पाथीभराबाट फर्किँदै गरेका तीर्थयात्री बोकेको भ्यान झापामा दुर्घटना, ९ जना घाइते

विराटनगर । ताप्लेजुङको प्रशिद्ध धार्मिक स्थल पाथीभरा मन्दिर दर्शन गरेर फर्किका दर्शनार्थी बोकेको भ्यान शुक्रबार बिहानका राति झापामा दुर्घटनाग्रस्त हुँदा नौ जना घाइते भएका छन् ।

मेची राजमार्गअन्तर्गत बुद्धशान्ति गाउँपालिका–३ धर्मकाँटामा प्रदेश १–०१–००१ ज ४०८८ नम्बरको ईभी भ्यान आफैं अनियन्त्रित भई दुर्घटनामा परेको जिल्ला प्रहरी कार्यालय झापाका प्रवक्ता डीएसपी खगेन्द्रबहादुर खड्काले जानकारी दिएका छन् । उनका अनुसार पाथीभरा दर्शन गरेर फर्किएका तीर्थयात्री सवार भ्यान बिर्तामोडतर्फ आउँदै गर्दा दुर्घटना भएको हो । दुर्घटनामा चालकसहित नौ जना यात्रु घाइते भएका छन् ।

घाइतेमध्ये चालक समेत भ्यानका धनी ताप्लेजुङ फुङलिङ नगरपालिका–२ का ३० वर्षीय लाक्पा थेपेन शेर्पा, भक्तपुर चाँगुनारायण नगरपालिका–१ का १२ वर्षीय सेसेहाङ सुवा, १९ वर्षीया सुविमा लिम्बू, ३४ वर्षीय प्रेम यौङहाङ, ३२ वर्षीय टीका लिम्बू, झापाको अर्जुनधारा नगरपालिका–१० का ४४ वर्षीय विजय लिम्बू, ४२ वर्षीया मनकुमारी लिम्बू, दमक नगरपालिका–३ की २१ वर्षीया मनिता धिमाल र ४३ वर्षीया रीता धिमाल रहेका छन् ।

सबै घाइतेको अवस्था सामान्य रहेको र उनीहरूको उपचार बी एन्ड सी अस्पताल, बिर्तामोडमा भइरहेको प्रहरी प्रवक्ता खड्काले बताए । उनले दुर्घटनाको कारण पत्ता लगाउन थप अनुसन्धान भइरहेको जानकारी दिए ।