पैनी माथी बनेको संरचना भत्काउन इटहरी प्रमुख पौडेलको निर्देशन

इटहरी उपमहानगरपालिकाले मुख्य बजार क्षेत्रमा रहेका अवैध संरचना हटाउन सुरु गरेको छ । मुख्य बजार क्षेत्रमा संगै खोला पैनी मिचेर निर्माण गरिएको अवैध संरचना हटाउन सुरु गरेको हो । इटहरी  प्रमुख हेमकर्ण पौडेल, उप प्रमुख संगीता चौधरी,इन्जिनियरहरूसहितको टोलीले २ वटा निर्माणधीन अवैध संरचना ७ दिनभित्र हटाउन निर्देशन दिएको हो । पैनी मिचेर बनाएका संरचना तत्काल हटाउन निर्देशन दिएको इटहरी  प्रमुख पौडेलले बताए । इटहरी ७ की आशा साह र इटहरी १० का पदम दर्नालले पैनीको जग्गामा घर बनाएको भन्दै स्थलगत निरीक्षण गरी उनीहरूले निर्माण गर्दै गरेको घर तत्काल नबनाउनका लागि निर्देशन दिइएको छ । यस्तै, इटहरीका सुदीप दाहालको पैनीमाथि बनाएको संरचना पनि भत्काइएको छ । उपमहानगरपालिकाले मंगलबार (आज) इटहरीका २० वटै वडामा निर्माण भएको अवैध संरचना हटाउन निर्देशन जारी गरेको छ । वडाहरूलाई दिइएको निर्देशन कडाइको साथ लागू गर्न बताइएको छ । निजी जग्गा बाहेक बाटो पैनी, खोलाको जग्गा नहडप्न र हडपेर बसेकाहरूले तत्काल छोड्न निर्देशन जारी गरिएको प्रमुख पौडेलले बताए । ‘पैनी मिचेर बनाइएका संरचना हटाउनका लागि हामीले सबै वडा कार्यालयमार्फत नगरबासीमा जानकारी पनि गराएका छौँ,’ प्रमुख पौडेलले भने । उपमहानगरको सूचनालाई बेवास्ता गरेको पाइएमा कानूनअनुसार कारबाही अगाडि बढाइने बताइएको छ । खोला–पैनीमा अवैध संरचना बन्दा इटहरीमा सामान्य पानी पर्दा बाढी बस्ती छिर्ने र इटहरीमा जनधनको क्षति हुने गरेको छ ।