जेनजी आन्दोलन : प्रहरी कार्यालय अनारमनी आक्रमण प्रकरणमा संलग्न ८ जना कारागार चलान

झापा : जेनजी आन्दोलनका क्रममा इलाका प्रहरी कार्यालय (इप्रका) अनारमनीमा गरिएको तोडफोड र आगजनी प्रकरणमा संलग्न ८ जनालाई कारागार चलान गरिएको छ।

अदालतले चारजनालाई पुर्पक्षका लागि थुनामा राख्ने आदेश दिएको थियो भने धरौटी रकम बुझाउन नसकेकाले थप चारजनालाई पनि जेल पठाइएको हो।

झापा जिल्ला अदालतमा भएको थुनछेक बहसपछि आपराधिक उपद्रव, थुनुवा भगाउने तथा हातहतियारसम्बन्धी मुद्दामा पाँच प्रतिवादीमाथि आदेश जारी भएको न्यायालयका सूचना अधिकारी रामचन्द्र बस्नेतले जानकारी दिए।

अदालतले सुनसरी हरिनगर–१ का २२ वर्षीय शाहिद हुसेन अन्सारी, बिर्तामोड–५ का ४५ वर्षीय नवराज राई र बिर्तामोड–३ का २१ वर्षीय बादल राजवंशीलाई पुर्पक्षका लागि थुनामा राख्ने आदेश दिएको छ। त्यस्तै, बिर्तामोड–५ की २४ वर्षीय पूजा मगर र अर्जुनधारा–७ का २८ वर्षीय सुरज राईलाई जनही ७५ हजार धरौटीमा छोड्ने आदेश भए पनि रकम बुझाउन नसकेकाले उनीहरू समेत कारागार चलान भएका छन्।

यसअघि बिर्तामोड–५ का २० वर्षीय राजन चौधरी, १६ वर्षीय आयुष धिमाल र बिर्तामोड–६ का २४ वर्षीय अनीश मण्डललाई पनि जेल पठाइएको थियो। पक्राउ परेकामध्ये नवराज राईमाथि तेहोरो र अनीश मण्डल, शाहिद हुसेन अन्सारी, पूजा मगर तथा सुरज राईमाथि दोहोरो अभियोग दर्ता भएको इप्रका अनारमनीका प्रहरी नायव उपरीक्षक विजय श्रेष्ठले जानकारी दिए।

जेनजी आन्दोलनकै क्रममा इप्रका दमकमा आक्रमण गर्ने १३ जनालाई पनि अदालतको आदेशअनुसार पुर्पक्षका लागि कारागार चलान भइसकेको छ। तीन दिनअघि जारी आदेशअनुसार विभिन्न मितिमा पक्राउ परेकामध्ये पाँचथर, इलाम र झापाका १० भन्दा बढी व्यक्ति जेल पठाइएका थिए।

तीसमध्ये पाँचथर मिक्लाजुङ–५ का २१ वर्षीय साजन लुहागुन, इलाम चुलाचुली–३ का २२ वर्षीय नकुल अधिकारी, दमक–७ का २४ वर्षीय लोमस कटुवाल, गौरव भुजेल, सुशील फियाक, शिव मल्लिक, इलामका दर्शन लिम्बू, गौरादहका सुन्दर गिरी, गौरीगञ्ज–३ का रमेश पासवान र उनका १९ वर्षीय छोरा सोनु पासवान पुर्पक्षका लागि थुनामा परेका छन्।

गत कात्तिक २७ गतेको आदेशअनुसार इलामका सुजल राई, दमक–९ का अरुण रोका र गणेश शर्मा पनि जेल चलान भइसकेका छन्। दमक क्षेत्रका चार नाबालकलाई अभिभावकको जिम्मामा राखिएको छ। त्यस्तै, दमक–९ का ३४ वर्षीय सन्तबहादुर मोते र दमक–८ का ३६ वर्षीय उमेश थापालाई जनही १ लाख ५० हजार धरौटीमा रिहा गरिएको छ भने दमक–३ का २१ वर्षीय केदार बस्नेतले ३० हजार धरौटी बुझाएर छुटेका छन्।

जिल्लाभर जेनजी आन्दोलनका नाममा आक्रमण, तोडफोड र अराजक गतिविधिमा संलग्न भएको आरोपमा ४६ जनालाई पक्राउ गरिएको छ। जिल्ला प्रहरी कार्यालय झापाका सूचना अधिकारी डीएसपी खगेन्द्रबहादुर खड्काका अनुसार २१ जना पुर्पक्षका लागि थुनामा छन्, चार नाबालक अभिभावकको जिम्मामा, तीन जना धरौटीमा रिहा, सात जना हाजिरी जमानीमा छुटेका छन्। बाँकीमाथि अनुसन्धान जारी छ।