उत्कृष्ट विद्यालयमध्ये एक हो– गुरुकुल पाठशाला

मोरङ- उत्तरी मोरङमा रहेर उत्कृष्ट शैक्षिक गतिविधि गरिरहेका संस्थागत विद्यालयमध्ये बेलबारी नगरपालिकाले गरेको संस्थागत विद्यालयको वर्गीकरणमा क ग्रेड मा पर्न सफल एक हो– गुरुकुल पाठशाला ।  २०५६ मा स्थापित भए पनि औपचारिक रूपमा पठन पाठन भने २०७५ सालबाट प्रि–प्राइमरीदेखि कक्षा ६ सम्मको अनुमति लिँदै स्थापना भएको विद्यालयमा सुरुमा १०८ जना विद्यार्थी थिए । २०७९ सालबाट गुरुकुल पाठशालाले एसइईमा सहभागिता जनाउन थालेको हो । यस वर्षको एसइईमा २७ जना विद्यार्थी सहभागी रहेका थिए । हाल विद्यालयमा ७५० विद्यार्थी अध्ययनरत छन् ।bपठनपाठन उत्कृष्ट भएका कारण पनि एसइई परीक्षामा शतप्रतिशत उत्कृष्ट नतिजा आउनेमा विद्यालय आशावादी देखिएको छ । बेलबारी नगरपालिका वडा नम्बर ३ मा रहेको यस विद्यालयमा संस्कार र संस्कृति सहितको पठनपाठन भन्ने भनाइलाई मूल मन्त्र बनाएर शिक्षण सिकाइ क्रियाकलाप गरिँदै आएको छ ।

व्यावहारिक शिक्षालाई विशेष जोड दिने गरेको यस विद्यालयले अतिरिक्त क्रियाकलापमा पनि उत्तिकै ध्यान दिने गरेको छ । बेलवारी नगरपालिकाले प्रथम नागरिकका रूपमा घोषणा गरेको र नगरपालिकाको निर्णयलाई सम्मान गर्दै धिमाल समुदायका विद्यार्थीलाई २५ प्रतिशत छुटमा अध्ययन अध्यापन गराइने व्यवस्था मिलाएको छ ।

यस्तै २ जना एकै घरका विद्यार्थी अध्ययनका लागि आउँदा १ जनालाई २५ प्रतिशत छुट दिने गरिएको छ । छोरालाई बोर्डिङ र छोरीलाई सरकारी विद्यालयमा अध्यापन गराउने परिपाटीको अन्त्य गर्ने उद्देश्यसहित छात्रा छात्रवृत्तिको व्यवस्था गरिएको छ, जसअन्तर्गत २ जना एकै परिवारका छात्राहरूलाई मासिक शुल्कमा ३० प्रतिशत छुटको व्यवस्था गरिएको छ ।