धरानबाट लागू औषधसहित दुई जना पक्राउ

धरान : धरान उपमहानगरपालिकाबाट प्रहरीले ठूलो मात्रामा प्रतिबन्धित लागू औषधसहित दुई जनालाई पक्राउ गरेको छ। लागू औषधको अवैध कारोबारमा संलग्न रहेको आशंकामा प्रहरीले जनकपुर घर भएका एक दम्पतीलाई धरानको लक्ष्मण मार्गस्थित डेराबाट नियन्त्रणमा लिएको हो।

वडा प्रहरी कार्यालय धरानबाट खटिएको टोलीले गोप्य सूचनाका आधारमा वैशाख २० गते बिहान १ बजे धनुषा, जनकपुरधाम स्थायी ठेगाना भई धरान-१५ मा डेरा गरी बसिरहेका २५ वर्षीय राहुल शाह र उनकी २४ वर्षीया श्रीमती लक्ष्मी राईको कोठामा छापा मारेको थियो।

छापामारीको क्रममा उनीहरूको कोठाबाट लुकाईछिपाई राखिएको अवस्थामा ५ हजार ५० थान ट्रामाडोल क्याप्सुल बरामद गरिएको प्रहरीले जनाएको छ।

बरामद औषधिसहित दम्पतीलाई नियन्त्रणमा लिई इलाका प्रहरी कार्यालय धरानमा राखेर थप अनुसन्धान अघि बढाइएको छ। प्रारम्भिक अनुसन्धानका आधारमा उनीहरू लागू औषधको अवैध कारोबारमा संलग्न रहेको आशंका गरिएको प्रहरीले बताएको छ।

प्रहरीका अनुसार घटनासम्बन्धी लागू औषध नियन्त्रण ऐन अन्तर्गत मुद्दा दर्ता गर्ने तयारी भइरहेको छ। यस घटनाले धरान क्षेत्रमा लागू औषध कारोबार बढ्दो रहेको र स्थानीयस्तरमै प्रहरीले निगरानी कडा बनाएको संकेत मिलेको छ।

यस्ता कारवाहीहरूबाट स्थानीय क्षेत्रमा फैलँदै गएको दुर्व्यसनविरुद्धको अभियानमा केही राहत मिल्ने अपेक्षा गरिएको छ।