विद्यार्थी शिक्षामा प्रविधिको पहुँच : धरानको सैनिक आवासीय महाविद्यालयमा एप्समार्फत अध्ययन सुरु

धरान । विद्यार्थी शिक्षामा प्रविधिको पहुँचलाई विस्तार गर्ने उद्देश्यले धरानस्थित सैनिक आवासीय महाविद्यालयले 'माइ सेकेन्ड टिचर' एप्लिकेशनको प्रयोगमार्फत अध्यापन सुरु गरेको छ। महाविद्यालयमा कक्षा ११ र १२ मा अध्ययनरत विद्यार्थीहरूलाई लक्षित गर्दै आज (सोमबार) एक अभिमुखीकरण तथा अन्तरक्रिया कार्यक्रम सम्पन्न गरिएको हो । जसमा एप्लिकेशनले प्रदान गर्ने विविध शैक्षिक सामग्री र यसको प्रयोग विधिबारे जानकारी दिइएको थियो। कार्यक्रममा महाविद्यालयका प्रिन्सिपल रवीन्द्र थापा, व्यवस्थापकीय अधिकृत प्रमुख सेनानी शान्त कुमार थापा, भाइस प्रिन्सिपल केशव विष्ट, संयोजक रमेश भट्टराई, विभागीय प्रमुखहरू, शिक्षक तथा विद्यार्थीहरूको उल्लेखनीय सहभागिता रहेको थियो। कार्यक्रमको प्राविधिक संयोजन फुर्वा शेर्पाले गरेका थिए । 'माइ सेकेन्ड टिचर' एप्लिकेशनमा विभिन्न विषयगत अध्ययन सामग्री, इन्टरएक्टिभ टूल्स, शिक्षकहरूका लागि श्रोतहरू, सामाजिक सहभागिता तथा अनलाइन कक्षा सञ्चालन जस्ता सुविधाहरू उपलब्ध छन्। डिजिटल माध्यमबाट पठनपाठनको सुरुवातसँगै विद्यार्थीहरूलाई सहज, गुणस्तरीय र प्रेरणादायी शिक्षा दिन सकिने विश्वास महाविद्यालयले लिएको छ। यस प्रविधिमार्फत शिक्षा प्रणालीमा नवीनता ल्याउँदै विद्यार्थीहरूको अध्ययनलाई अझ प्रभावकारी बनाउने लक्ष्य राखिएको छ। प्रविधिको माध्यमबाट सिकाइलाई थप सरल र पहुँचयोग्य बनाउने उद्देश्यले सुरु गरिएको यो प्रयास भविष्यमा अन्य कक्षाहरूमा पनि विस्तार गरिने योजना रहेको महाविद्यालयले जनाएको छ।