तरहरामा दुईदिने जुनियर रेडक्रस कन्क्लेभ सम्पन्न

इटहरी : नेपाल रेडक्रस सोसाइटी हाँसपोसा उपशाखाको आयोजनामा सुनसरीको तरहरामा दुईदिने जुनियर रेडक्रस कन्क्लेभ सम्पन्न भएको छ। कन्क्लेभमा २५ वटा विद्यालयका ३२५ जना विद्यार्थी तथा शिक्षकको सहभागिता रहेको थियो।

कन्क्लेभमार्फत प्राथमिक उपचार, विपद् व्यवस्थापन, जीवनरक्षा सीप तथा सिर्जनात्मक गतिविधिसम्बन्धी विभिन्न कार्यक्रम सञ्चालन गरिएका थिए। कार्यक्रमको पहिलो दिन उद्घाटन समारोहसँगै पिस मार्च, रक्तदान, रक्त समूह परीक्षण, विद्यालयस्तरीय प्रदर्शनी, डेन्टल क्याप वितरण, रेडक्रस परिचयसम्बन्धी प्रशिक्षण तथा विपद् व्यवस्थापन तालिम आयोजना गरिएको थियो।

त्यसैगरी, विद्यार्थीमा निहित प्रतिभा उजागर गर्ने उद्देश्यले ट्यालेन्ट हन्ट कार्यक्रमसमेत सम्पन्न भयो। ट्यालेन्ट हन्टमा फुजिसान सगरमाथा बोर्डिङ स्कुलका सुमित विश्वकर्मा प्रथम, तेह्र बालबालिका विद्यालयकी रोशिका खड्का द्वितीय र तरहरा मोडेल एकेडेमीकी समारिका खड्का तृतीय भएका छन्। विश्वकर्माले गीत, खड्काले नृत्य र समारिका खड्काले मन्तव्य प्रस्तुत गरेकी थिइन्। पहिलो दिनको कार्यक्रमको अन्त्यमा बालगायक रिजन डाँगीले सांगीतिक प्रस्तुति दिँदै सहभागीलाई मनोरञ्जन प्रदान गरेका थिए।

उपशाखाका सभापति उमेश राईका अनुसार कन्क्लेभमा सहभागी बालबालिकालाई प्राथमिक उपचारका आधारभूत सिद्धान्त र जीवनरक्षा सीपसम्बन्धी व्यवहारिक ज्ञान प्रदान गरिएको हो। दोस्रो दिन स्थानीय स्थल अवलोकन, डेन्टल स्वास्थ्य सचेतना, सञ्चार तथा नेतृत्व विकास, प्राथमिक उपचारका सिद्धान्त र जीवन सहयोगसम्बन्धी कार्यक्रम सञ्चालन गरिएको थियो।

कार्यक्रममा सुनील तिम्सिना, डा. मेघा केसी, सशस्त्र प्रहरी बल नेपालका प्रतिनिधि, उमेश सुवेदी, राम पाठक र उत्तम पौडेललगायतले आ–आफ्ना विषयमा प्रशिक्षण दिएका थिए।

उपशाखाका सचिव होमनाथ खड्काका अनुसार उपसचिव तथा कार्यक्रम संयोजक सुमन रेग्मीको संयोजनमा आयोजित कन्क्लेभको उद्देश्य विद्यार्थीहरूको सिर्जनशीलता, नवप्रवर्तन, आपतकालीन तयारी, सुरक्षित व्यवहार तथा मानवीय सेवासम्बन्धी आधारभूत सीप विकास गर्नु रहेको छ।