सुन्दरहरैचामा ‘गोदावरी रिभरसाइड रिसोर्ट’ सञ्चालनमा, दशैं–तिहारमा विशेष छुट योजना

मोरंग : सुन्दरहरैचा–४, दुलारीमा ‘गोदावरी रिभरसाइड रिसोर्ट’ सञ्चालनमा आएको छ। दुलारी चोकबाट २.८ किलोमिटर दक्षिण र इटहरीबाट ६ किलोमिटर दुरीमा रहेको यो रिसोर्ट आधुनिक सुविधा र प्राकृतिक सौन्दर्यको संयोजनसहित सेवा प्रदान गर्न थालेको हो।

यसअघि त्रिवेणी रिसोर्ट नामले परिचित यो रिसोर्टलाई नयाँ व्यवस्थापनसहित ‘गोदावरी रिभरसाइड रिसोर्ट’का रूपमा पुनः सञ्चालनमा ल्याइएको अध्यक्ष रमेश खड्काले जानकारी दिए। उनका अनुसार शान्त र रमणीय वातावरणकै कारण छोटो समयमै रिसोर्ट आगन्तुकहरूको आकर्षण बनेको छ।

रिसोर्टमा दुई सय जनाभन्दा बढी अट्ने एसीसहितको ठूलो हल, विवाह पार्टी, सभा–सम्मेलनका लागि अन्य हलहरू र खुला स्थानमा समेत कार्यक्रम गर्न मिल्ने सुविधा उपलब्ध छन्। पोखरीको बीच भागमा कार्यक्रम गर्ने विशेष व्यवस्था पनि गरिएको छ।

बोटिङ, तालबीचको विश्राम स्थल, डोम तथा ‘नमस्ते’ आकारका इग्लु घर, डिलक्स र प्रिमियम बसाइको सुविधा, इण्डोनेसियाको बालीमा जस्तै अग्लो पिङ, कोलम्बस स्विङ र बालबालिकाका लागि खेल सामग्रीहरू यहाँको आकर्षण मानिन्छ।

सञ्चालक खेम नेपालका अनुसार रिसोर्टबाट धरान, भेडेटार, धनकुटा, इलाम, कन्याम र टिनजुरेसहितका पर्यटकीय क्षेत्र छोटो समयमा पुग्न सकिन्छ। भारतबाट आउने आगन्तुकका लागि पनि यो स्थान रमणीय गन्तव्य बन्ने विश्वास गरिएको छ।

अर्का सञ्चालक रोहित शाहले रिसोर्टलाई पूर्वी नेपालको उत्कृष्ट पर्यावरणमैत्री रिभरसाइड रिसोर्टका रूपमा विकास गर्ने लक्ष्य रहेको बताए।

दशैं–तिहारको अवसरमा रिसोर्टले विशेष छुट योजना घोषणा गरेको छ। भदौ १५ देखि कार्तिक ३० गतेसम्म लागू हुने योजनाअनुसार १० जनाभन्दा बढीको समूहलाई प्रवेश शुल्कमा २५ प्रतिशत छुट दिइनेछ। बोटिङ, खानाको मेनु र आवासमा पनि छुटको व्यवस्था गरिएको छ।

यस्तै बिहानको समयमा मर्निङ वाक गर्नेहरूलाई पोखरी वरिपरि निःशुल्क प्रवेश कार्ड उपलब्ध गराइने भएको छ।