विराटनगरमा बिहे भोजमा खुकुरी प्रहार, एक जना पक्राउ

विराटनगर । विराटनगर महानगरपालिका– १२ मा चलिरहेको बिहे भोजमा शुक्रबार राति एक जनामाथि खुकुरी प्रहार भएको छ ।

निर्माण व्यवसायी सञ्जय यादवका भाइको बिहे भोजमा खुकुरी प्रहार हुँदा विराटनगर – ८  का ३७ वर्षीय नवीन राई घाइते भएका छन् । उपचाररत राईको अवस्था अवस्था खतरामुक्त रहेको प्रहरीले जनाएको छ । 

खुकुरी प्रहार गर्ने व्यक्तिलाई मोरङ प्रहरीले घटना हुनसाथ पक्राउ गरेको छ । खुकुरी प्रहारपछि फरार भएका विराटनगर–८ का राजीव वैद्यलाई ट्राफिक चोकबाट पक्राउ गरिएको मोरङ प्रहरी प्रमुख एसपी कवित कटवालले बताए । पक्राउ परेका वैद्यमाथि ज्यान मार्ने उद्योग मुद्दा दर्ता गर्ने तयारी भइरहेको प्रहरीले जनाएको छ ।