छोराको विलासी जीवन बाहिरिएपछि मङ्गोलियाका प्रधानमन्त्रीको राजीनामा

काठमाडौँ । सामाजिक सञ्जालमा आफ्ना छोराको विलासी जीवन बिताएको तस्बिरहरू देखा परेपछि मङ्गोलियाका प्रधानमन्त्री एल ओयुन एर्डिनले राजीनामा दिएका छन् । भ्रष्टाचार विरोधी अनुसन्धान र हप्तौँको व्यापक विरोधपछि एर्डिनले राजीनामा दिएका हुन् ।

एल ओयुन एर्डिनले मङ्गलवार संसद्मा विश्वासको मत गुमाएका थिए । उनलाई संसद्का १२६ सदस्यहरूमध्ये कम्तीमा ६४ जनाको समर्थन आवश्यक थियो ।

विश्वासको मतदानको क्रममा गोप्य मतदानमा भाग लिने ८८ जना सांसदहरूमध्ये ओयुन एर्डिनले ४४ मत मात्र प्राप्त गरेका थिए ।भाइरल तस्बिरहरूमा, ओयुन एर्डिनका छोरा र छोराकी प्रेमिका आफ्नो इन्गेजमेन्ट बिदामा कालो डायर ह्यान्डब्याग र धेरै किनमेल झोलाहरूसहित देखिएका छन् ।

प्रदर्शनकारीहरूले एर्डिनको परिवार कसरी यति विलासी जीवन बिताउन सक्छ भन्दै प्रश्न गरेका छन् ।स्थानीय मिडियाहरूले देशको भ्रष्टाचार विरोधी निकायले उनीहरूको वित्तीय मामिलाको अनुसन्धान गरिरहेको छ बताएका छन् ।

एर्डिनले भ्रष्टाचारको आरोप अस्वीकार गरेका छन् र आफ्ना आलोचकहरूलाई उनी विरुद्ध धिक्कार अभियान चलाएको आरोप लगाएका छन् ।