दुग्ध सहकारीको नौलो प्रयोग, मायाको चिनोमा ‘कुराउनी’ उपहार

सुनसरी । मायाको चिनोमा ‘कुराउनी’ उपहार । तपाईँलाई सुन्दै अनौठो लाग्यो होला । इटहरीमा रहेको एक सहकारी संस्थाले आफ्नो कार्यक्रमका अतिथिहरूलाई मायाको चिनो स्वरुप आफैले उत्पादन गरेको ‘कुराउनी’ (जसलाई खुवापनि भनिन्छ) उपहार स्वरूप वितरण गरेको छ । इटहरीमा रहेको दुग्ध उत्पादक सहकारी संस्थाले ४७ औँ वार्षिक साधारण सभामा आएका सबै अतिथि र शेयर सदस्यहरूलाई कुराउनी उपहार स्वरुपवितरण गरेको हो । संस्थामा ६ सय ६७ जना शेयर सदस्य रहेका छन् । संस्था आफैले सङ्कलन गरेको दूधबाट तयार गरिएको कुराउनीलाई बट्टामा तयार गरी मायाको चिनो स्वरुपवितरण गरेको हो । सामान्यतया औपचारिक कार्यक्रममा बोलाइएका अतिथिलाई सम्झना स्वरूप ‘मायाको चिनो’ उपहार स्वरूप दिइन्छ । मायाको चिनो भन्ने बित्तिकै कुनै फोटो, मूर्ति,काठ तथा फाईबरका तयारी वस्तु दिइन्छ । तर दुग्ध सहकारी संस्थाले आफ्नै उत्पादनलाई मायाको चिनो बनाएको हो । आफ्नै संस्थाको उत्पादनलाई प्रवर्धन गर्न तथा बाहिरी वस्तुको प्रयोगलाई निरुत्साहित गर्न यस किसिमको कार्यलाई सुरुवात गरिएको संस्थाका अध्यक्ष खेम प्रसाद काफ्ले जानकारी दिएका छन् । दुग्ध उत्पादक सहकारी संस्थाले नियमित रूपमा कुराउनी उत्पादन र विक्री गर्दै आएको छ । अन्य संस्थाहरूले पनि खरिद गर्न चाहे आवश्यकता अनुसार खरिद गर्न सकिने संस्थाका व्यवस्थापक ध्रुव प्रसाद कोइरालाले जानकारी दिए । आफ्नै संस्थाका उत्पादित वस्तुको प्रवर्धन गर्नु राम्रो काम भएको उद्योग कृषि तथा सहकारी मन्त्रालयकी डा।दिपा दिवालीले बताइन् । दुग्ध उत्पादक सहकारी संस्थाले राम्रो काम गरेको भन्दै उनले प्रशंसा गरिन् । यस्तै सदस्य केन्द्रित सहकारीहरूले बिग्रँदै गएको सहकारीको इज्जत जोगाइदिएको उनले बताइन् । मन्त्रालयले सहकारीलाई सहयोग गर्ने प्रतिबद्धता पनि व्यक्त गरिन् । संस्थाको ४७औँ साधारण सभामा संस्थाका सबैभन्दा जेष्ठ सदस्यहरु वासुदेव पोख्रेल र हिरा देवी पौडललाई नगद सहित दोसल्ला ओढाइ सम्मान गरिएको छ । संस्थाले वार्षिक साधारण सभाको अवसरमा बर्सभरि नियमित रुपमा दुध ल्याउने ३५ जना किसानलाई पुरस्कृत गरेको छ । यस्तै कारोबार तर्फ उत्कृष्ट कारोबार गर्ने १० जना कृषकलाई सम्मान गरेको छ । यस्तै शेयर सदस्य कृषकका विभिन्न तहमा उत्कृष्ट नतिजा सहित अध्ययनरत सन्तानहरूलाई पनि सम्मान गरेको छ । यस्तै, संस्थाबाट नियमित रूपमा दूध खरिद गर्ने ७ जना उपभोक्ताहरूलाई सम्मान गरेको छ । सहकारी संस्थाले दुग्ध उत्पादक कृषकहरूको सुविधाका विभिन्न सृजनात्मक कार्यक्रम सञ्चालन गर्दै आएको छ । गाई भैँसी सुत्केरी भएमा १ हजार बराबरको प्राथमिक औषधी सेवा निःशुल्क उपलब्ध गराउँदै आएको छ । गएको वर्ष १८ जना किसानले यो सेवा लिएका थिए । संस्थाले नियमित रूपमा भैँसी सुन्दरी प्रतियोगिता आयोजना गर्दै आएको छ । भैँसी पालक कृषकहरूलाई प्रोत्साहन गर्नका लागि प्रतियोगितालाई थप वृहत् रूपमा आयोजना गर्ने योजना रहेको संस्थाका सचिव राजेन्द्र धमलाले जानकारी दिए ।