पूर्वाधार थप्दै पूर्वको अग्रणी तक्षशीला

झापा । बिर्तामोड– ६ स्थित तक्षशीला प्रोग्रेसिभ इङ्लिस स्कूलले सेवा विस्तार गरेको छ । राजधानीबाहिर पहिलोपटक बेलायतको क्याम्ब्रिज विश्वविद्यालयसँग आवद्ध भएको तक्षशीला स्कूलले अन्तर्राष्ट्रिय स्तरको आधुनिक प्रणालीमा पठनपाठन गराउने गरी सेवा विस्तार गरेको हो । विद्यालयले बिहीबारदेखि स्वीमिङ पुल, नयाँ स्मार्ट कक्षा कोठा, लाइब्रेरी लगायतका सुविधा थप गरेको छ । विद्यार्थीहरुलाई स्वीमिङ सिकाउनका लागि विद्यालयले व्यवस्थित स्वीमिङ पुल निर्माण गरेको छ । तीनदेखि पाँच फुट गहिराइ भएको स्वीमिङ पुलमा प्रशिक्षक राखेर पौडिन सिकाउने विद्यालयले जनाएको छ । ८० जनाभन्दा बढी विद्यार्थी अट्ने क्षमता भएको लाइब्रेरी निर्माण गरिएको छ । जहाँ ३ हजारभन्दा बढी पुस्तक राखिएको विद्यालयका एकेडेमिक डाइरेक्टर डा. भिक्टोर इग्नेसियस जोन जोसेफले बताए । त्यस्तै कक्षा १ का विद्यार्थीहरुका लागि तीनवटा स्मार्ट कक्षा कोठा निर्माण गरिएको छ । अन्तर्राष्ट्रिय स्तरको सेवा सुविधा भएको एउटा कक्षा कोठामा २० जनाका दरले अट्ने गरी ३ वटा कक्षा कोठा निर्माण गरिएको जोसेफले बताए । हरेक कक्षा कोठामा अलगअलग थिम अनुसार डेकोरेशन गरिएको उनले बताए । विद्यार्थीहरुलाई जंगल र पानीमुनि बसेको जस्तो अनुभूति गराउने गरी कक्षाकोठा तयार गरिएको उनले जानकारी दिए । नयाँ कक्षा कोठा, स्वीमिङ पुल र लाइब्रेरीको विद्यालयका सञ्चालक दुर्गा प्रसाईले उद्घाटन गरे । उनले काठमाडौं, विराटनगरलगायत जिल्लाबाहिरका विद्यार्थीलाई समेत लक्षित गरी अन्तर्राष्ट्रिय स्तरको विद्यालय सञ्चालन गरेको बताए । उनले भारतको दार्जिलिङभन्दा राम्रो शिक्षा दिने योजना रहेको बताए । अभिभावकहरुको समेत उपस्थिति रहेको कार्यक्रममा कक्षा १ का शिक्षिकाहरु शक्तिकुमारी तामाङ, अनिमा गिरीले विद्यालयमा हुने गरेको पठनपाठनको शैलीबारे जानकारी दिएका थिए । उनीहरुले विद्यार्थीहरु विदाकादिन पनि घरमा बस्न नमानीविद्यालयमै जानखोज्ने गरी आफूहरुले वातावरण बनाएको बताए । कार्यक्रममा विद्यार्थीहरुले आ–आफ्नो प्रतिभा प्रस्तुत गरेका थिए । तक्षशीला प्रोग्रेसिभ इङ्लिस १७ वर्षअघि स्थापना भएको हो । तर, नयाँ व्यवस्थापनमा विगत ६ महिनादेखि सञ्चालनमा रहेको छ । बेलायतको क्याम्ब्रिजसंगै तक्षशीला ब्रिटिश काउन्सिलसंग पनि आवद्ध भएको छ । आफू ब्रिटिश काउन्सिलको एम्बासेडर भएको एकेडेमिक डाइरेक्टर डा. जोसेफले बताए । त्यस्तै सो विद्यालय भारत आन्ध्र प्रदेशको एस. आर. एम. युनिभर्सिटीसँग पनि आवद्ध भएको छ भने स्वीडेनको लिटल आइन्सटाइनसँग आवद्धता जनाएको तक्षशीलाले आगामी सरस्वती पूजादेखि मन्टेश्वरी कक्षा सञ्चालन गर्ने भएको छ । तक्षशीलाले क्लिनिक, विज्ञान प्रयोगशाला, सुविधासम्पन्न मल्टिपर्पोज हल पनि निर्माण गर्न लागेको जनाएको छ । तक्षशीलामा अध्ययनरत विद्यार्थीहरुका लागि बीएण्डसी हस्पिटलमा उपचार गराउँदा २० प्रतिशत छुट गराउने सहमति भएको डा.जोसेफले जानकारी दिए ।