आ आफ्नो समस्याहरु प्रस्तुत गरेका थिए भने कार्यक्रमा उपस्थित कृषि बैज्ञानिक तथा विज्ञहरुले कृषकका उक्त समस्याहरुको समाधानका विषयमा आ आफ्नो धारणा प्रस्तुत गरेका थिए ।