विद्यालय र कलेजहरुमा वार्षिक परीक्षा सकिएको छ । विद्यार्थीहरु एक वर्ष लामो अध्ययनपछि केही साताका लागि फुर्सदिला बनेका छन् । अब नयाँ शैक्षिक सत्र सुरु हुन लागेको छ । यो मेसोमा शैक्षिक सस्थाहरु आगामी वर्षको योजना बनाउन लागेका छन् ।
नयाँ विद्यार्थी आकर्षित गर्न नयाँ कार्यक्रम र रणनीति बनाउन सबैजसो शैक्षिक संस्था लागिरहेका छन् । सुनसरीको इटहरीका संस्थागत विद्यालयहरू पनि आ–आफ्नै योजना बनाइरहेका छन् । विद्यार्थी तथा अभिभावकको नजरमा पर्नका लागि विभिन्न योजना निर्माण गर्न विद्यालयहरू लागिरहेका छन् ।
प्रदेश खबरले इटहरीलगायत कोशी प्रदेशका विभिन्न सहरमा नाम कमाएका विद्यालयहरुबारे पाठकसमक्ष नियमित रुपमा जानकारीमूलक सामग्री प्रस्तुत गर्ने प्रयास गरेको छ । यसअन्तर्गतको पहिलो शृंखलाका रुपमा इटहरी उपमहानगरका केही उत्कृष्ट संस्थागत विद्यालयहरुबारे चर्चा गरेका छौं ।
यस शृखलाअन्तर्गत विराटनगर, झापा इलामलगायत स्थानका चर्चित विद्यालयहरुबारे पनि जानकारी प्रस्तुत गर्दै जानेछौं ।
विश्व आदर्श इङ्लिस बोर्डिङ स्कुल
विद्यार्थी तथा अभिभावकको रोजाइमा पर्न सक्ने उत्कृष्ट स्कुल हो विश्व आदर्श इङ्लिस बोर्डिङ स्कुल । इटहरीका उत्कृष्ट कलेजहरू मध्येको एक विश्व आदर्श कलेजकै शाखाका रूपमा विश्व आदर्श इङ्लिस बोर्डिङ स्कुल स्थापना गरिएको हो ।
२०७४ सालमा स्थापित यस स्कुलमा सुरुमा २ सय ९७ जना विद्यार्थी थिए । विद्यालयले कक्षा ८ सम्मको अध्यापन गराउँदै शिक्षण सिकाइ सुरु गरेको थियो । भरखरै समाप्त भएको एसईईमा ६५ जना विद्यार्थी सहभागी रहेको विद्यालयका प्रधानाध्यापक गणेश दुलालले जानकारी दिए ।
अघिल्ला शैक्षिक सत्रहरूमा उत्कृष्ट तथा उदाहरणीय नतिजा निकाल्दै आएको विद्यालयले यस पटकको एसईईमा पनि उत्कृष्ट नतिजा निकाल्ने विश्वास लिएको छ ।
विद्यालयमा हाल १ हजार २० भन्दा धेरै विद्यार्र्थी छन् । उत्कृष्ट पठनपाठन भएका कारण पनि यस विद्यालयले विद्यार्थी भर्नाका लागि कोटा निर्धारण गरेको दुलाल बताउँछन् । प्रत्येक कक्षामा ३ वटाका दरले सेक्सन छुटाइएको र प्रत्येक कक्षाका ३ वटा सेक्सनमा जम्मा ९० जना विद्यार्थी रहेको दुलालले जानकारी दिए । बाहिरबाट आएका न्यून विद्यार्थीहरुले मात्र विश्व आदर्श इङ्लिस बोर्डिङ स्कुलमा अध्ययन गर्ने अवसर प्राप्त गर्ने उनको भनाई छ ।
यस विद्यालयमा कक्षा १ देखि कक्षा ४ सम्म अन्यत्र अध्यापन नहुने एन सिसी एजुकेसन युके नामक युकेको कम्प्युटर शिक्षा अध्यापन गराइँदै आएको छ भने आउने शैक्षिक वर्षबाट उक्त शिक्षा कक्षा ५ मा अध्ययनरत विद्यार्थीलाई समेत अध्यापन गराउने तयारी गरिएको छ ।
यस्तै कक्षा ६ देखि ८ कक्षा सम्मका विद्यार्थीका लागि कारखाना साइन्स नामक कोर्स अध्यापन गराउने तयारी गरिएको छ । यस्तै गणित विषयको समेत प्रयोगशाला भएका कारण अभ्यास गर्दै अध्ययन अध्यापन गर्ने गराउने वातावरणले अझै फराकिलो बनाउँदै लैजाने योजना विद्यालयले बनाएको छ ।
