सुनसरी प्रहरीद्वारा लागू औषध ब्राउन सुगरसहित सात जना पक्राउ

सुनसरी — भारतबाट नेपालतर्फ लागू औषध ब्राउन सुगर ल्याउँदै गरेको सूचनाका आधारमा सुनसरीमा सात जना पक्राउ परेका छन्।

लागू औषध नियन्त्रण ब्यूरो विराटनगर र इलाका प्रहरी कार्यालय लौकहीबाट खटिएको संयुक्त प्रहरी टोलीले कोशी गाउँपालिका–१ स्थित लौकही भन्सार कार्यालयअगाडि चेकजाँचका क्रममा उनीहरूलाई नियन्त्रणमा लिएको हो। शंकास्पद रूपमा पैदल र स्कुटरमार्फत नेपाल प्रवेश गरिरहेका उनीहरूलाई जाँच गर्दा कुल २२.८१ ग्राम ब्राउन सुगर जस्तो देखिने लागू औषध फेला परेको जिल्ला प्रहरी कार्यालय सुनसरीका प्रवक्ता डीएसपी योगराज खतिवडाले जानकारी दिए।

पक्राउ परेकाहरूमा ईटहरी उपमहानगरपालिका–५ का अजय चौधरी रहेका छन्, जसको साथबाट दुई दशमलव चार सात ग्राम ब्राउन सुगर फेला परेको छ। कोशी गाउँपालिका–१ का हिमाल कुमार मण्डलको साथबाट तीन दशमलव दुई चार ग्राम, कोशी गाउँपालिका–२ का दयानन्द कुमार यादवको साथबाट एक दशमलव चार शून्य ग्राम, धरान उपमहानगरपालिका–१७ का बिवेक बिश्वकर्माको साथबाट दुई दशमलव एक पाँच ग्राम, धरान–१७ का संगम राईको साथबाट दुई दशमलव दुई तीन ग्राम, धरान–१९ का सिमसन राईको साथबाट दुई दशमलव दुई तीन ग्राम, र बराहक्षेत्र नगरपालिका–७ का स्कुटर चालक कौशल कालिकोटेको साथबाट छ दशमलव पाँच तीन ग्राम लागू औषध फेला परेको हो। यस्तै, याकुव राईको साथबाट चार दशमलव सात नौ ग्राम लागू औषध बरामद गरिएको प्रहरीले जनाएको छ।

पक्राउ परेकाहरूको साथमा प्रयोग गरिएको स्कुटरसमेत प्रहरीले नियन्त्रणमा लिएको छ। उनीहरूलाई जिल्ला प्रहरी कार्यालय सुनसरीमा राखी थप अनुसन्धान भइरहेको छ।

प्रहरीका अनुसार लागू औषधको अवैध कारोबार नियन्त्रण गर्न भारत–नेपाल सीमा क्षेत्रमा निगरानी अझ कडा पारिएको छ।