सर्लाही : नेपाली कांग्रेसका नेता एवम् पूर्व उपप्रधान तथा गृहमन्त्री विमलेन्द्र निधिले मधेसको समृद्धि कांग्रेसको नेतृत्वमा मात्रै सम्भव हुने दाबी गरेका छन् ।
सर्लाहीको रामनगर गाउँपालिका १ मा कांग्रेसले आयोजना गरेको पार्टी प्रवेश कार्यक्रमलाई सम्बोधन गर्दै उनले यस्तो बताएका हुन् ।
कांग्रेसीहरूले लोकतन्त्र, समाजवाद, संघीयता, मिश्रित निर्वाचन प्रणालीसहित नौ वटा मुलमन्त्र सधैं याद गर्नुपर्ने उनले बताए ।
उनले कांग्रेस बलियो भए मात्रै देश बलियो हुने भन्दै जिकिर गरे । पार्टीभित्र सुदृढीकरण र शुद्धीकरण दुवै आवश्यक रहेको उनको भनाइ छ ।
‘लोकतान्त्रिक पार्टीभित्र सामान्य मतभेद हुन्छ । मतभेदको कारण पार्टीलाई कमजोर बनाउनेतिर लाग्नुभन्दा पनि बलियो बनाउनेतिर लाग्नुपर्छ,’ उनले भने, कांग्रेस कमजोर भयो भने लोकतन्त्र खतरामा पर्छ ।
उनले पार्टीको १५ ओैं महाधिवेशन एक वर्षपछि हुनेसमेत बताए ।
नेपाली कांग्रेस सर्लाहीका सभापति सुरेन्द्रप्रसाद सिंहको सभापतित्वमा भएको कार्यक्रममा विभिन्न पार्टी परित्याग गरि एक हजार पाँच सय बढी नेता तथा कार्यकर्ता नेपाली कांग्रेसमा प्रवेश गरेका छन् ।
नव प्रवेशीहरूलाई नेता निधिसहित कांग्रेस मधेस प्रदेश उपसभापति एवम् पूर्व स्वास्थ्य तथा जनसंख्या मन्त्री वीरेन्द्र प्रसाद सिंहसहितका नेताहरूले स्वागत गरेका थिए ।
आमसभामा पूर्व सभापति एवम् मन्त्री नागेन्द्र राय, संविधानसभा सदस्य एवम् पूर्व मन्त्री शम्भुलाल श्रेष्ठ, जंगिलाल राय, हरेश महतो, उप्रेन्द्र सिंह कुशवाह, कृष्णदेव यादव, जिल्ला समन्वय समिति सर्लाहीका सभापति कौशलकिशोर सिंह, महासमिति सदस्य प्रमोद बराल लगायतको उपस्थित रहेको थियो ।
Discussion about this post