इलाम २ का मतदातासँग मेरो मनमनै गठबन्धन छ, यो नै विजयीको आधार हो - डम्बर खड्का

प्रदेश खबर - मतदातामाझ पुग्दा कस्तो अनुभव रहयो ?

डम्बर खड्का - धन्यवाद, म सधैँ पनि कुनै न कुनै माध्यमबाट सबै तह र स्तरका धेरैजसो जनता माझ जोडिएकै थिएँ । यो सिलसिलाले अरू थप नजिक बनाएको छ । उहाँहरूका आवश्यकता र समस्याबारे थप जानकार भएको छु। यहाँका मतदाता धेरै उत्साही हुनुहुन्छ । आफ्नो क्षेत्रको समुचित विकासका लागि यो पटक म बाट धेरै आशा गर्नुभएको साथसाथै पुर्णरुपमा सहयोग गर्ने बाचा समेत गर्नुभएको छ।

प्रदेश खबर-के छन् गाउँका जनताका समस्या ?

डम्बर खड्का -साह्रै धेरै समस्या विद्यमान छन् । गाउँघरमा बाह्र महिना सहजरुपमा चल्ने सडक सञ्जालको अभावमा कृषिजन्य उत्पादन कम छ । यहाँका जनताले उत्पादित सामग्रीको उचित मूल्य पाएका छैनन् । यो सबैभन्दा ठुलो समस्या हो । जो नागरिकको समृद्धिसँग सोझै जोडिएको विषय हो। आधुनिक कृषि प्रविधिको अभाव छ, प्रभावकारी स्वास्थ्य सेवाको अभाव छ, माटो सुहाउँदो बाली एवम् पाठ्यक्रमको अभाव छ, स्वरोजगार प्रवर्द्धन गर्ने प्राविधिक शिक्षालय छैन, बेरोजगारीका कारण देश बनाउने युवा जनशक्ति दैनिकरुपमा जोखिम पूर्ण वैदेशिक गन्तव्य बनाउन विवश छन् । यता बालबालिका र वृद्ध अवस्थाका बुबा आमालाई सिटामोल ल्याइदिने छोराछोरीको अभाव छ । अन्तिम पटक छोराको अनुहार हेरेर मर्ने बुबा आमाको चाहना समेत अधुरै रहने गरीको सोच्नसम्म नसकिने विडम्बना छ ।

प्रदेश खबर-उनीहरूका समस्या सम्बोधन कसरी गर्नुहुन्छ ?

डम्बर खड्का - बाह्र महिना नै सहजरुपमा चल्ने सडक सञ्जालको विकास गरी निर्वाहमुखी कृषिलाई व्यावसायिक आधुनिक कृषि प्रणालीको विकास गरी उत्पादकत्व वृद्धि गर्दै स्वरोजगार वृद्धि हुँदा धेरै समस्याको समाधान हुन्छ भन्ने मेरो बुझाई छ । र यो मेरो योजना पनि हो । नेतृत्वमा इच्छाशक्ति भए यो सहजै गर्न सक्ने विषय पनि हो । प्राविधिक शिक्षालयको विकास गरी सबैको पहुँचको ज्ञारेन्टी गर्ने, स्थानीय स्तरमै स्वास्थ्य क्षेत्रका दक्ष जनशक्ति उत्पादन गर्ने, स्थानीय कच्चा पदार्थको उपयोग गर्दै घरेलु तथा साना उद्योगको स्थापना गरी हरेक जनताको जीवनस्तर माथि पुर्‍याउनु पर्नेछ ।

प्रदेश खबर - के छन् चुनावी एजेन्डा ?

डम्बर खड्का - चुनावकै लागि मात्र भनेर त मेरा कुनै एजेन्डा छैनन् । उम्मेदवारका लागि त चुनाव एउटा प्रक्रिया हो तर समस्त क्षेत्र र यहाँका जनताका लागि समुचित विकास र समृद्धिका लागि फैसला गर्ने यो एउटा अभूतपूर्व अवसर हो ।

प्रदेश खबर - इलाम क्षेत्र नम्बर दुई विकासमा कति अगाडी छ ?

डम्बर खड्का - नियमित हुने अति सामान्य बाहेक केही पनि भएको छैन । यस क्षेत्रका बहुसङ्ख्यक जनता कष्टकर निर्वाहमुखी जीवनयापन गर्न विवश छन् । यो मैले आरोपका लागि आरोप मात्र लगाएको हैन यहाँका प्रायजसो जनताको बोली हो । यो हामी सबैलाई ऐना जतिकै छर्लङ्ग पनि छ । प्रत्येक जनताको अवस्थामा एक इन्च पनि सकारात्मक परिवर्तन आएन भने नेतृत्व लिनेले जिम्मा लिनु पर्दैन ?

प्रदेश खबर -इलामको अर्को निर्वाचन क्षेत्रसँग तुलना गर्दा ?

डम्बर खड्का - क्षेत्र भन्दा थोरै केही माथि मात्र देख्छु अर्को क्षेत्र पनि ।

प्रदेश खबर -विपक्षी उम्मेदवार गठबन्धन गरेर पनि उठ्नु भएको छ नि ?