यस वर्षबाट इनोभेसन ल्याब समेत सञ्चालनमा ल्याउने तयारी गरिएको छ । काठमाडौँ विश्व विद्यालयको परामर्शमा रहेर अध्ययन अध्यापन गराइने भएका कारण पनि प्रभावकारी शिक्षा प्रवाह गर्नेमा विद्यालयले विश्वास लिएको छ ।
विद्यार्थीको सिकाइलाई मध्यनजर गर्दे आवश्यकता अनुसार विभिन्न तालिमहरू सञ्चलन हुँदै आएकोमा आउने शैक्षिक वर्षमा निरन्तरता दिइने छ ।
अतिरिक्त क्रियाकलाप अन्तर्गत ९ वटा विधामा छुट्टाछुट्टै शिक्षकको व्यवस्था गरिएको समेत प्रधानाध्यापक दुलालले जानकारी दिए । झन्डै १ सय ५० भन्दा धेरै कर्मचारी रहेको यस विद्यालयमा कलेजमा समेत गरी जम्मा १२ वटा स्कुल बस सञ्चालनमा छन् ।
कोसी सेन्ट जेम्स सेकेन्डरी बोर्डिङ स्कुल
कोसी सेन्ट जेम्स सेकेन्डरी बोर्डिङ स्कुल पनि इटहरी र आसपास क्षेत्रका विद्यार्थी अनि अभिभावकको रोजाइको स्कुल हो । २०५३ सालमा स्थापित यस विद्यालयले इटहरीको शैक्षिक विकासमा उल्लेख्य योगदान पुर्याउँदै आएको छ ।
२०६१ सालमा नयाँ व्यवस्थापन आउँदा विद्यालयमा २ सय ४० जना विद्यार्थी रहेको विद्यालयका सिइओ शशी श्रेष्ठले जानकारी दिए । हाल विद्यालयमा १३ सयभन्दा धेरै विद्यार्थी अध्ययनरत छन् । भरखरै सम्पन्न एसईईमा कोसी सेन्ट जेम्स सेकेन्डरी बोर्डिङ स्कुलबाट १ सय १ जना सहभागी रहेको सिइओ श्रेष्ठले जानकारी दिए ।
कोसीको विशिष्टता अनुशासन र निरन्तर शैक्षिक उत्कृष्टता भन्ने मूल नारा रहेको यस विद्यालयले अनुशासनलाई प्राथमिकतामा राखेर शिक्षण सिकाइ गर्ने गरेको छ ।
विद्यालयले अनुशासनसँगै नेपालीपन, मर्यादा, संस्कार लगायतका विषयहरूलाई विशेष जोड दिएको छ । समयसापेक्ष प्रविधिहरूको प्रयोगबाट शिक्षण सिकाइ गरिने यस विद्यालयले स्थापनाकालबाटै उत्कृष्ट नतिजा निकाल्न सफल हुँदै आएको छ । यस पटकको एसईईमा पनि उत्कृष्ट नतिजा निकाल्ने विश्वास विद्यालयले लिएको छ ।
शिक्षण सिकाइ प्रणालीलाई प्रभावकारी बनाउने उद्देश्यले कोसी सेन्ट जेम्स सेकेन्डरी बोर्डिङ स्कुलले ब्रिटिस काउन्सिलसँगको सहकार्यमा पनि कार्यक्रम सञ्चालन गर्दै आएको छ ।
विद्यालयले ब्रिटिस काउन्सिलको इन्टरनेश्नल अवार्ड समेत प्राप्त गर्न सफल भएको छ । विद्यार्थीलाई अभ्यासका मध्यमबाट सहज ढङ्गले व्यवहारिक शिक्षा दिनुपर्छ भन्ने मान्यताका साथ सोही नियमलाई पछ्याएर विद्यालय अघि बढेको छ ।
अनुभवी शिक्षक शिक्षिकाको व्यवस्था रहेको यस विद्यालयमा समय समयमा आवश्यकताका आधारमा शिक्षक शिक्षिकाहरूलाई विषयगत तालिम समेत प्रदान गर्ने गरिएको छ भने प्रत्येक विषयका शिक्षक शिक्षिकाहरूले हरेक विषयवस्तुको अध्यापन गर्नुअघि कार्ययोजना बनाएर मात्र अध्यापन गराउने गरेको विद्यालयका सिइओ श्रेष्ठले जानकारी दिए ।
हरेक विषयको शिक्षण सिकाइ क्रियाकलापको भिडियो रेकर्ड गर्ने गरिएको जानकारी दिँदै सिइओ श्रेष्ठले भिडियोका कारण शिक्षक शिक्षिकाले सजकताका साथ अध्ययन अध्यापन गर्नुका साथै कुनै पनि शिक्षक नयाँ आएको अवस्थामा सोही भिडियो देखाउँदा विद्यालयको शिक्षण सिकाइ प्रक्रियामा भिज्न सहज हुने उनको भनाइ छ ।
