सन्दीप लामिछानेले विराटनगरबाटै एनपिएल खेल्ने

विराटनगर : नेपाल प्रिमियर लिग (एनपीएल) को दोस्रो संस्करणको तयारीमा जुटेको विराटनगर किङ्सले शनिबार आफ्नो रिटेन्सन लिस्ट सार्वजनिक गरेको छ। टिमले मार्की खेलाडी सन्दीप लामिछानेसहित ६ खेलाडीलाई रिटेन गरेको छ। रिटेन गरिएका खेलाडीहरूमा सन्दीप लामिछाने, लोकेश बम, प्रतिश जिसी, बसिर अहमद, नरेन भट्ट र सुवास भण्डारी छन्।

विराटनगरले शनिबार बिहान सामाजिक सञ्जालमार्फत सन्दीपलाई दोस्रो सिजनमा पनि मार्की खेलाडीका रूपमा निरन्तरता दिने घोषणा गरेको थियो। गत सिजनमा विराटनगरको कप्तानी सम्हालेका सन्दीपको टिमले भने अपेक्षित प्रदर्शन गर्न सकेको थिएन। पहिलो सिजनमा ७ खेलमा जम्मा २ जित हासिल गर्दै विराटनगर ८ टिममध्ये सातौं स्थानमा रहेको थियो।

एनपीएलको नियमअनुसार प्रत्येक टिमले मार्की खेलाडीबाहेक ६ जना खेलाडी रिटेन गर्न पाउँछन्। योसँगै एनपीएलका सबै ८ टिमले आ-आफ्नो रिटेन्सन लिस्ट सार्वजनिक गरिसकेका छन्। दोस्रो सिजनका लागि आगामी अगस्टमा मिनी अक्सन हुने तयारी छ, जसले टिमहरूको अन्तिम खेलाडी संरचनालाई थप बलियो बनाउने अपेक्षा गरिएको छ।