राष्ट्रिय मावि आइडलको उपाधि अस्मिता, शिक्षा र कृजलले जिते

शनिबार, १३ मंसिर २०८२

इटहरी । इटहरी वडा नं. १ मा अवस्थित श्री राष्ट्रिय माध्यमिक विद्यालयले बालबालिकामा रहेको प्रतिभा उजागर गर्ने उद्देश्यसहित पहिलोपटक आयोजना गरेको ‘राष्ट्रिय मावि आइडल’ प्रतियोगितामा नृत्य, गायन र साहित्य तीनै विधामा अस्मिता पराजुली, कृजल रिजाल र शिक्षा भट्टराई उपाधि विजेता बनेका छन्।

विद्यालयले यो वर्षदेखि अतिरिक्त क्रियाकलापअन्तर्गत सुरु गरेको ‘प्रतिभा प्रोत्साहन र अवसरका लागि राष्ट्रिय मावि आइडल’ प्रतिस्पर्धाको फाइनल चरण शुक्रबार सम्पन्न भयो। दर्शकको भोटका आधारमा नृत्य विधामा कक्षा १२ की अस्मिता पराजुलीले पाँच प्रतिस्पर्धीलाई पछि पार्दै उपाधि जितिन्। उनले ट्रफिसहित पाँच हजार रुपैयाँ प्राप्त गरिन्।

नृत्यतर्फ फस्ट रनरअप कक्षा १२ की सिम्रन नेपाली र सेकेन्ड रनरअप कक्षा ९ का विनायक ढकाल बने, जहाँ सिम्रनले तीन हजार र विनायकले दुई हजार रुपैयाँसहित ट्रफि प्राप्त गरे ।

गायनतर्फ कक्षा ६ का कृजल रिजालले पाँच प्रतिस्पर्धीलाई पछि पार्दै शीर्ष स्थान सुरक्षित गरे। कृजलले ट्रफिसहित पाँच हजार रुपैयाँ प्राप्त गरे। यस विधामा कक्षा ९ की वेजिना दाहाल फस्ट रनरअप र कक्षा ११ की सुजाता तामाङ सेकेन्ड रनरअप बने। वेजिनाले तीन हजार र सुजाताले दुई हजार रुपैयाँसहित ट्रफि प्राप्त गरिन्।

साहित्य विधामा कक्षा १० की शिक्षा भट्टराईले छ प्रतिस्पर्धीलाई पछि पार्दै उपाधि हात पारिन्। उनले पनि ट्रफिसहित पाँच हजार रुपैयाँ प्राप्त गरिन्। कक्षा ११ की करुणा खड्का फस्ट रनरअप र कक्षा १२ की इसिका गेलाल सेकेन्ड रनरअप बने। करुणाले तीन हजार र इसिकाले दुई हजार रुपैयाँ पुरस्कार प्राप्त गरे, संयोजक युवराज काफ्लेले जानकारी दिए।

उपाधि विजेतालाई विद्यालय व्यवस्थापन समितिका अध्यक्ष कोविदजंग कार्की र प्रधानाध्यापक सरनकुमार बस्नेतले पुरस्कार प्रदान गरे। कार्यक्रममा इटहरी उपमहानगरपालिकाका प्रमुख प्रशासकीय अधिकृत मीनप्रसाद भट्टराई प्रमुख अतिथि रहेका थिए  । सो अवसरमा इटहरी–१ का वडाध्यक्ष रतनकुमार कार्की, वडा सदस्यहरू, आमा समूह, विद्यालय व्यवस्थापन समिति, अभिभावक तथा स्थानीयको सक्रिय सहभागिता थियो।

प्रधानाध्यापक बस्नेतका अनुसार इटहरी क्षेत्रका सामुदायिक विद्यालयमध्ये पहिलोपटक यस्तो स्तरको आइडल प्रतिस्पर्धा गरिएको हो। यसैबीच विद्यालयको ७० औँ वार्षिकोत्सव आगामी शनिबार मनाइनेछ।

jjknWhatsApp Image 2025-11-29 at 9.51.40 AMWhatsApp Image 2025-11-29 at 9.51.41 AMWhatsApp Image 2025-11-29 at 9.51.44 AM

प्रतिक्रिया

प्रदेश खबर
लेखकको बारेमा
प्रदेश खबर

सम्बन्धित समाचार