सुलभ शुल्कमा उत्कृष्ट शिक्षा प्रदान गर्नु नै विद्यालयको उद्देश्य रहेको सिइओ श्रेष्ठ बताउँछन् । उनका अनुसार प्रि प्राइमरीका विद्यार्थी का लागि छुट्टै स्कुल बसको व्यवस्था गरिएको छ भने शिक्षिकाहरूको पनि छुट्टै व्यवस्था छ ।
अतिरिक्त कृयाकालापमा पनि उत्कृष्ट नतिजा निकाल्न सफल यस विद्यालयले प्रत्येक विषयको छुट्टाछुट्टै विषयगत शिक्षकको व्यवस्था गरेको छ । कम्प्युटर ल्याब, साइन्स ल्याब लगायतको सहज व्यवस्थापन गरिएको छ ।
आउने शैक्षिक सत्रबाट विद्यार्थीहरूको स्वास्थ्य अवस्थालाई मध्यनजर गर्दै छुट्टै नर्सको व्यवस्थापन गर्ने र शिक्षण प्रमाणपत्र दिँदा अभिभावकलाई स्वास्थ्य प्रमाणपत्र समेत दिने तयारी गरिएको छ भने अभिभावक तथा विद्यार्थीको गुनासो सुन्न साथै समस्याहरूको समाधानका लागि हटलाइन नम्बरको व्यवस्था गर्ने तयारी समेत यसै शैक्षिक वर्षबाट सुरु गर्ने तयारी गरिएको छ ।
विभिन्न कार्यक्रमका लागि आफ्नै सेमिनार हल तयारी गरिएको छ भने ब्रिटिस काउन्सिल अन्तर्गत रहेका विभिन्न मुलुकका विद्यालयहरूसँग सहकार्य गरेर शिक्षण सिकाइलाई प्रभावकारी बनाउने तयारी गरिएको छ ।
पिसिजोन इङ्लिस बोर्डिङ स्कुल
इटहरीको शैक्षिक विकासमा महत्वपूर्ण योगदान पुर्याएका विद्यालयहरू मध्यको एक पिसिजोन इङ्लिस बोर्डिङ स्कुल पनि हो । यो विद्यालयको स्थापना २०४५ मा भएको थियो । जगदीशप्रसाद ओलीले स्थापना गरेको यस विद्यालयमा २०७४ सालमा भने नयाँ व्यवस्थापन भित्रिएको थियो ।
नयाँ व्यवस्थापन आउँदा करिब ८ सय विद्यार्थी रहेको यस विद्यालयमा हाल ९ सयभन्दा धेरै विद्यार्थी अध्ययनरत रहेको विद्यालयका प्रधानाध्यापक केशव भट्टराईले जानकारी दिए ।
अघिल्लो शैक्षिक वर्षमा ८७ जना विद्यार्थीले एसईई दिएको पिसिजोन इङ्लिस बोर्डिङ स्कुलबाट यस वर्षको एसईईमा ७७ जना विद्यार्थी सहभागी रहेको विद्यालयका प्रधानाध्यापक भट्टराईले जानकारी गराए ।
गत वर्ष पनि उत्कृष्ट नतिजा निकाल्न सफल भएका कारण यस वर्षको एसईई मा पनि विद्यालयले सम्मानजनक नतिजा निकाल्न सफल हुनेमा कुनै द्विविधा नरहेको प्रधानाध्यापक भट्टराई बताउँछन् । अघिल्लो एसईईमा ५२ जना विद्यार्थी ए, १६ जना ए प्लस र अन्य सबै विद्यार्थी बि प्लस ग्रेड सहित एसईई उत्तीर्ण भएको प्रधानाध्यापक भट्टराईले जानकारी दिए ।
परम्परागत शिक्षण विधि भन्दा भिन्न रहेर शिक्षण सिकाइ गर्दै आएको यस विद्यालयले व्यावहारिक शिक्षालाई विशेष जोड दिने गरेको छ । यस्तै २०१९ देखि २०२२ सम्मका लागि अन्तर्राष्ट्रिय स्कुल अवार्डबाट पिसजोन इङ्लिस बोर्डिङ स्कुल सम्मानित भएको थियो ।
यस्तै २०२० मा जापानको गोइ पिस फाउन्डेसन नामक एक संस्थाले आयोजना गरेको अनलाइन निबन्ध लेखन प्रतियोगितामा १ सय ३४ जना विद्यार्थी सहभागी गराएर स्कुल इन्सेन्टिभ अवार्ड जित्न सफल भएको छ । यो अवार्ड नेपालका २ वटा विद्यालयले मात्र जित्न सफल भएका छन् । त्यसमध्ये पिसजोन इङ्लिस बोर्डिङ स्कुल पनि हो ।
