नेपालले दैनिक ११३० मेगावाट निर्यात, वार्षिक ८६ अर्ब आम्दानीको सम्भावना

काठमाडौं : नेपालले हालसम्मकै बढी विद्युत् निर्यात गरेर नयाँ इतिहास रचेको छ। ऊर्जा, जलस्रोत तथा सिँचाइ मन्त्री दीपक खड्काका अनुसार भारत र बंगलादेशलाई गरी दैनिक १,१३० मेगावाटभन्दा बढी विद्युत् निर्यात भइरहेको छ।

यो दर निरन्तर कायम रह्यो भने नेपालले वार्षिक करिब ८६ अर्ब ३८ करोड रुपैयाँभन्दा बढी आम्दानी गर्ने अनुमान गरिएको छ। यस अवधिमा करिब ९ अर्ब ९० करोड ६ लाख युनिट विद्युत् बिक्री हुने मन्त्रालयको आकलन छ।

मन्त्री खड्काले विद्युत् निर्यातको यो सफलता ऊर्जा आत्मनिर्भरता, दिगो आर्थिक विकास र क्षेत्रीय ऊर्जा सहकार्यका लागि महत्वपूर्ण मीलपत्थर भएको बताए।

यसैबीच सरकारले पहिलो पटक दीर्घकालीन ऊर्जा मार्गचित्र–२०८१ सार्वजनिक गरेको छ, जसअनुसार २०३५ सम्म कुल २८,५०० मेगावाट विद्युत् उत्पादन गर्ने लक्ष्य राखिएको छ। सो मध्ये १५,००० मेगावाट निर्यात गर्ने योजना छ, जसअन्तर्गत भारतलाई १०,००० मेगावाट र बंगलादेशलाई ५,००० मेगावाट निर्यात गरिनेछ।

“यो ऐतिहासिक यात्रामा साथ दिने सम्पूर्ण संघ–संस्था तथा कर्मचारीहरूलाई धन्यवाद दिन चाहन्छु,” मन्त्री खड्काले भने, “सबै पक्षको एकता, सहकार्य र साझा प्रतिबद्धतामार्फत आगामी दशकभित्र नेपाललाई ऊर्जा उत्पादन र निर्यातमा क्षेत्रीय शक्ति राष्ट्र बनाउने हाम्रो लक्ष्य अवश्य पूरा हुनेछ।”