सुनसान बन्यो काठमाडौँ, पाँच लाख बढी गाउँ फर्किए

काठमाडौँ : हाल काठमाडौँका सडक प्रायः सुनसान छन्। दशैंको आगमनसँगै राजधानी उपत्यकाबाट आ–आफ्नो जन्मस्थानतर्फ जाने क्रम सुरु भएको छ। हिजोआज दैनिक सवारी चापमा करिब ४० देखि ५० प्रतिशतसम्म कमी आएको जनाइएको छ।

उपत्यकामा सञ्चालन हुने सार्वजनिक सवारीसाधनमा यात्रुको भीड कम हुँदै गएको छ। वर्षभरि रोजगारी, अध्ययन, व्यापार तथा अन्य विभिन्न कारणले राजधानीमा रहेकाहरू दशैंका अवसरमा आ–आफ्नो गाउँ फर्किएका छन्। लामो समयपछि परिवारसँग पुनर्मिलनको आशा, आफ्नै गाउँको माटोको सुवास, चाडपर्वको स्वाद र बाल्यकालका सम्झनाले सबैलाई तानेको छ।

सहरी भव्यता र व्यस्त जीवनशैलीबाट केही दिनका लागि टाढा हुँदै गाउँ फर्किने क्रमसँगै राजधानी सुनसान बन्दै गएको छ। ग्रामीण बस्ती भने जीवन्त र रमाइलो हुँदै गएका छन्।

विगतमा निकै सवारी चाप हुने काठमाडौँका मुख्य सडकमा हाल सवारी चाप घटेको र उपत्यकामा दैनिक सवारी चापमा करिब ४० देखि ५० प्रतिशतसम्मको कमी आएको उपत्यका ट्राफिक प्रहरी कार्यालयका प्रमुख एवं प्रहरी वरिष्ठ उपरीक्षक (एसएसपी) नवराज अधिकारीको भनाइले पनि पुष्टि गर्छ।

उनले भने, “दशैंका बेला धेरैजसो मानिस गाउँ फर्किसकेका छन्, त्यसैले सडक विगतमा भन्दा खाली भएका छन्, तर ट्राफिक सुरक्षाको दृष्टिले हामी अझै पनि उच्च सतर्कतामा छौँ।”

गाउँघरमा दशैंको आगमनसँगै वातावरण उल्लासमय बन्न थालेको छ। घर आँगनमा टिका र जमरा छर्ने तयारी भइरहेको र आ–आफ्नो धर्म, परम्परा र संस्कारअनुसार चाडको स्वागत भइरहेका दृश्य तथा तस्बिर सामाजिक सञ्जालमा प्रशस्त मात्रामा देखिन थालेका छन्।

परदेशी मन घर फर्किएसँगै वृद्ध बाबुआमा, दाजुभाइ, दिदीबहिनी तथा नातागोता सबैबिच पुनः भेटको भावनात्मक क्षणहरू साटासाट भइरहेका छन्। दशैंको रमाइलो केबल टीका र मीठा परिकारमा सीमित छैन, यो एक पटक फेरि परिवारसँग बिताउने, पुराना सम्झनालाई जीवन्त बनाउने र समाजमा मेलमिलाप र एकता बढाउने पर्व पनि भएकाले प्रायः परदेशीहरू गाउँ फर्किन्छन्।

दशैंको चहलपहल सुरु भएसँगै सङ्घीय राजधानी काठमाडौँबाट गाउँ फर्किनेको भीड तीव्र रूपमा बढेको थियो। घटस्थापनादेखि मङ्गलवारसम्म आठ दिनको अवधिमा मात्रै पाँच लाख ५३ हजार २६१ जनाले काठमाडौँ उपत्यका छाडेका छन्, काठमाडौँ उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीले जानकारी दिए।