पिसजोन इङ्लिस बोर्डिङ स्कुल नेपालभरीका संस्थागत विद्यालयहरूलाई र्याङकिङ गर्दा ३३औँ स्थानमा रहन सफल भएको समेत प्रधानाध्यापक भट्टराईले जानकारी दिए ।
नेपाली पाठ्यक्रम अन्य विकसित मुलुकहरूको तुलनामा केही कमजोर रहेको उल्लेख गर्दै पिसजोन इङ्लिस बोर्डिङ स्कुलले अन्तर्राष्ट्रिय स्तरका केही विद्यालयहरूसँग सहकार्य गर्दै आएको बताउँदै प्रधानाध्यापक भट्टराईले आउने शैक्षिक वर्षबाट अन्तर्राष्ट्रिय विद्यालयहरूसँगको सहकार्यलाई अझै फराकिलो बनाउँदै अघि बढ्ने योजना बनाएको जनाए ।
इटहरी मोडल इङ्लिस बोर्डिङ स्कुल
इटहरीका उत्कृष्ट विद्यालयहरूकै सूचीमा पर्छ– इटहरी मोडल स्कुल । इटहरी उपमहानगरपालिका वडा नम्बर ४ मा रहेको यो विद्यालय २०५२ सालमा स्थापना भएको थियो ।
विद्यालयका संस्थापक तथा प्रधानाध्यापक ज्ञानेन्द्र दाहाल हुन् । सुरुवातमा कक्षा ६ सम्म सञ्चालन गरिएको विद्यालयमा करिब १ सय ५ जना विद्यार्थी थिए ।
इटहरी मोडल स्कुलमा हाल ७ सय ५० भन्दा धेरै विद्यार्थीहरु अध्ययनरत छन् । हालैको एसईईमा इटहरी मोडल स्कुलबाट ५१ जना विद्यार्थी सहभागी भएका थिए ।
स्थापना कालदेखि एसईई (तत्कालीन एसएलसी समेत गरी) हालसम्म करिब १३ सय विद्यार्थीले उत्कृष्ट नतिजा निकाल्न सफल भएका छन् ।
सुरुदेखि हालसम्मकै विद्यार्थीहरुको एसईई नतिजा सम्मानजनक रहेको विद्यालयका प्रधानाध्यापक ज्ञानेन्द्र दाहाल बताउँछन् । पहिले र हालको एसईईको नतिजाको अपेक्षामा पनि केही भिन्न भएको उनको भनाइ छ ।
पहिले पहिले प्रथम स्थान हासिल गर्न सके हुन्थ्यो भन्ने सबैको चाहना हुन्थ्यो भने बिस्तारै त्यो चाहना डिस्टिक्सनमा पुग्यो र विद्यालयले पनि सोही नतिजा निकाल्न आवश्यक प्रक्रिया पूरा गर्दै विद्यार्थीलाई शिक्षण दिंदै आएको दाहालले बताए ।
आउने शैक्षिक सत्रबाट केही फरक शैलीमा प्रविधिहरूको प्रयोगबाट शिक्षण सिकाइको सुरुवात गर्ने तयारीमा रहेको यस विद्यालयले पारिवारिक वातावरणमा शिक्षण सिकाइ गर्दै आएको प्रधानाध्यापक दाहालको भनाइ छ ।
शिक्षणलाई व्यवहारिक बनाउने उद्देश्य लिएको यस विद्यालयले अतिरिक्त क्रियाकलापहरूमा पनि उत्कृष्ट नतिजा निकाल्न सफल भएको जनाएको छ ।
अतिरिक्त क्रियाकलापअन्तर्गत नृत्य, फुटबल, हाजिरीजवाफ प्रतियोगिता, वक्तृत्वकला लगायतका विभिन्न नगर तथा जिल्ला स्तरीय प्रतियोगिताहरूमा उत्कृष्ट नतिजा निकाल्न विद्यालय सफल भएको छ ।
तालिमप्राप्त शिक्षक शिक्षिकाहरूबाट शिक्षण गरिँदै आएको यस विद्यालयमा हाल करिब ५० जना कर्मचारी छन् । व्यवस्थित लाइबेरी तथा कम्प्युटर ल्याबसमेत सञ्चालनमा रहेको यस विद्यालयले विद्यार्थीको सहजताका लागि यसअघि ३ वटा स्कुल बस सञ्चालन गर्दै आएकोमा नयाँ शैक्षिक सत्रबाट ४ वटा स्कुल बस सञ्चालन गर्ने तयारी गरिरहेको प्रधानाध्यापक दाहालले जनाए ।
पाथीभरा इङ्लिस बोर्डिङ स्कुल
