साधारण सभाका अवसरमा संस्थापकलाई सम्मान

इलाम / उच्च अदालत बार एसोसिएसन इलामले ३३ औँ वार्षिक साधारण सभाका अवसरमा संस्थापकहरूलाई सम्मान गरेको छ । शुक्रवार आयोजित एक कार्यक्रममा संस्थापक सचिव (अभिकर्ता) उद्धवप्रसाद श्रेष्ठ एवम् तत्कालीन सदस्यहरू एवम् वरिष्ठ अधिवक्ताहरू धर्मप्रसाद उप्रेती र लीला उदासी खनाललाई सम्मान गरेको हो । उनीहरूलाई नेपाल बार एसोसिएसनका पूर्व उपाध्यक्ष तथा कार्यक्रमका प्रमुख अतिथि मदनकुमार खड्का, उच्च अदालत बार एसोसिएसन इलामका अध्यक्ष उत्तम पौडेल लगायतले सम्मान पत्र र मायाको चिनो सहित सम्मान गरिएको बार एसोसिएसन इलाम सदस्य भीम सङ्गम कार्कीले जानकारी दिए । सम्मानित श्रेष्ठ, उप्रेती र खनालले २०४२ सालमा इलाम जिल्ला बार स्थापना हुँदा महत्त्वपूर्ण भूमिका निर्वाह गरेकाले सम्मान गरिएको बार एसोसिएसन इलामका अध्यक्ष पौडेलले जानकारी दिए । कार्यक्रममा प्रमुख अतिथि खड्का सहित नेपाल बारका पूर्व सचिव बालकुमार कट् वाल, झापा बारका अध्यक्ष नारायणप्रसाद भट्टराई, इलाम बारका अध्यक्ष तारानाथ पराजुली, वरिष्ठ अधिवक्ताहरू दामोदर सापकोटा लगायतले शुभकामना मन्तव्य राखेका थिए ।