सुन्दरहरैँचामा विपन्न परिवारका एक सय विद्यार्थीलाई पहिलो पाइलाको न्यानो कपडा

मोरङ । मोरङको सुन्दरहरैँचा १ स्थित नवजनज्योति आधारभूत विद्यालयमा अध्ययन गर्ने विपन्न परिवारका एक सय विद्यार्थीलाई बुधवार पहिलो पाइला नेपाल सुन्दरहरैँचा शाखाले न्यानो कपडा प्रदान गरेको छ । विद्यालयको ४५ औँ वार्षिकोत्सव तथा अभिभावक दिवसको अवसरमा संस्थाले विद्यार्थीलाई न्यानो माया अभियान अन्तर्गतको स्विटर वितरण गरेको हो । चिसोको मौसममा विपन्न परिवारका विद्यार्थीलाई सहजताका लागि कपडा वितरण गरिएको संस्थाका अध्यक्ष टीकाराम घिमिरेले जानकारी दिए । सुन्दरहरैँचा शाखाले पहिलो पाइला नेपालका हरेक अभियानलाई सफल बनाउन कार्यक्रम सञ्चालन गरिरहेको बताए । पहिलो पाइला नेपालका सामाजिक अभियान अन्तर्गत न्यानो माया अभियान, शिक्षा अभियान, आकस्मिक रक्तदान अभियान, रु १ सङ्कलन अभियान, शीघ्र स्वास्थ्य लाभको कार्ड अभियानका साथै सामाजिक उद्यमशीलता अभियान सञ्चालन गरिरहेको छ । कार्यक्रममा संस्थाले गरेको सहयोगको सम्मान गर्दै विद्यालयका प्रधानाध्यापक महानिधि तिम्सिनाले विद्यालयका साथै विद्यार्थीमा उत्साह पैदा भएको बताए । कार्यक्रममा पहिलो पाइला नेपालका केन्द्रीय सह सचिव मिलन लुइँटेल, सहकोषाध्यक्ष दिवस खतिवडा, केन्द्रीय सदस्य खेमराज सापकोटा लगायत पहिलो पाइला नेपाल सुन्दरहरैचा शाखा र विद्यालयका प्रतिनिधिहरूको सहभागिता रहेको थियो । कार्यक्रमको संयोजन भने शाखा प्रतिनिधि सुप्रीया सिरालले गरेकी थिइन् ।