झोराहाट नाट्य समूहको भवनमा ‘कर्तव्य’ नाटक हेर्न दर्शकको भीड

मोरङ : मोरङको झोराहाटस्थित झोराहाट नाट्य समूहको भवनमा मञ्चन भइरहेको कथाकार गुरुप्रसाद मैनालीको ‘कर्तव्य’ नाटक हेर्न दर्शकको भीड लागेको छ । साहित्यकार तथा कलाकार भरत गुरागाईं ‘बर्बरिक’ले निर्देशन गरेको नाटकको ५१ औं शो शनिबार मञ्चन गरिएको छ । झापाको गौरादहमा समेत ३० शो मञ्चन भइसकेको सो नाटक झोराहाटमा भने २१ शो मञ्चन भएको नाट्य समूहका अध्यक्षसमेत रहेका निर्देशक गुरागाईंले जानकारी दिए । भदौ १ देखि १० गतेसम्म मञ्चन गर्ने योजना भए पनि दर्शकको बढ्दो उपस्थितिले अब कहिलेसम्म मञ्चन हुन्छ रु भन्ने टुंगो नभएको उनको भनाइ थियो । सो नाटकमा शनिबार मञ्चन भएको नाटक हेर्न दमक, उर्लाबारी, इटहरी, विराटचोक, इनरुवा, धरान, विराटनगरलगायतका स्थानबाट बाक्लो संख्यामा दर्शकको उपस्थिति रहेको थियो । नाटकमा सुदीपजंग कार्की, निशा ढुंगेल, दीपक निरौला, प्रज्ज्वल भट्टराई, सन्तोष बन्बो तामाङ, लीला खत्री, अभिसा तामाङ, शिखा लिम्बू, देवानन्द राजवंशी, निर्मला गुरागाईं, सुशीला दंगाल, प्रदीप परियार र लक्ष्मी सिग्देलले अभिनय गरेका छन् । कक्षा १० को नेपाली पाठ्यपुस्तकमा राखिएको सो नाटक हेर्न विद्यार्थीको संख्या हरेक दिन बढ्दै गएको गुरागाईंले बताए । विभिन्न विद्यालयहरूले अग्रिम शो बुकिङ गरेर विद्यार्थीलाई नाट्क हेराइरहेको उनको भनाइ छ ।