धरान । धरान उपमहानगरपालिकाका प्रमुख हर्कराज राईको अगुवाइमा धरानको निशाने खोलामा ट्याङ्की बनाउने मजदुर ४ दिनदेखि आइसियुमा उपचाररत छन् ।
शुक्रवार ट्याङ्कीको ढलान कार्य गर्दा गर्दै बेहोस भएका मजदुर धरान १३ का ५० वर्षीय जितबहादुर राई बिपी कोइराला स्वास्थ्य विज्ञान प्रतिष्ठान धरानको आइसियु कक्षमा उपचाररत छन् । ३ महिना अघिदेखि मेयर राईको अभियानमा जोडिएका उनी ब्रिटिस वेलफेयरले खानेपानी ट्याङ्की बनाइदिने भएपछि उनी ज्याला मजदुरी गर्न पुगेका थिए । उनका भतिज सञ्जय राईका अनुसार ढलानको काम भइरहेको दिन कामको चाप बढी भएकोले आफ्नो काका काम गर्दा गर्दै बेहोस भएको बताएका छन् ।
घर मुलीका रूपमा रहेका उनी काम गर्दा गर्दै अस्पतालको आइसियु पुगेको कारण उनको ४ जनाको परिवार चल्न समेत गाह्रो भएको भतिजी नुनु राईले बताएकी छन् । राईको परिवारमा उनकी श्रीमती सहित २ छोरा छन् । एक छोरा अध्ययन गरिरहेका विद्यार्थी हुन् भने अर्का छोरा बेरोजगार छन् । अहिले उनको औषधि उपचारमा भतिजी नुनु राई खटिइरहेकी छन् । उनका अनुसार अहिलेसम्म काका जितबहादुर राईको उपचारमा २ लाख भन्दा बढी रकम खर्च भएको छ ।
उनी भन्छिन् –‘काकाको उपचारको लागी २ लाख भन्दा बढी सकिइसक्यो, आफन्तबाट ऋण काढेर उपचार गरिरहेको छु । अहिले तीन दिनदेखि स्थिर रहेको काकाको स्वास्थ्य आजबाट केही सुधार भएको छ ।’ घर परिवारमा कमाइ गर्ने कोही नहुदा उपचारको लागि समस्या भएको उनी बताउछिन् । उनले भनिन् –‘काकाले सकुन्जेल मेयर सापको श्रमदान अभियानमा पनि श्रमदान गर्नुभयो, हातमुख जोर्न समस्या भएपछि सोही अभियानमा ज्याला मजदुरी गर्नुभयो, अहिले यो अवस्था भयो मेयर सापले पनि केही सहयोग गर्नुहुन्छ कि भन्ने आशा छ, साथै मनकारी महानुभावहरूलाई सहयोगको लागी अनुरोध समेत गर्दछु ।’
‘अभियानमा काम गर्ने श्रमिकको बिमा पनि छ भन्छन् तर काकाले बिमा रकम नपाउने रे भनेको पनि सुन्दै छु । यो बारेमा मलाइ थाहा छैन ।’ मेयर हर्कराज राई, उनको श्रम अभियानका प्रोजेक्ट मेनेजर दत्त कुमार लिम्बू लगायत अभियानका कोही पनि अहिलेसम्म बिरामी भेट्न र बिरामीको अवस्था बुझ्न अस्पताल पुगेका छैनन् । उनका भतिज भन्छन् ‘अहिलेसम्म कोही आउनुभएको छैन, वेलफेयरका सुपरभाइजर चाही आउनुभयो ।’ राईलाई सहयोग गर्न उनको आफन्तको मोबाइल नं। ९८२४३२६९३५ मा सम्पर्क गर्न सक्नुहुन्छ ।
Discussion about this post