सिजन श्रेष्ठको हावामा अल्झिएको स्वरले पायो गामबेंसीका कवि युवा साहित्य पुरस्कार

सुन्दरहरैँचा : कवि क्षेत्रप्रताप अधिकारी युवा साहित्य पुरस्कार २०८१ बाट मोरङको सुन्दरहरैंचाका युवा कवि सिजन श्रेष्ठ पुरस्कृत भएका छन्। काठमाडौंमा आयोजित एक विशेष कार्यक्रममा श्रेष्ठलाई नगद ५० हजार रुपैयाँ, ट्रफी र मेडल प्रदान गरिएको हो। गुरूकुल एजुकेसन फाउण्डेसन एण्ड नेपाल कलेज अफ म्यानेजमेन्टले प्रदान गर्ने यस पुरस्कारको लागि चार उत्कृष्ट कविता सङ्ग्रहहरूको अन्तिम सूची सार्वजनिक गरिएको थियो। तीमध्ये सिजन श्रेष्ठको कृति हावामा अल्झिएको स्वर विजेता घोषित भएको हो। छनोटमा परेका अन्य कृतिहरूमा साहित्यकार पल्लबिबको लाटी, सुभासिसको क र सुरज रानाको जब कविता निस्कन्छ जुलुसमा रहेका थिए। पुरस्कार पाउँदा खुशी व्यक्त गर्दै श्रेष्ठले कविता लेखनमा २२ वर्षको साधनाको मूल्याङ्कन भएको महसुस गरेका छन् र यसले आफूमा थप जिम्मेवारीबोध गराएको बताएका छन्। आयोजक संस्थाले यो पुरस्कारले युवा साहित्यकारहरूलाई थप प्रेरणा र उत्साह दिने विश्वास व्यक्त गरेको छ।