मोडर्न स्कुलमा निःशुल्क आँखा परीक्षण शिविर

इटहरी । सुनसरीको इटहरी ६ स्थित मोडर्न प्रिपेरेटोरी सेकेण्डरी स्कूलमा निःशुल्क आँखा जाँच शिविर आयोजना गरिएको छ । शिविरमा तीन सयभन्दा बढीले आँखा जाँच गराएका थिए । विद्यालय प्राङ्गणमा विद्यार्थी, अभिभावक, शिक्षक तथा समुदायबाट आएका मानिसहरूको बुधबार आँखा जाँच गरिएको हो । विराटनगर आँखा अस्पतालसँगको सहकार्यका विद्यालयले शिविर आयोजना गरेको थियो । विद्यालयका सहप्रधानाध्यापक रमेश निरौलाले पछिल्लो समय आँखा पाक्ने बिरामीको संख्या बढेको भन्दै विद्यार्थी, अभिभावक, शिक्षकसहित समुदायलाई निःशुल्क शिविर गरिएको बताए । विद्यार्थीमा आँखा पाक्ने समस्या हुँदा अध्ययन, अध्यापनमा समस्या हुने भएकाले बेलैमा उपचार गर्न प्रेरित गर्ने उद्देश्यले शिविर आयोजना गरिएको उनको भनाइ छ । ‘दोस्रो चरणमा आइतबार शिविर आयोजना हुने विद्यालयले जनाएको छ । आँखा जाँचमा आएकाहरुलाई औषधि पनि उपलब्ध गराइएको थियो । विराटनगर आँखा अस्पतालका आँखा स्वास्थ्य कार्यकर्ता मनिषकुमार खवासले खासगरी दूषित वातावरणका कारण पछिल्लो समय आँखाका बिरामी बढेको बताए । आँखाका बिरामी भएको अवस्थामा चिसो पानीले सफा राख्ने, अरु मानिसभन्दा केही परै बस्ने, आफूले प्रयोग गरेका कपडा, रुमाल अरुलाई प्रयोग गर्न नदिने सुझाव दिए । शिविरमा आएका बिरामीहरूले चस्मा लगाउनुपर्ने अवस्था रहेमा एक हजार दुई सय बराबर निःशुल्क हुने, मोतियाबिन्दुको अप्रेसन गर्नुपर्ने अवस्थामा लेन्स, औषधि, ल्याब टेस्ट लगायत छुट हुने, छड्के आँखाको अप्रेसन गर्नुपनरेमा १२ हजारसम्मको छुट वा उपचार हुने खवासले बताए ।