मोरङमा दुर्घटना,लेटाङ र केराबारीका दुईको मृत्यु

विराटनगर । मोरङमा दुर्घटना हुँदा दुई जनाको मृत्यु भएको छ । एक जना घाइते भएका छन् । मोरङको लेटाङमा अटो ट्याम्पो र केराबारीमा साइकल दुर्घटना भएको हो । प्रहरीका अनुसार लेटाङ नगरपालिका–३ स्थित भित्री सडक खण्डमा को २ ह ३२०८ नम्बरको अटो आफैँ अनियन्त्रित भएर शुक्रवार बिहानका राति २ बजेतिर दुर्घटना हुँदा चालकको मृत्यु भएको छ । अटोमा सवार अर्का व्यक्ति घाइते भएका छन् । मोरङ ट्राफिक प्रमुख प्रहरी निरीक्षक सुमन न्यौपानेका अनुसार लेटाङबाट कानेपोखरीतर्फ आउँदै गरेको अटो दुर्घटना हुँदा चालक कानेपोखरी गाउँपालिका–७ का ४१ वर्षीय ओमनारायण श्रेष्ठको मृत्यु भएको छ । दुर्घटना परेर गम्भीर घाइते भएका श्रेष्ठलाई उपचारका लागि लेटाङ एडभान्स हेल्थ केयर सेन्टरमा भर्ना गरिएको थियो । उपचारकै क्रममा बिहान २ः४० बजेतिर मृत्यु भएको हो । अटोमा सवार कानेपोखरी–७ का ३१ वर्षीय पूर्णबहादुर तामाङ दुर्घटनामा परेर गम्भीर घाइते भएका छन् । तामाङलाई उपचारका लागि विराटनगरको न्युरो अस्पतालमा भर्ना गरिएको छ । प्रहरीका अनुसार अटोको तीव्र गतिका कारण दुर्घटना भएको पाइएको छ । त्यस्तै, केराबारी गाउँपालिका–७ मा साइकल दुर्घटना हुँदा एक किशोरको मृत्यु भएको छ । केराबारी–७ का १७ वर्षीय निर्मल महतोले आफ्नै घरअगाडि कुदाउँदै गर्दा अनियन्त्रित भएर बिहीबार दिउँसो साइकल लडेको थियो । प्रहरीका अनुसार अनियन्त्रित भएर लडेको साइकलको हेण्डिलले महतोको पेटमा लागेको थियो । प्रहरीका अनुसार गम्भीर घाइते भएका उनलाई उपचारका लागि धरानस्थित बिपी कोइराला स्वास्थ्य विज्ञान प्रतिष्ठान लगिएको थियो । उपचारकै क्रममा राति ११ः३० बजेतिर उनको मृत्यु भएको जानकारी प्रहरीले दिएको छ । प्रहरीले दुवै दुर्घटनाको अनुसन्धान अघि बढाएको छ ।