होस्टलहरु मापदण्ड पूरा गरी चुस्त-दुरुस्त रुपमा सञ्चालन गर्न इटहरी उपमहानगरको निर्देशन

इटहरी । इटहरी उपमहानगरपालिकाले नगर क्षेत्रमा रहेका होस्टलहरुको अनुगमन गरेको छ । एक निजी विद्यालयमा आइतबार राति सुतेकै स्थानमा एकजना विद्यार्थीको मृत्यु भएको घटना बाहिरिएपछि उपमहानगरपालिकाले अनुगमन गरेको हो । इटहरीको सेकेन्डरी माध्यमिक विद्यालयको कक्षा ८ मा अध्ययनरत १४ वर्षीय जेनिस श्रेष्ठको मृत्यु भएपछि उपमहानगरपालिकाले इटहरी क्षेत्रका निजी तथा सामुदायिक विद्यालयको छात्रावास अनुगमन गर्न थालेको छ । मेयर हेमकर्ण पौडेलको नेतृत्व मंगलबार पहिलो चरणमा होस्टलमै विद्यार्थीको मृत्यु भएको सेकेन्डरी माध्यमिक विद्यालयसहित पिसजोन आवासीय माध्यमिक विद्यालय तथा मोडर्न प्रिपेटरी माध्यमिक विद्यालय, ग्रिनपिस माध्यमिक विद्यालय र शहीद स्मृति आवासीय माध्यमिक विद्यालयमा अनुगमन गरिएको हो । अनुगमनका क्रममा सेकेन्डरी माध्यमिक विद्यालयको भान्सा साँघुरो पाइएको थियो भने सफाइमा पनि उति ध्यान नदिएको पाइएको थियो । होस्टल पनि मापदण्ड पूरा नगरी सञ्चालन गरेको पाइएको मेयर पौडेलले बताए । मापदण्ड पूरा नगरेको पाइएपछि सेकेन्डरी माध्यमिक विद्यालयको होस्टलमा उपमहानगरपालिकाले तालाबन्दी गरेको छ । मापदण्ड पूरा गरेपछि मात्र सञ्चालन गर्न दिइने भएको छ । होस्टलहरु मापदण्ड पूरा गरी सञ्चालन, गर्न सफा राख्न, चुस्त एवं दुरुस्त रुपमा सञ्चालन गर्न अनुगमन टोलीले निर्देशन दिएको छ । सेकेन्डरी माध्यमिक विद्यालयमा मृत्यु भएका जेनिसको वीपी कोइराला स्वास्थ्य विज्ञान प्रतिष्ठान धरानमा पोष्टमार्टम गरी आफन्तले शव बुझेर मंगलबार दाहसंस्कार गरेका छन् । टोलीले पिसजोन, मोर्डन प्रिपेटरी, ग्रिनपिस र शहीद स्मृति आवासीय माध्यमिक विद्यालयको छात्रावास अनुगमनपछि सुधार गर्न निर्देशन दिएको छ । पाँच वर्षभन्दा मुनिका बालबालिकाहरुलाई होस्टलमा राख्न नपाइने नियम लागू गर्ने उपमहानगरपालिकाले जनाएको छ । अनुगमन टोलीमा उपमहानगरकी उपमेयर संगीता चौधरी, प्रमुख प्रशासकीय अधिकृत रामचरित्र मेहता, शिक्षा शाखाका फाल्गुनी काफ्लेलगायत सहभागी थिए ।