विराटनगरमा नर्स लक्ष्मी मण्डलको रहस्यमय मृत्युपछि हत्या भएको परिवारको दाबी,निष्पक्ष छानबिनको माग

विराटनगर : सप्तरीको महादेवा गाउँपालिका–२ की २४ वर्षीया लक्ष्मीकुमारी मण्डलको विराटनगरस्थित डेरामा भएको रहस्यमय मृत्युपछि परिवारजनले यो हत्या भएको दाबी गर्दै सत्यतथ्य छानबिनको माग गरेका छन्।

नोबेल अस्पतालमा स्टाफ नर्सको रूपमा कार्यरत लक्ष्मी गत १२ जेठमा अस्पतालनजिकैको डेरामा झुन्डिएको अवस्थामा मृत फेला परेकी थिइन्।

प्रहरीले घटनास्थलमा सिलिङ फ्यानमा गम्छा र साडी प्रयोग गरेर बनाइएको पासो लगाएर आत्महत्या गरेको प्रारम्भिक निष्कर्ष निकालेको भए पनि परिवारजनले उक्त दाबी अस्वीकार गरेका छन्।

मृतकका बाबु हनुमान मण्डलले छोरीलाई पहिले मारी झुन्ड्याइएको आरोप लगाउँदै भने,'घटनास्थलको प्रकृति हेर्दा यो आत्महत्या होइन, हत्या हो।' उनका अनुसार छोरीको कोठामा रहेको ठुलो भेन्टिलेसनबाट कोही छिरेर हत्या गरेर आत्महत्या देखाउने शैलीमा झुन्ड्याइएको हुनसक्ने आशङ्का छ।

मृतकका भाइ लवप्रकाश मण्डलले पनि घटनाको एक घण्टाअघि दिदीले बजारबाट तरकारी किनेको र उनीहरूसँग फोनमा कुरा गरेको स्मरण गर्दै आत्महत्या गर्ने अवस्था नभएको बताए।

उनले भने,'यो सुनियोजित हत्या हो। शरीरमा नीलडाम, खुट्टामा कालोपन देखिएको थियो'। उनका अनुसार लक्ष्मीका साथी रुबी चौधरीको फोनबाट मात्र उनीहरूले घटनाका बारेमा जानकारी पाएका थिए।

परिवारजनले प्रहरीको अनुसन्धानमा बेवास्ता भएको गुनासो गर्दै स्थानीय प्रशासन, मानवअधिकारकर्मी र सञ्चारकर्मीहरूसँग न्यायको लागि सहयोगको माग गरेका छन्।

सप्तरीका प्रहरी उपरीक्षक ढकेन्द्र खतिवडाले घटनास्थल मोरङमा परेको हुँदा मोरङ प्रहरीसँग समन्वय गरी सत्यतथ्य पत्ता लगाउन पहल गर्ने आश्वासन दिएका छन्।

पीडित पक्षले घटनाको निष्पक्ष छानबिन गरी दोषीलाई कडा कारबाही गर्न प्रहरी प्रशासनसँग आग्रह गरेका छन्।