डम्बर खड्का - म पनि ७९ सालको चुनाव गठबन्धनबाटै उठेको थिए । तर चुनाव अगाडिको गठबन्धन मतदातालाई धोका रहेछ । पार्टीको नीति, सिद्धान्त, योजना, कार्य योजना कुनै एक पार्टीको अनि कोही एक दुई व्यक्तिको पदका लागि गरिने गठबन्धनका नाममा लहडमा सोझा सीधा जनताले मत दिनुपर्ने रु यो अत्यन्त गलत हो रहेछ पनि । यो कुरा यस क्षेत्रका मतदाताले राम्रोसँग बुझेका छन्। यहाँका मतदाता आफ्नो क्षेत्रको विकास र समृद्धिका लागि निर्णय गर्न आफैँ सचेत, सक्षम र स्वतन्त्र छन् । गठबन्धनलाई ठग बन्धन हो भन्न थालेका छन् । मेरो गठबन्धन यहाँका जनतासँग हो। यहाँका जनतासँग मेरो मनमनै गठबन्धन भइसकेको छ ।

प्रदेश खबर - विकासका कुन क्षेत्रलाई प्राथमिकता दिनुहुन्छ ?

डम्बर खड्का -आधुनिक र व्यावसायिक कृषि प्रणालीको विकास गरी उत्पादकत्व वृद्धि, स्वरोजगारको प्रवर्द्धन, कृषिलाई निर्वाहमुखीबाट समृद्धिको आधार बनाउने, गाउँ गाउँमा बाह्रै महिना सहज सञ्चालन हुने सडक निर्माण, असली कृषकको पहिचान गरी अनुदानको व्यवस्था गर्ने, कृषि बिमा र उपयुक्त मूल्य सहितको बजारको सुनिश्चितता गर्ने । सार्वजनिक सेवा, स्वास्थ्य सेवा र गुणस्तरीय शिक्षामा सबै वर्गको समान पहुँच स्थापना गर्ने नीतिगत र कार्यगत काम गर्ने।

प्रदेश खबर - के छन् त जित्ने आधार ?

डम्बर खड्का -म सँग यस क्षेत्रको दिगो र समुचित विकासको योजना छ । कार्यान्वयन गर्ने गराउने आँट, क्षमता छ र साथमा इच्छा शक्ति पनि छ । भर्खर सार्वजनिक गरेको ‘इलम इलामेली’ अवधारणामा पनि हेर्नुभयो होला । गर्न सकिने, सम्भव हुने र गर्नै पर्ने योजना छन् त्यहाँ । विकास यहाँका मतदाताले मप्रति देखाएको अपार स्नेह, म प्रति गरेको विश्वास मेरो जित्ने पहिलो आधार हो । विगतदेखि बिना आग्रह पूर्वाग्रह मैले गरेको सामाजिक सेवालाई समेत आधार मानेर आफ्नै स्रोत साधन प्रयोग गरेर त केही गर्छ भने थप अवसर पाए यस क्षेत्रको समुचित विकास र समृद्धिका लागि पक्का केही गर्छ भन्ने पूर्ण विश्वास छ उहाँहरूलाई । अर्को पक्ष यो उपनिर्वाचन पार्टीका सम्पूर्ण नेता कार्यकर्ताले आफैँ उम्मेदवार ठान्दै निस्वार्थ निरन्तर खट्नु र हाम्रा योजना जनजनमा पुर्‍याउनु अर्को आधार हो। साथै मेरो यस पटकको गठबन्धन यहाँका जनताका मन मुटु, आशा र भरोसासँग हुनु अर्को आधार हो

प्रदेश खबर - पहिचानको विषयबारे तपाईँको के छ धारणा ?

डम्बर खड्का -यो अत्यन्त संवेदनशील विषय हो । पहिचान बारे विषय उठ्ने बित्तिकै पहिचानको मुद्दामा नेपाली काँग्रेस स्पष्ट छ । पहिचानका विषयमा पार्टीले गम्भीर रूपमा लिएको छ ।

यो साझा मुद्दा हो जब कोसी नामाङ्कन भएपछि पहिचानवादी साथीहरू असन्तुष्टि जनाएर सडकमा आउनुभयो त्यसबेला देखि नै मैले नै नेतृत्व गरेर काँग्रेसको १४ जिल्ला सभापतिहरूलाई एकै ठाउँमा भेला गरेर समयमा नै यसको समाधान खोजिनुपर्छ भनेर सबैको हस्ताक्षर गरेर हाम्रो पार्टी सभापतिसहित कोसी प्रदेशका वर्तमान मुख्यमन्त्री केदार कार्कीलाई समेत ज्ञापन पत्र बुझाएका छौँ । अहिले तीन चरणमा वार्ता भइसकेको छ चाँडै निष्कर्षमा पुग्छ र पुर्याउछौं । हामी र सिङ्गो नेपाली काँग्रेस पार्टी नै पहिचानको मुद्दामा सकारात्मक छ र यसलाई सहज निष्कर्षमा पुर्‍याउने मैले मेरो पहिलो जिम्मेवारी पनि ठानेको छु ।