इटहरी तथा आसपासका विद्यार्थी तथा अभिभावकको रोजाइमा पर्ने अर्को संस्थागत विद्यालय हो– इटहरी उपमहानगरपालिका वडा ४ मा रहेको पाथीभरा बोर्डिङ स्कुल ।
२०४८ सालमा स्थापना भएको यो निजी स्कुलले २०७३ सालबाट नयाँ व्यवस्थापन आएपछि छुट्टै पहिचान बनाउन सफल भएको छ ।
हाल विद्यालयमा ७ सय भन्दा धेरै विद्यार्थीहरु अध्ययनरत छन् । पछिल्लो व्यवस्थापन आएसँगै शैक्षिक तथा पूर्वाधार विकासमा पनि विद्यालयले उल्लेख्य प्रगति गरिरहेको छ ।
आधुनिक शैलीको पठन पाठनमा विशेष जोड दिँदै आएको यस विद्यालयले प्रत्येक कक्षाकोठामा आधुनिक प्रविधि जडान गरी पठनपाठन गर्ने गरिएको विद्यालयका प्रधानाध्यापक गोपाल श्रेष्ठले जानकारी दिए । उनका अनुसार कक्षा २ भन्दा माथि डिजिटल विद्यालयका रुपमा पाथीभरा बोर्डिङ स्कुलको स्तरोन्नति गरिएको छ ।
पुस्तकको अध्ययनसँगै सोही कुरालाई आधुनिक प्रविधिमार्फत अभ्यास गराएर मात्र अध्ययन अध्यापन गराउने गरिएको ब्यावस्थापन समितिका अध्यक्ष निर्मल रिजालको भनाई छ । पाथीभरा बोर्डिङ स्कुलबाट ४८ जना विद्यार्थीहरु एसईईमा सहभागी भएका थिए ।
विगतमा उत्कृष्ट नतिजा ल्याउन सफल यस विद्यालयले यस पटक पनि उत्कृष्ट नतिजा निकाल्ने विश्वास लिएको छ ।
अघिल्लो शैक्षिक वर्षमा ५९ जना विद्यार्थीले एसर्ईई दिएकामा ११ जनाले ‘ए प्लस’, ४ जनाले ‘बी’ र बाँकी सबै विद्यार्थीहरुले ‘ए’ ल्याएर उत्तीर्ण भएको अध्यक्ष रिजालले जानकारी दिए । विभिन्न समयमा शिक्षक शिक्षिकाहरूलाई आवश्यकताका आधारमा तालिमको व्यवस्था गर्ने गरिएको रिजालको भनाई छ ।
हालसम्मको नतिजा अनुसार विद्यालयले अतिरिक्त क्रियाकलापमा पनि उत्कृष्ट नतिजा निकाल्न सफल भएको छ । आउने शैक्षिक सत्रबाट विद्यालयले खेलकुदलाई पनि विशेष जोड दिने तयारी गरेको छ ।
सोहीअनुरूप विद्यालयको नजिकै रहेको १६ कट्ठा जग्गा ५ वर्षका लागि लिजमा लिइएको रिजालले जानकारी दिए ।
शैक्षिक क्षेत्रबाट साथै अन्य अतिरिक्त क्रियाकलापबाट विद्यालयलाई नगर तथा जिल्ला स्तरमा चिनाउन तथा विद्यार्थीहरुको पठनपाठनलाई उत्कृष्ट बनाउन आवश्यक सम्पूर्ण कार्यसम्पादन गर्दै अघि बढ्ने प्रधानाध्यापक श्रेष्ठले जानकारी दिए ।
नेपाल डिभिएम बोर्डिङ स्कुल
इटहरीको उदाहरणीय विद्यालयका रूपमा आफूलाई स्थापित गर्न सफल विद्यालय हो– नेपाल डिभिएम बोर्डिङ स्कुल । यो विद्यालयको पुरा नाम दयानन्द वैदिक मिसन ग्लोबल एकेडेमी हो ।
२०६९ सालबाट औपचारिक रूपमा सञ्चालनमा आएको यस विद्यालयले इटहरीमा छुट्टै पहिचान बनाउन सफल भएको छ । ८५ जना विद्यार्थीलाई साथमा लिएर कक्षा ८ सम्म अध्यापन गराउँदै यस विद्यालयको स्थापना भएको थियो ।
हाल यस विद्यालयमा ५ सय ५० भन्दा बढी विद्यार्थी रहेको विद्यालयका प्रधानाध्यापक डा. बेणु सिटौलाले जानकारी दिए । विद्यालयबाट यस शैक्षिक वर्षमा ३० जना विद्यार्थी एसईईमा सहभागी छन् ।
विगतका वर्षहरूलाई स्मरण गर्दा विद्यालयले स्थापना कालबाट नै उत्कृष्ट नतिजा निकाल्न सफल भएको छ ।
