‘अर्थतन्त्र बलियो बनाउन दलहरू लाग्नुपर्छ’

मोरङ : नेकपा (एमाले) का उपमहासचिव प्रदीप ज्ञवालीले राजनीतिक दलहरू मुलुकको अर्थतन्त्र बलियो बनाउनेतर्फ लाग्नु जरूरी रहेको बताए । 

कृष्णप्रसाद सिग्देल स्मृति प्रतिष्ठानद्वारा आज विराटनगरमा आयोजित १६औँ स्मृतिसभा तथा पुरस्कार वितरण समारोहमा उनले मुलुकको सर्वाङ्गीण विकास समृद्धि गरी जनताको जीवनस्तर उकास्नेतर्फ दलहरूको ध्यान केन्द्रीत हुनुपर्नेमा जोड दिए ।

उनले मुलुक विकासमा पछाडि नरहेको दाबी गर्दै ७७ जिल्लामा सडक, ९७ प्रतिशत विद्युत्, ९७ प्रतिशत खानेपानी र ९९ बालबालिकाको विद्यालय पहुँच रहेको जानकारी दिए । पूर्वमन्त्री ज्ञवालीले मुलुकमा केही भएको छैन भन्ने कुरा गलत भएको भन्दै विकास भएकै कारण आगामी सन् २०२६ मा नेपाल विकसिल देशमा परिणत हुन गइरहेको जानकारी दिए ।

विराटनगर महानगरपालिकाका प्रमुख नागेश कोइरालाले सङ्घीयता स्थापनापछि मुलुकले विकासमा फड्को मारेको चर्चा गरे । प्रतिष्ठानकी अध्यक्ष सीता सिग्देल, सम्मानित उद्यमी चेतन निरौला, एमालेका नेता विनोद ढकाल, नेपाल उद्योग सङ्गठन मोरङका अध्यक्ष नन्दकिशोर राठीले ठूलो सङ्घर्ष गरी सडकबाट व्यापार सुरू गरेका स्व कृष्णप्रसादले स्थापना गरेको ढुवानी व्यवसायमा आज तीन सय जनाले रोजगार प्राप्त गरिरहेकोले उनीबाट सबैले प्रेरणा लिनुपर्ने बताए ।

कार्यक्रममा रु २१ हजार नगदसहित नेपाल पत्रकार महासङ्घ मोरङका पूर्व अध्यक्ष महेन्द्र विष्टलाई सम्मान गरिएको थियो । सो अवसरमा उपमहासचिव ज्ञवालीले नेपाल साना तथा घरेलु उद्योग सङ्घ मोरङका चेतन निरौला, महिला उद्यमी अम्बिता भण्डारी, जनता उच्च मावि मधुवन सुनसरीका विद्यार्थी पिङ्की खत्वे, सुशील खत्वे तथा स्वस्तिका ट्रानसपोर्ट प्रालिका मजदुरीहरूलाई कपडा तथा नगदसहित सम्मान गरेका थिए ।