नेपाली काँग्रेसमा नयाँ युग: पुस्तान्तरण र रूपान्तरणको चाहना, युवाले लिनुपर्ने नेतृत्व

सङ्घीय लोकतान्त्रिक गणतन्त्रको रक्षा र संविधानको संरक्षण आजको प्रमुख आवश्यकता हो। यो लक्ष्य पूरा गर्नका लागि अब नेपाली काँग्रेसले समयसापेक्ष निर्णय गर्नुपर्ने बेला आएको छ।

चाहे लोकतान्त्रिक मूल्यको रक्षा गर्न अभियान सञ्चालन होस् वा फागुन २१ गते घोषणा गरिएको प्रतिनिधि सभा निर्वाचनमा गौरवपूर्ण सहभागिता जनाउने तयारी, अब पार्टीले युवापुस्ताको भावना आत्मसात् नगरी अघि बढ्न सक्दैन।

नेपाल डिजिटल युगमा प्रवेश गरिसकेको छ, र यो युगको नेतृत्व गर्ने क्षमता युवापुस्तामा नै निहित छ।

उनीहरू परिवर्तन चाहन्छन्, पारदर्शिता र नवीन सोचका पक्षमा छन्, र संस्थागत सुधारका लागि तयार छन्। त्यसैले, नेपाली काँग्रेसले अब तत्काल नियमित महाधिवेशन सुरु गरेर नयाँ पुस्तालाई नेतृत्वमा ल्याउनुपर्छ।

यदि नियमित महाधिवेशन तत्काल सम्भव छैन भने, अभिलम्ब विशेष महाधिवेशन आह्वान गरी युवातर्फ झुकेको, रूपान्तरणमुखी निर्णय लिन आवश्यक छ।

पार्टीभित्र पुस्तान्तरण र रूपान्तरणका लागि अघिल्लो पुस्ताका नेताहरू—जेनजीरूले विगतमा पार्टीलाई मजबुत बनाएका थिए—लाई सम्मानका साथ सम्झाई बुझाई सहमतिमा ल्याउनु पर्छ।

उनीहरूलाई पार्टीका मार्गदर्शक र सल्लाहकारको भूमिकामा राख्दै, नेतृत्वको जिम्मेवारी अब युवातिर सर्नु नै समयको माग हो।

“अब युवाको नेतृत्वमा मात्रै पार्टीले पुनः जनताको विश्वास जित्न सक्छ।”

नेपाली काँग्रेसका महाधिवेशन प्रतिनिधिहरूले यस विषयमा निर्णायक भूमिका खेल्न सक्छन्। केन्द्रदेखि वडा तहसम्मका प्रतिनिधिहरूले परिवर्तनको पक्षमा हस्ताक्षर अभियान सुरु गरेर, पार्टीमा नयाँ ऊर्जा भर्न सक्नेछन्।

इतिहासमा आफ्नो नाम उत्कीर्ण गर्न अब यही समय हो—जब हामी सबैले सहमति र साहसका साथ परिवर्तनको पक्षमा उभिन सक्छौँ।

यदि अघिल्ला नेताहरू परिवर्तनको यात्रामा सहभागी हुन इच्छुक हुनुहुन्न भने पनि, युवाले विनम्रतापूर्वक तर दृढताका साथ हस्तक्षेप गर्नुपर्छ—पार्टीलाई बचाउन र काँग्रेसलाई पुनः सशक्त बनाउन।

यो सङ्घर्ष व्यक्तिगत आकाङ्क्षाको होइन; यो लोकतान्त्रिक मूल्य, संस्थागत सुधार र देशको भविष्यको लडाइँ हो।

हामी सबै मिलेर अगाडि बढ्न सक्छौँ, यदि पुराना, वर्तमान र नयाँ पुस्ताबिच सहमति र समन्वय कायम रह्यो भने।

अघिल्ला नेताहरूको अनुभव, हाम्रो पुस्ताको जोश र जेन–जेड पुस्ताको नवीन दृष्टिकोण मिल्यो भने कांग्रेस फेरि राष्ट्रिय राजनीति र जनताको विश्वासको केन्द्र बन्न सक्छ।

युवाको नेतृत्वमा मात्रै पार्टी सहज रूपमा आगामी निर्वाचनमा गौरवका साथ जान सक्छ र सफल परिणाम हासिल गर्न सक्छ।

अब समय आएको छ—पार्टीभित्र पुस्तान्तरणलाई अवसरका रूपमा लिनु र नेपाली काँग्रेसलाई भविष्यमुखी बनाउन कदम चाल्ने।

युवाले नेतृत्व सम्हाले भने, वर्तमान नेतृत्वको पनि इज्जत जोगिन्छ, लोकतान्त्रिक गणतन्त्रको पनि सुदृढीकरण हुन्छ, र सम्पूर्ण नेपाली जनताको उज्ज्वल भविष्य सुनिश्चित हुनेछ।

यस अभियानमा सबै कांग्रेस नेतागण, कार्यकर्ता, प्रतिनिधि र सचेत नागरिकहरूलाई एकताबद्ध अपिल गरिन्छ—

“अब नयाँ सोच, नयाँ ऊर्जा र नयाँ नेतृत्वका साथ कांग्रेस उठोस्, जुटोस्, र लोकतन्त्रको रक्षा गरौँ।” जय नेपाल।

( लेखक,बिजय शान्तोषी राई नेपाली कांग्रेस, धनकुटाका जिल्ला सचिव हुन्।)