विद्यालयले कक्षा ५, ८ र १० को परीक्षा आन्तरिक नभइ वाह्य भएको कुरालाई मध्यनजर गर्दै प्रत्येक वर्ष अभिभावक दिवसको अवसर पारेर प्रत्येक ५ वर्षको नतिजा अभिभावकलाई सुनाउने र कमी कमजोरी देखिए आउने वर्षको शैक्षिक सत्रमा त्यसलाई सुधार गर्दै अघि बढ्ने गरिएको छ ।
पाठ्यपुस्तक अनुरूपको अध्ययनसँगै यस विद्यालयमा सनातन समयदेखि चलिआएका धर्म, संस्कृति, परम्परा, रीतिरिवाज लगायत विविध चाडपर्वका विषयमा सुसूचित गराउने र उक्त विषयको महत्वका विषयमा समेत विद्यार्थीलाई जानकारी गराउने गरिएको छ ।
वैदिक संस्कार र पूर्वीय दर्शनअनुसार विद्यार्थीको आचरण र अनुशासन हुनुपर्छ भन्ने मान्यतालाई मूल मन्त्र बनाएको छ । विद्यालयले विद्यार्थी लाई जीवनोपयोगी सीप समेत सिकाउने गरेको प्रधानाध्यापक सिटौलाले जानकारी दिए । घरायसी व्यवहारमा आवश्यक कुराहरूलाई मध्यनजर गर्दै विषय विज्ञहरूको उपस्थितिमा विविध शिक्षण क्रियाकलाप गरिंदै आएको छ ।
यस विद्यालयमा अध्ययनरत कक्षा ६ भन्दा माथिका विद्यार्थीले विभिन्न आधुनिक खाद्यान्न जस्तै पिज्जा, बर्गर, केक, विभिन्न खालका अचार लगायतका कुराहरू आफैँ बनाउन सक्ने गरी तालिम प्रदान गरिएको प्रधानाध्यापक सिटौलाले जानकारी दिए ।
सामाजिक सञ्जालको बढ्दो दुरुपयोगलाई मध्यनजर गर्दै सकारात्मक शैलीमा सामाजिक सञ्जाल प्रयोग गर्ने तारिकाहरूका विषयमा पनि विद्यार्थी लाई नैतिक शिक्षा प्रदान गर्दै आएको छ ।
लोकप्रिय सामाजिक सञ्जालहरू टिकटक, फेसबुक लगायतको प्रयोगबाट विभिन्न प्रतियोगिता गराउँदै पुरस्कृत गर्ने गरिएको छ ।
आउने शैक्षिक सत्रबाट विद्यार्थीहरुलाई च्याउ खेती, कौसी खेती र गमला खेती गर्न सिकाइ अभ्यास समेत गराउने योजना रहेको प्रधानाध्यापक सिटौलाले जानकारी दिए ।
विद्यालयले फ्री फर्म बुक्स लोड भन्ने नारा सहित विद्यार्थीहरुलाई किताबको भारी बोकेर विद्यालय र घर गर्नुपर्ने परिपाटीको अन्त्य गर्दै कुनै पनि शुल्क बिना एक सेट पुस्तक विद्यालयमा नै उपलब्ध गराउने तयारी गरिएको छ भने आउने शैक्षिक वर्षबाट कक्षा ६ मा अतिरिक्त विषय अन्तर्गत संस्कृत भाषा अध्यापन गराउने तयारी गरिएको समेत प्रधानाध्यापक सिटौलाले जानकारी दिए ।
शिक्षक शिक्षिकासहित विद्यालयमा ६५ जना कर्मचारी छन् भने विद्यार्थीको सहजताका लागि ६ वटा स्कुल बस सञ्चालन गरिएको छ ।
मोर्डन प्रिपिरेटोरी इङ्लिस बोर्डिङ स्कुल
इटहरीको शैक्षिक विकासमा महत्वपूर्ण योगदान पुर्याउने संस्थागत संस्थागत विद्यालयहरू मध्येको अर्को विद्यालय हो मोर्डन प्रिपिरेटोरी बोर्डिङ स्कुल । इटहरीको मुख्य चोक नजिकै रहेको यो विद्यालयको स्थापना २०४९ सालमा भएको थियो ।
शिक्षण सिकाइलाई उत्कृष्ट बनाउनु पर्छ भन्ने उदाहरण पस्किने विद्यालयहरू मध्यको यो पनि एक हो । यस विद्यालयमा हाल ५ सय ५० जना विद्यार्थी अध्ययनरत रहेको विद्यालयका अध्यक्ष सञ्जीव वाग्लेले जानकारी दिए ।
अघिल्लो शैक्षिक सत्रमा ३० जना विद्यार्थी एसईईमा सामेल भएका थिए भने यस पटक २५ जना विद्यार्थीले एसईई दिएका छन् । यस अघिको शैक्षिक सत्रहरूमा उत्कृष्ट नतिजा निकाल्न सफल यस विद्यालयले यस पटकको एसईईमा पनि उत्कृष्ट नतिजा निकाल्ने विश्वास लिएको छ ।
