खोलाले बगाउँदा दिदी बहिनीको मृत्यु

जाजरकोट : जाजरकोटको कुशे गाउँपालिका–७ समाकोटस्थित खुर्पा खोलामा पौडी खेल्ने क्रममा एउटै घरकी दिदीबहिनीको बगेर मृत्यु भएको छ।

धनबहादुर सिंहकी १८ वर्षीया छोरी मिनाकुमारी सिंह र १५ वर्षीया गीताकुमारी सिंह शुक्रवार दिउँसो साढे ४ बजे खोलामा पौडी खेल्दै गर्दा बगेका हुन्।

प्रहरीका अनुसार बहिनी गीताकुमारी बग्न थालेपछि दिदी मिनाकुमारीले बचाउने प्रयास गर्दा दुवैको मृत्यु भएको हो।

घटनापछि प्रहरी र स्थानीयवासीले करिब दुई सय मिटर तल दुबैजनाको शव फेला पारेका थिए। जिल्ला प्रहरी कार्यालयका प्रहरी निरीक्षक हरिराम डाँगीले घटनाबारे जानकारी दिएका छन्।