इलामको महेन्द्ररत्न क्याम्पसमा शान्तिपूर्ण मतदान, मत परिणाम बिहानसम्म आउने

इलाम : स्वतन्त्र विद्यार्थी युनियन(स्ववियु)को नयाँ नेतृत्वका लागि इलामको महेन्द्ररत्न बहुमुखी क्याम्पसमा भएको निर्वाचन शान्तिपूर्ण रूपमा सम्पन्न भएको छ । एक हजार पाँच सय ७४ मतदातामध्ये नौ सय चार जनाले मतदान गरेको क्याम्पस प्रमुख गंगाराम पौडेलले जानकारी बताए । उनका अनुसार मत गणनाको तयारी भइरहेको छ । नयाँ नेतृत्वका लागि विद्यार्थी सङ्गठनहरू विभिन्न प्यानल बनाएर चुनावी मैदानमा होमिएका छन् । अनेरास्ववियु तथा नेपाल विद्यार्थी संघको संयुक्त प्यानल बनेको छ । उता अनेरास्ववियु(क्रान्तिकारी) सहितको साझा प्यानल पनि बनेको छ । अनेरास्ववियु तथा नेपाल विद्यार्थी संघको संयुक्त प्यानलबाट अध्यक्षको उम्मेदवार विशाल कार्की(अनेरास्ववियु) छन् । कार्की यसअघिको स्ववियु निर्वाचनमा कोषाध्यक्षमा विजयी बनेका थिए । सचिवमा रेखा बेघा (नेविसंघ) र कोषाध्यक्षमा सुनिल शंकर(अनेरास्ववियु) उम्मेदवार छन् । यो प्यानलमा प्रत्यक्ष सदस्यतर्फ विष्णु खतिवडा(अनेरास्ववियु), मंगेश राई(अनेरास्ववियु) विना बस्नेत(अनेरास्ववियु), कुशल राई(नेविसंघ), निशा भट्टराई(नेविसंघ), सुरेन गुरुङ(नेविसंघ) र विप्लव एक्तेन(नेविसंघ) उम्मेदवार छन् । साझा प्यानलबाट अध्यक्षको उम्मेदवार शम्भू राई(अखिल क्रान्तिकारी) छन् । राई यसअघिको निर्वाचनबाट स्ववियु सदस्य निर्वाचित थिए । सचिवको उम्मेदवार सविन चौहान छन् । कोषाध्यक्षमा मनिष गजमेर रहेका छन् । सदस्यहरूमा अनिता लम्जेल, आयुष लिम्बू, दुर्गा तोलाङ्गी रेविका, राजन खतिवडा, राजेश राई, संगीना लिम्बू र सफल लिम्बू उम्मेदवार बनेका छन् । इलामकै फाकफोकथुमको एकतप्पा बहुमुखी क्याम्पस, देउमाईको मङ्गलबारेमा बहुमुखी क्याम्पस र माई नगरपालिकाको गरुवा बहुमुखी क्याम्पसमा यसअघि नै सर्वसम्मत रूपमा स्ववियु नेतृत्व चुनिएको छ । इलामको अन्तिम मत परिणाम बिहानसम्ममा आउने अनुमान गरिएको छ ।