एसईईपछि उच्च शिक्षा अध्ययन गर्न लागेका विद्यार्थीलाई परामर्श

इटहरी । एसईई उत्तीर्ण गरी उच्च शिक्षा अध्ययन गर्न लागेका विद्यार्थीहरूलाई इटहरीको आकाश इन्स्टिच्युटले शैक्षिक परामर्श दिएको छ । उच्च शिक्षा अध्ययनका लागि के कस्ता पक्षहरुमा ध्यान दिनुपर्छ भन्ने जस्ता विभिन्न विषयमा विद्यार्थीहरुलाई परामर्श दिइएको थियो । परामर्शपछि बुधबार कार्यक्रम आयोजना गरी विद्यार्थीहरुको विदाई गरिएको छ । कार्यक्रमकी प्रमुख अतिथि सुनसरीकी प्रमुख जिल्ला अधिकारी हुमकला पाण्डेले विद्यार्थीहरूले एसईई उत्तीर्ण भएपछि जुनसुकै विषय र जुनसुकै कलेज पढेपनि आफ्नो लक्ष्या बिर्सन नहुने बताइन् । ‘तपाईँहरू जुनसुकै कलेज पढ्नुहोस्, जे विषय पढ्नुहोस्, तर आफ्नो लक्ष्य नबिर्सनुहोस्,’ पाण्डेले भनिन्, ‘अहिलेका किशोरावस्थाका मानिसहरूमा धैर्य गर्ने बानी कम छ, मानिसले आफ्नो लक्ष्य पूरा गर्नका निम्ति लगनशील भएर धैर्य राख्न सक्नुपर्छ ।’ उनले किशोरावस्थामा छिट्टै पैसा कमाउनुपर्ने, पदमा पुगिहाल्नुपर्ने, अनैतिक सम्बन्ध राख्ने, मादक पदार्थ र लागूपदार्थ सेवन गर्ने जस्ता घटना बढिरहेकाले सचेत हुन आग्रह गरिन् । ‘सुन्दर भविष्य रचना गर्न म को हुँ भन्ने जान्न आवश्यक छ । बोर्डिङले भित्र जस्तो भएपनि बाहिर राम्रो देखाउनुपर्ने अवस्था छ,’ उनले भनिन्, ‘म २३ वर्षकै उमेरमा मास्टर डिग्रीका विद्यार्थीलाई पढाउँथेँ, आफूले आफ्नो लक्ष्यलाई साथै राखेर हिँड्नुपर्छ ।’ आफू एक परिवारको छोरी, श्रीमती, बुहारी र आमा भएपनि आफ्नो काममा कटिबद्ध भएको उनले सुनाइन् । कार्यक्रममा आकाश इन्स्टिच्युटका कार्यकारी संचालक गोपाल निरौलाले शैक्षिक दायरा फराकिलो बनाउन आफूहरूले शैक्षिक परामर्श दिइरहेको बताए । उच्च शिक्षा अध्ययन गर्दा कुन विषय र कुन ठाउँमा अध्ययन गर्ने भन्ने विषयमा परामर्शका क्रममा प्रष्ट पारिएको उनले बताए । ‘हामीले विकट ठाउँबाट आएका, शारीरिक अशक्त विद्यार्थीहरूलाई छात्रवृत्ति प्रदान गरेर अध्यापन गराउँदै आएका छौँ,’ निरौलाले भने, ‘खासगरी हामीले नेपालमै अध्ययन गर्न चाहने वा विदेश गएर उच्च शिक्षा हासिल गर्न चाहने विद्यार्थीलाई पनि अध्ययनमा सहजीकरण गर्दै आएका छौँ ।’ कार्यक्रममा इटहरी उपमहानगरपालिका वडा ६ का वडाध्यक्ष दिवस पोखरेल, हिसान केन्द्रीय सदस्य बलराम पन्त, मुकुन्द घिमिरे, प्रदेश उपाध्यक्ष गणेश दुलाल, प्याब्सन सुनसरी उपाध्यक्ष नेलशल ढकाल, अनन्त सुवेदी, खेमराज बास्तोला, केशव खड्का लगायत शिक्षाकर्मीहरूले मन्तव्य राखेका थिए । उनीहरूले इटहरी शैक्षिक हब बन्दै गएको र इटहरीले जुनसुकै विषय पढाउन पनि सक्षम भएको बताएका थिए । कार्यक्रम इन्स्टिच्युटका कमल तिम्सिनाको अध्यक्षतामा सम्पन्न भएको थियो ।