इटहरीको पुरानो स्थापित विद्यालयहरू मध्यमा मोर्डन प्रिपिरेटोरी बोर्डिङ स्कुललाई पनि लिने गरिएको छ । यस विद्यालयमा अध्ययन पुरा गरेर बाहिरिएका विद्यार्थीले उल्लेख्य प्रगति गरेका प्रशस्तै उदाहरणहरू रहेको अध्यक्ष वाग्ले बत्ताउँछन् ।
व्यावसायिक क्षेत्रमा पनि उत्तिकै प्रगति गर्न सफल भएका विद्यार्थी प्रशस्तै रहेको वाग्लेको भनाई छ । विद्यालयले अनुशासन र संस्कारयुक्त शिक्षालाई जोड दिँदै शिक्षण सिकाइलाई प्रभावकारी ढङ्गले प्रस्तुत गर्ने गरेको छ ।
व्यावहारिक शिक्षाले नै भविष्यमा उत्कृष्टता हासिल गर्न सक्छ भन्ने विश्वासका साथ सोही अनुसारको शिक्षण प्रणालीमा रहेर विद्यालयले पठनपाठन गरिरहेको अध्यक्ष वाग्लेको भनाई छ । अनुशासन र संस्कार युक्त शिक्षा भन्ने अभियान सहित शिक्षण सिकाइ गरिँदै आएको छ ।
विद्यालयले आउने शैक्षिक सत्रबाट पाठ्यपुस्तकका साथसाथै विद्यार्थीलाई सुहाउँदो सामाजिक व्यवहारका कुराहरू, संस्कारका कुराहरू, संस्कृतिका कुराहरू, मर्यादा, नेपालीपन जस्ता पक्षमा विषय विज्ञको उपस्थितिमा छुट्टै कक्षा सञ्चालन गर्ने तयारी गरिएको छ ।
आधुनिक प्रविधिको प्रयोगबाट शिक्षण गर्नुका साथै विद्यार्थीलाई अभ्यास गराउने र उमेर अनुसार विद्यार्थीको मनोविज्ञानको अध्ययन गरी विद्यार्थीमा भएका कमी कमजोरीहरूलाई पहिचान गर्ने र त्यस्ता समस्या निराकरणमा अभिभावकसँग सल्लाह गरी अघि बढ्ने योजना विद्यालयले बनाएको छ ।
मोर्डन प्रिपिरेटोरी बोर्डिङ स्कुलले पठनपाठनका साथै अतिरिक्त क्रियाकलापमा पनि उत्तिकै ध्यान दिने गरेको छ । समय समयमा हुने विभिन्न प्रतियोगिताहरूमा सकारात्मक नतिजा निकाल्न सफल धेरै उदाहरणहरू रहेको अध्यक्ष वाग्ले बत्ताउँछन् ।
हरेक शुक्रवार विद्यार्थीलाई मौलिक संस्कृति झल्कने पोसाकमा उपस्थित हुन निर्देशन दिइएको र प्रत्येक शुक्रवार विभिन्न अतिरिक्त क्रियाकलाप गर्ने गरिएको छ ।
एउटा समुदायको विद्यार्थीले अरु समुदायको विद्यार्थीलाई आफ्नो परम्परा र संस्कृतिका विषयमा जानकारी गराउने र एक आपसमा भाइचारा कायम गराउने उद्देश्य सहित शिक्षण सिकाइ गर्ने गरिएको छ । अभिभावकहरूलाई पनि त्यसको महत्वका विषयमा जानकारी दिन गरिएको छ ।
इटहरी उपमहानगरपालिका वडा नम्बर ६ मा रहेको यस विद्यालयमा शिक्षक शिक्षिकासहित करिब ५० जना कर्मचारी छन् । विद्यार्थीको सहजताका लागि ३ वटा बस सञ्चलनमा रहेको अध्यक्ष वाग्लेले जानकारी दिए ।
मकालु इङ्लिस बोर्डिङ स्कुल
इटहरीमा रहेर उत्कृष्ट शिक्षण सिकाइ गर्दै आएको अर्को निजी विद्यालय हो– मकालु बोर्डिङ स्कुल । इटहरी उपमहानगरपालिका वडा नम्बर ५ मा अवस्थित यो स्कुल २०५७ सालमा स्थापना भएको थियो ।
कक्षा ८ सम्म सञ्चालन गर्दै स्थापना भएको यस विद्यालयमा करिब ३ सय विद्यार्थीसहित सुरु भएको थियो । मकालु बोर्डिङ स्कुलमा हाल झन्डै ६ सय ५० जना विद्यार्थी अध्ययनरत छन् ।
