दुई ह्याट्रिकसँगै चर्च ब्वाइज बुढासुब्बा गोल्डकपको फाइनलमा

धरान : धरान रंगशालामा जारी बुढासुब्बा गोल्डकपको पहिलो सेमिफाइनल खेलमा चर्च ब्वाइज युनाइटेड क्लब काठमाडौँले रोयल थिम्पु कलेज भुटानको पोस्टमा दुई ह्याट्रिक गर्दै फाइनलमा प्रवेश गरेको छ । भुटानको रोयल थिम्पु कलेज (आरटिसी) क्लबलाई ७–० को फराकिलो अन्तरमा पराजित गर्दै चर्च ब्वाइज युनाइटेडले २५ औं संस्करणको अन्तराष्ट्रिय आमन्त्रण बुढासुब्बा गोल्डकपको फाइनलमा प्रवेश गरेको हो । चर्च ब्वाइजका लागि खेलको २१ मिनेटमा समीर तामाङले सुरूआती गोल गरे । उनले आबायोमी फाकुन्लेको पासमा गोल गरेका थिए । यसैगरी २७ मिनेटमा चर्च ब्वाइजका लागि अर्मोन्ड बेड्युमले थप १ गोल गरे । लगत्तै २८ मिनेटमा पदम भट्टराईले अर्को गोल गर्दै टिमलाई अग्रता दिलाए । पहिलो हाफमा ३–० गोल अन्तरले अग्रता लिएको चर्च ब्वाइजका लागि खेलको ४९ औँ मिनेटमा रोहन कार्कीको कर्नरमा अर्मोन्ड बेड्युमले थप १ गोल गरे । यसैगरी खेलको ५१ मिनेटमा समीर तामाङको पासमा उनै अर्मोन्ड बेड्युमले थप १ गोल गरे । यससँगै अर्मोन्डले ह्याट्रिक गरेका थिए । खेलको ५५ औँ मिनेटमा समीर तामाङको प्रहार गोलमा परिणत भयो । खेलको ८५ मिनेटमा उनै समीर तामाङले थप १ गोल गरे । यससँगै उनले ह्याट्रिक गरे । सुरूदेखि नै दबाबमा रहेको भुटानले सान्तवना गोलसमेत गर्न नसक्केपछि घर फर्किएको छ । खेलको म्यान अफ दि म्याच समीर तामाङ घोषित हुँदै नगद १० हजार प्राप्त गरे । भुटानले यसअघि सोमबार भुटानले इटहरीको राष्ट्रिय जागृति क्लब (राजा)लाई ४–१ गोल अन्तरले पराजित गर्दै सेमिफाइनलमा स्थान पक्का गरेको थियो । बिहीबारको अन्तिम सेमिफाइनल खेल साविक विजेता न्यूरोड टिम (एनआरटी) र पाहुना टोली युनाइटेड कार्साङ फुटबल क्लब (युकेएफसी) प्रतिस्पर्धा हुनेछ । खेलको विजेता टिमले नगद १० लाख प्राप्त गर्नेछ भने उपविजेता टिमले नगद पाँच लाखमा चित्त बुझाउनेछ ।