धरान खेलकुद मञ्चद्धारा एक सय थान पुस्तक प्रदान

धरान : धरान खेलकुद मञ्चद्धारा साकेला पुस्तकालयलाई पुस्तक प्रदान गरिएको छ । धरान १७ स्थित साकेला पार्कमा किरात राई यायोक्खाद्धारा स्थापित साकेला पुस्तकालयलाई धरान खेलकुद मञ्चले एक सय थान पुस्तक साथै पुस्तकालय सञ्चालनका लागि भौतिक सामाग्री जुटाउन नगद १० हजार रुपैंया सहयोग प्रदान गरिएको हो । हस्तान्तरण कार्यक्रमका प्रमुख अतिथि, वरिष्ठ पत्रकार हर्ष सुब्बा, धरान खेलकुद मञ्चका अध्यक्ष किशोर राईसहित पदाधिकारीहरूले किरात राई यायोक्ख्खा सुनसरीका अध्यक्ष राजेन्द्र राईलाई हस्तान्तरण गरेका थिए । जहाँ भाषा हराउँछ त्यहाँ जाति हराउने र जाति नै हराएमा जैविक विविधता नरहने प्रमुख अतिथि हर्ष सुब्बाले बताए । उनले संसारका सबै भाषाभाषीको संरक्षण हुनुपर्नेमा जोड दिए । पछिल्लो समय अध्ययन अध्यापनमा डिजिटल प्रविधिको प्रयोग बढे पनि आदिवासी जनजाति सम्बन्धी नयाँ खोज अनुसन्धानका सामाग्रीलाई आधिकारिक रूपमा डिजिटलाइजेसन गर्न पुस्तकालयको महत्व भने नघटेको सुब्बाले बताए । खेलकुद शारीरिक अभ्यासमा मात्र सीमित नरहेकाले खेल सम्बन्धी अध्ययनको भूमिका पनि महत्वपूर्ण पक्षको रूपमा बढेको बताउँदै पुस्तकालयहरूमा खेलाडीलाई चाहिने पुस्तकहरू पनि उपलब्ध हुन जरूरी रहेको धरान खेलकुद मञ्चका अध्यक्ष किशोर राईले बताए । नेपाली महिला क्रिकेट टिमको सफलताले अब नेपालको खेल अन्तर्राष्ट्रिय स्तरमा पुगेको सन्देश दिएको बताउँदै नेपालमा आयोजना भइरहेको नेपाल प्रिमियर लिग एनपीएल क्रिकेट प्रतियोगिताले नयाँ आयाम थपिएको उनको भनाइ थियो । साकेला पुस्तकालयलाई अत्याधुनिक पुस्तकालयको रूपमा विकास गर्ने योजना रहेको बताउँदै पुस्तकालय, डिजिटल सुविधाहरूको व्यवस्थापन भइरहेको किरात राई यायोख्खा सुनसरीका अध्यक्ष राजेन्द्र राईले बताए ।