धरानकै जेठो विद्यालय पब्लिक हाइ स्कुलको ७८ औँ स्थापना दिवस, मुख्यमन्त्री भन्छन् – ‘व्यापारमा लगानी बढाए देश समृद्धि’

धरान : कोशी प्रदेशका मुख्यमन्त्री हिक्मत कार्कीले व्यापारमा लगानी बढाए देश समृद्धिमा जाने बताएका छन् । पब्लिक हाई स्कुल धरानको ७८ औं विद्यालय स्थापना दिवमा सम्बोधन गर्दै उनले देशको आर्थिक अवस्था दिनानुदिन खस्कदोँ अवस्थामा रहेकाले व्यापारमा लगानी बढाएमा देश समृद्धिमा जाने बताएका हुन् । स्कुलले स्थापना कालदेखि नै समाज रूपान्तरण र शैक्षिक जागरणमा खेलेको महत्वपूर्ण भूमिका कोशी प्रदेशका लागि प्रशंसनीय रहेको उनले बताए । २००३ सालमा स्थापना भएको हाइस्कूलले २०२० सालदेखि निरन्तर रूपमा स्मारिका प्रकाशन गर्दै आएको छ । स्मारिकामा समावेश हुने विविध लेख र रचनाले पुराना कुरालाई स्मरण गर्दै नयाँ जागरण ल्याउन थप महत्वपूर्ण भूमिका निर्वाह गर्ने उनको भनाइ छ । कोशी प्रदेशको पुरानो र स्थापित विद्यालय मध्येको एक रहेको पब्लिक स्कुलको पठनपाठन उत्कृष्ट र गुणस्तरीय रहेकोले धरान शैक्षिक हिसाबले उत्कृष्ट नगर रहेको मुख्यमन्त्री कार्कीले बताए । राणा शासनकालमा विद्यालय स्थापना गर्नु भनेको अत्यन्तै चुनौतीपूर्ण रहेको र त्यस्तो परिस्थितिमा वि.सं.२००३ साल साउन २३ गते यस पब्लिक हाइ स्कुलको स्थापना भएको शिक्षक अभिभावक संघका अध्यक्ष राजेन्द्र किरातीले बताए । उनले विद्यालयले प्रकाशित गर्ने स्मारिका ‘पियुष’को निरन्तरताको कामनासेमत गरे । सर्वसाधारण जनताका छोराछोरीले पढ्नसमेत नपाउने अवस्थामा लुकिछिपी पढाउने यस विद्यालयको इतिहास धरानको शैक्षिक विकासमा एउटा कोशेढुङ्गाको रूपमा रहेको किरातीले बताए । तत्कालीन समयमा राजधानी बाहिर स्थापना गरिएको विद्यालयहरूमध्ये धरानकै जेठो विद्यालय रहेको पब्लिक स्कुलका प्रधानाध्यापक डा. इन्द्र मोहन झाले बताए । बालविकासमा बालबालिकाहरूका लागि प्रारम्भिक शिक्षा प्रदान गरी सोझै कक्षा १ मा भर्ना गराउँदा विद्यार्थीको सिकाई क्षमतामा धेरै अन्तर देखिनेसमेत उनले बताए । निजी वा संस्थागत विद्यालयमा कक्षा १ मा भर्ना हुनुभन्दा पहिले प्ले ग्रुप, नर्सरी, एलकेजी, यूकेजीजस्ता ४ ओटा कक्षाको अध्ययन गराइन्छ । ‘त्यसैले तीविद्यार्थीहरूले कक्षा १ अध्ययनका लागि आवश्यक सिकाई उपलब्धी हासिल गरी विद्यार्थीको सिकाई जग राम्रो बस्छ,’ उनले भने, ‘तर सामुदायिक विद्यालयमा थप कक्षा शिक्षणको सुविधा हुँदैन फलस्वरूप विद्यार्थीको सिकाईमा कहिलेकाहीँ समस्या हुनसक्छ ।’ स्कुलले त्यो समस्या निराकरणका लागि बालविकासपछि एलकेजी कक्षा थप गरी बालविकास र कक्षा १ को सिकाई अन्तर कम गरेको उनको भनाइ छ । आजको शिक्षा र शिक्षण विधिमा भएको आधुनिकीकरणले सूचना र प्रविधिलाई प्रमुख महत्व प्रदान गरेको छ । त्यसैले यस विद्यालयमा पनि कम्प्युटर प्रयोगशाला निर्माण गरिएको पनि प्रधानाध्यापक डा.झाले बताए । विद्यालयमा विद्यार्थीको सङ्ख्या तीन हजार भन्दा बढी पुग्नुले पब्लिक हाइ स्कुल सबैको रोजाईको विद्यालय बनेको र सामुदायिक विद्यालयले विद्यार्थीहरूका लागि बस सञ्चालन गर्नुलाई पनि बेग्लै सफलताको रूपमा मूल्याङ्कन गर्न सकिने जानकारहरू बताउँछन् । उक्त कार्यक्रममा १२ कक्षामा उत्कृष्ट जिपिए लिएर पास भएको तीन जना छात्राहरुलाई छात्रवृत्ति प्रदान गरिएको थियो । जसमा ३.७७ जिपिए लिएर समीक्षा पोख्रेल प्रथम, ३.६६ जिपिए लिएर कञ्चन खतिवडा दोस्रो र ३.६ जिपिए लिएर नेहा श्रेष्ठ तेस्रो भएका थिए । उनीहरूलाई क्रमशः नगद रकम ७२ हजार, ६० हजार र १३ हजार रुपैयाँसहित सम्मान पत्रले सम्मान गरिएको थियो । साथै सोही कार्यक्रमको अवसर पारेर विद्यालयका शिक्षक विष्णुप्रसाद खतिवडाको ‘किरिच’ कविता संग्रहको विमोचनसमेत गरियो । कार्यक्रममा कोशी प्रदेशका मुख्यमन्त्री कार्कीसहित सांसद यशोदा कायस्थ, धरान उपमहानगरपालिकाका उपप्रमुख आईन्द्रविक्रम बेघा, धरान १३ का वडाध्यक्ष नेत्र काफ्लेलगायत पब्लिक स्कुलको शिक्षक–शिक्षिकाहरू, विद्यार्थीहरू, अभिभावक तथा शुभचिन्तकहरूको उपस्थिति रहेको थियो ।