एस्पायर कलेज विराटनगरका विद्यार्थी ४ जीपीएसहित उत्तीर्ण

  विराटनगर । विराटनगर महानगरपालिका १४ स्थित एस्पायर कलेजमा सञ्चालित ब्याचलर इन टेक्निकल एजुकेशन आइटीमा अध्यनरत विद्यार्थीहरुले ४ जीपीएसहित शतप्रतिशत नतिजा ल्याएका छन् । असारमा काठमाडौ विश्वविद्यालयबाट सञ्चालित प्रथम वर्ष प्रथम सेमेस्टरको परीक्षाको नतिजामा विद्यार्थीहरुले यो सफलता प्राप्त गर्न गरेका हुन् । विद्यार्थीहरु तुसार गणेश, कृतिज्ञा कटवाल, सुशान्त नेपाल, दीक्षा राई र गौरव दाहालले ४ जीपीए प्राप्त गर्न सफल भएका हुन् । यस्तै, अन्य ८ जना विद्यार्थीले ३.९ भन्दा बढी जीपीए ल्याएको र बाँकी विद्यार्थीहरुले ३.२४ भन्दा माथि जीपीए ल्याएर उत्तीर्ण भएको जनाइएको छ । उत्कृष्ट अङ्कसहित उत्तीर्ण तुसार गणेशले कलेज प्रशासनको समेत महत्वपूर्ण योगदानका कारण आफूहरु सफल हुन सकेको बताए । त्यस्तै, कृतिज्ञा कटवालले विद्यार्थीमैत्री सिकाइ वातावरण भएका कारण छोटो समयमै आफूहरुमा अध्य्यनप्रति रुचि जागेको र कक्षाका सबै विद्यार्थीहरु उच्च जीपीएका साथ उत्तीर्ण हुन सफल भएको बताइन् । कलेजका कोअर्डिनेटर इन्जिनियर खेमनाथ खतिवडाका अनुसार काठमाडौ विश्वविद्यालयको उत्कृष्ट शिक्षण विधि तथा विद्यार्थीहरुको सामूहिक तथा व्यक्तिगत मेहेनतका कारण ठूलो सफलता हात लागेको हो । सूचना प्रविधि विषयप्रति विद्यार्थीहरुको उच्च लगावले गर्दा नतिजामा प्रभाव परेको उनको भनाइ छ । कलेजका प्रधानाध्यापक चिन्तामणि बस्नेतका अनुसार कलेजले गर्ने हरेक गतिविधिलाई प्रयोगात्मक कार्यमा बढी फोकस गरिएको छ । विद्यार्थीको सिकाइका लागि आवश्यक भौतिक पूर्वाधारमा विशेष ध्यान दिइएको उनले बताए । काठमाडौ विश्वविद्यालयबाट समय समयमा आउने प्राध्यापकहरुको मार्गदर्शन पनि सफलताको कडीका रुपमा रहेको उनको भनाइ छ । काठमाडौ विश्वविद्यालयको साझेदारीमा सञ्चालित एस्पायर कलेजमा होटल म्यानेजमेन्ट र ब्याचलर इन टेक्निकल एजुकेशन आइटीमा यस वर्षका लागि समेत भर्ना प्रक्रिया सुरु गरिएको र उत्कृष्ट सिकाइ उपलब्धि हासिल गर्नका लागि विद्यार्थीहरु भर्ना प्रक्रियामा सामेल हुन सक्ने क्याम्पस प्रशासनले जानकारी दिएको छ ।