स्ववियू निर्वाचन : सुकुनामा कोषाध्यक्ष बाहेक अखिल गठबन्धनको प्यानल नै निर्वाचित

सुन्दरहरैंचा : मोरङको सुकुना बहुमुखी क्याम्पसको स्ववियु सभापतिमा अखिल गठबन्धनका एलिस ओझा विजयी भएका छन् नेपाल विद्यार्थी संघका उम्मेदवार विजय ओझालाई पराजित गर्दै उनी निर्वाचित भएका हुन् । यस्तै स्ववियू सचिवमा पनि गठबन्धनकै उम्मेदवार रोहन खत्री विजयी हुँदा नेविसंघका उम्मेदवार अर्जुन दाहाल पराजित बन्न पुगेका छन् । कोषाध्यक्षमा भने गठबन्धनका उम्मेदवारलाई पराजित गर्दै नेविसंघकी उम्मेदवार सविना थापा निर्वाचित भएकी छिन् । थापा नेपाल विद्यार्थी संघबाट निर्वाचित हुने एक्ली उम्मेदवार बनेकी छिन् । अन्य आठ सदस्यहरूमा गठबन्धनको प्यानल नै निर्वाचित भएको त्यहाँका निर्वाचन अधिकृत शुकदल लिम्बुले बताए । ‘हामीले समानुपातिकको गणना गरेपछि मात्र औपचारिक घोषणा गर्ने छौँ ।’ लिम्बुले भने । सुकुनामा नेविसंघ विरुद्ध ५ संघठनले गठबन्धन गरेका थिए ।