काठमाडौँ : गत भदौ २३ र २४ गते जेन–जी आन्दोलनका क्रममा भएको भौतिक तथा अन्य क्षतिअन्तर्गत हालसम्म चार अर्ब दुई करोड रुपैयाँ बीमा दाबी भुक्तानी गरिएको छ।
नेपाल बीमा प्राधिकरणले शुक्रवार सार्वजनिक गरेको तथ्यांकअनुसार निर्जीवन बीमा कम्पनीहरूमा दर्ता भएका ३,२५५ दाबीमध्ये करिब २३ अर्ब ४३ करोड ४१ लाख बराबरको दाबी प्राप्त भएकोमा अग्रिमसहित करिब चार अर्ब दुई करोड भुक्तानी भएको हो।
सम्पत्ति बीमातर्फ दर्ता भएका ६९५ दाबीअन्तर्गत करिब १९ अर्ब तीन करोड ४१ लाखमध्ये करिब तीन अर्ब नौ करोड ४७ लाख भुक्तानी भएको छ। मोटर बीमातर्फ दर्ता भएका २,२९५ दाबीअन्तर्गत तीन अर्ब ४४ करोड १० लाखमध्ये ८४ करोड ८५ लाख भुक्तानी भएको प्राधिकरणले जनाएको छ।
त्यस्तै, इन्जिनियरिङ तथा ठेक्का जोखिम बीमाका २०९ दाबीअन्तर्गत करिब ५५ करोड चार लाखमध्ये छ करोड ६९ लाख रुपैयाँ भुक्तानी भएको छ। परिवहन बीमातर्फ १२ दाबीका लागि एक करोड ६९ लाखमध्ये ४८ लाख भुक्तानी भएको छ भने अन्य बीमातर्फका ४४ दाबीअन्तर्गत करिब ३९ करोड १८ लाखमध्ये ३९ लाख भुक्तानी भएको छ।
जेन–जी आन्दोलनका क्षतिसम्बन्धी दाबीसाठी नेपाल पुनर्बीमा कम्पनीले निर्जीवन बीमा कम्पनीहरूलाई दुई अर्ब ५१ करोड ७९ लाख अग्रिमसहित भुक्तानी गरिसकेको छ। पुनर्बीमा कम्पनीमा दर्ता भएका २,८६० दाबीमध्ये १५ अर्ब ८१ करोड बराबरका दाबी दर्ता भएको प्राधिकरणले जनाएको छ।
नेपाल बीमा प्राधिकरणका अनुसार गत असोज १८ गतेको अविरल वर्षा तथा बाढी–पहिरोका कारण दर्ता भएका बीमा दाबीमध्ये हालसम्म एक करोड १४ लाख रुपैयाँ भुक्तानी भएको छ।
देशभरबाट प्राप्त ७४४ प्रारम्भिक दाबीमध्ये कुल दाबी रकम करिब तीन अर्ब ७७ करोड ४२ लाख रहेको छ।
सम्पत्ति बीमातर्फ दर्ता भएका ४०५ दाबीमध्ये करिब तीन अर्ब २१ करोड ५० लाखको दाबी परेकामा ६४ लाख भुक्तानी भएको छ। इन्जिनियरिङ तथा ठेक्का जोखिम बीमामा १०४ दाबी दर्ता हुँदा करिब ४७ करोड ६६ लाख दाबी परेकामा एक लाख ५४ हजार भुक्तानी भएको छ।
कृषि तथा बाली बीमातर्फका २१० दाबीमध्ये करिब चार करोड १४ लाख रकममध्ये एक लाख रुपैयाँ भुक्तानी भएको छ। मोटर बीमा (निजी) का ४० दाबीअन्तर्गत करिब दुई करोड ८२ लाख दाबीमध्ये ४८ लाख भुक्तानी भएको छ।
मोटर बीमा (सार्वजनिक) का १० दाबी (करिब एक करोड आठ लाख), अन्य बीमाका दुई दाबी (करिब १२ लाख) र सामुद्रिक बीमाका तीन दाबी (करिब १० लाख) भने भुक्तानी हुन बाँकी रहेको प्राधिकरणले जनाएको छ।
युनिकोड
मिति रूपान्तरण
पत्रपत्रिकाबाट
प्रतिक्रिया