'विमल गुरुङ कृति पुरस्कार'का लागि १० कृति सार्वजनिक

धरान ः विमल गुरुङ कृति पुरस्कार २०८०’ का लागि छनोट गरेका १० श्रेष्ठ कृतिहरू सार्वजनिक गरीएको छ । धरान–१८ मा रहेको कवि विमल गुरुङ स्मृति पुस्तकालयले शुक्रवार छनोटमा परेका कृतिहरूको नाम सार्वजनिक गरेको हो । छनोट भएका पुस्तकहरूमा दाजु गुरुङको उपन्यास निरजोया, अभय श्रेष्ठको कविता सङ्ग्रह लहना र तीर, गगन योक्पाङ्देनको कविता सङ्ग्रह केवाफुङ्को गीत, मोमिलाको निबन्ध सङ्ग्रह प्रश्नहरू त बाँकी नै रहन्छन्, जसकुमार राई र अर्जुन उप्रेतीको संयुक्त लेखन रहेको रत्न बान्तवाको जीवनी नेपालमा सुरुङ युद्ध, इन्दु नेपाल योन्जनको कविता सङ्ग्रह अन्तिम सेलो, प्रकाश थाम्सुहाङको निबन्ध सङ्ग्रह शब्दथुम, अखण्ड भण्डारीको उपन्यास बोरा, प्रवीण खालिङको निबन्ध सङ्ग्रह चिया गफ, मन्जुला तामाङ सुब्बाको कविता सङ्ग्रह कुहिरोभित्र घुम जोरबङ्गलो छन् । स्वदेश र विदेशमा नेपाली भाषामा प्रकाशित एक सय १ वटा पुस्तक प्राप्त भएको आयोजकले जनाएको छ । यिनै १० कृतिमध्ये एक कृतिलाई ताम्र पत्र सहित २०८० सालको विमल गुरुङ कृति पुरस्कार प्रदान गरिने पुस्तकालयका अध्यक्ष पूर्णबहादुर गुरुङले बताए । पुरस्कार राशि २ लाख रुपियाँको छ । पुस्तकालयले दुई वर्षअघि देखि विमल गुरुङ कृति पुरस्कार प्रदान गर्दै आएको छ । यसै गरी विगत ३३ वर्षदेखि नियमित आयोजना गर्दै आएको राष्ट्रिय कविता महोत्सवका लागि पनि पुस्तकालयले १० उत्कृष्ट कविता छनोट गरेको छ । महोत्सवका लागि प्राप्त भएका ८१ कवितामध्ये १० कविता छनोट गरिएको आयोजकले जनाएको छ । पुस्तकालयले सार्वजनिक गरेका कविताहरूमा खोटाङका अनाम अपेक्षितको एउटा सडकको समालोचना, सङ्खुवासभाका सिजन श्रेष्ठको तेजबहादुर दर्जी, नवलपरासीका अन्जान प्रदीपको सपना, बेलायतका शान्ति लिम्बूको थेम्स नदीको किनारै किनार, मोरङका समीक्षा छिलिङ राईको फूल र म, इलामका दीपेन्द्र आचार्यको ल्याप्चे, सुनसरीका मिन्जाई राईको बुढो परदेशी, फ्रान्सका प्रशान्त उप्रेतीको विलासी राता बाकस, ताप्लेजुङका लेकाली कान्छा मुक्कुमका रैथाने बगैँचाको अर्ग्यानिक मुस्कान र सुनसरीका दीपा मग्रातीको देशमा मेरो अनुहार छन् । उत्कृष्ट १० मध्ये प्रथमलाई नगद २१ हजार रुपियाँ, दोस्रोलाई १८ हजार रुपियाँ र तेस्रोलाई १७ हजार रुपियाँ र प्रमाणपत्र प्रदान गरिने आयोजकले जनाएको छ । विमल गुरुङ कृति पुरस्कार र कवितामा विजयी उत्कृष्ट तीन जनालाई २०८१ कात्तिक २४ गते पुस्तकालय भवनमा आयोजना हुने कवि विमल गुरुङको ५३ औँ जन्म जयन्ती तथा ३३ औँ राष्ट्रिय कविता महोत्सवमा पुरस्कार प्रदान गरिने अध्यक्ष गुरुङले बताए ।