मोरङको लेटाङबाट ब्राउन सुगरसहित दुई जना युवा पक्राउ

विराटनगर । मोरङको लेटाङबाट लागुऔषध खैरो हेरोइन (ब्राउन सुगर)सहित शुक्रबार राति दुई जना युवालाई प्रहरीले पक्राउ गरेको छ । पक्राउ परेकाको साथबाट ६ हजार ४ सय रूपैयाँ नगद पनि बरामद भएको छ । 

प्रहरीका अनुसार लेटाङ नगरपालिका–५ खेरुवाबाट २२ वर्षीय सन्दीप धिमाल र ३१ वर्षीय प्रवीन राई पक्राउ परेका हुन् । इलाका प्रहरी कार्यालय लेटाङबाट खटिएको टोलीले राति १०ः३० बजेतिर ना ३ प २६८७ नम्बरको मोटरसाइकललाई नियन्त्रणमा लिएर चेकजाँच गरेको थियो । 

त्यस क्रममा मोटरसाइकलको पछाडि सवार उर्लाबारी नगरपालिका–२ का २२ धिमालको साथबाट २ ग्राम खैरो हेरोइन बरामद भएको प्रहरीले जनाएको छ । त्यसलगत्तै प्रहरीले धिमाल र मोटरसाइकल चालक लेटाङ–५ का राईलाई पक्राउ गरेको हो । 

दुवै जनालाई इलाका प्रहरी कार्यालय लेटाङको हिरासतमा राखेर थप अनुसन्धान अघि बढाइएको प्रहरीले जनाएको छ । दुवै जनाविरुद्ध लागुऔषध ऐनअन्तर्गतको मुद्दा चलाउने तयारी गरिएको जानकारी प्रहरीले दिएको छ ।