यस स्कुलबाट यसपटक २५ जना विद्यार्थी एसईईमा सहभागी भएका थिए । अन्य वर्षको तुलनामा यस वर्ष एसईई दिने विद्यार्थीको सङ्ख्या केही न्यून रहेको स्कुलका प्रधानाध्यापक नेल्शन ढकालले जानकारी दिए ।
विगत वर्षहरूमा उत्कृष्ट नतिजा निकाल्न सफल रहेको स्मरण गर्दै प्रधानाध्यापक ढकालले यस वर्षको एसईईमा पनि आफ्नो विद्यालयले उत्कृष्ट नतिजा प्राप्त गर्ने विश्वास व्यक्त गरे ।
आउने शैक्षिक सत्रबाट केही नयाँ योजनाहरू सहित शिक्षण सिकाइ गर्ने तयारी रहेको उल्लेख गर्दै प्रधानाध्यापक ढकालले नयाँ प्रविधिको प्रयोगलाई उच्च प्राथमिकता दिएर सिकाइलाई प्रभावकारी बनाउने योजना स्कुलले बनाएको बताए । हाल २ दर्जन कम्प्युटर रहेको यस विद्यालयले यही शैक्षिक वर्षबाट कम्प्युटरको सङ्ख्या वृद्धि गर्ने योजना बनाएको छ ।
सञ्चालनमा रहेको साइन्स ल्याबलाई अझै व्यवस्थित बनाउने योजना रहेको ढकालले जानकारी दिए । विगतदेखि नै अतिरिक्त क्रियाकलापमा उत्कृष्ट नतिजा निकाल्न सफल रहेको यस स्कुलले आउने शैक्षिक वर्षमा पनि अतिरिक्त क्रियाकलापहरूलाई निरन्तरता दिने योजना बनाएको छ ।
प्रत्येक शुक्रवार ‘सपोर्ट डे’ का रूपमा मनाउने तयारी गरिएको समेत ढकालले जानकारी दिए । शिक्षक शिक्षिकासहित झन्डै ३५ जना कर्मचारी रहेको यस स्कुलले विद्यार्थी को सहजताका लागि २ वटा बस सञ्चालन गर्दै आएको छ ।
सुस्मा सेकेन्डरी इङ्लिस बोर्डिङ स्कुल
इटहरीका उत्कृष्ट विद्यालयहरूको सूचिमा पर्ने अर्को विद्यालय हो– सुस्मा सेकेन्डरी बोर्डिङ स्कुल । यो स्कुलले छोटो समयमै उत्कृष्ट नतिजा हासिल गर्न सफल भएको छ ।
नेपालमा कोरोना कहर सुरु हुँदै गर्दा सुस्मा सेकेन्डरी बोर्डिङ स्कुलको सुरुवात भएको थियो । करिब २ सय विद्यार्थीसहित कक्षा १० सम्म नै सुरु भएको यस स्कुलमा हाल ४ सय ५० भन्दा धेरै विद्यार्थी अध्ययनरत छन् । सुस्मा सेकेन्डरी बोर्डिङ स्कुलबाट एसईई मा १७ जना विद्यार्थी सहभागी रहेको स्कुलका प्रधानाध्यापक बोधराज नेपालले जानकारी दिए ।
उत्कृष्ट कलेजका रुपमा स्थापना भइसकेको भए पनि विद्यालयमा सुरुवात नै रहेको उल््लेख गर्दै प्रधानाध्यापक नेपालले आउने शैक्षिक वर्षबाट केही नयाँ योजनाहरू सहित विद्यार्थीको शिक्षण सिकाइलाई प्रभावकारी बनाउने योजना रहेको उल्लेख गरे । प्रविधिमैत्री वातावरणमा उत्कृष्ट शैलीको सिकाइलाई विद्यालयले प्राथमिकता दिएको नेपालको भनाई छ ।
शिक्षण सिकाइमा विद्यार्थीको मनोविज्ञान महत्वपूर्ण रहेको कुरालाई मध्यनजर गर्दै ख्यातिप्राप्त मनोविद् डा. सुनील कँडेलको सहयोगमा आउने शैक्षिक वर्षबाट विद्यार्थीको मनोविज्ञान अध्ययन गरी त्यसका आधारमा शिक्षण सिकाइ प्रक्रिया अघि बढाइने भएको छ ।
त्यस क्रममा केही समस्या पाइए निराकरण गर्दै विद्यार्थीको सिक्न सक्ने क्षमताको अध्ययन गर्ने र सोही अनुसारको शिक्षण सिकाइ गर्ने योजना रहेको प्रधानाध्यापक नेपालले जानकारी दिए ।
सिकाउने र सिक्ने प्रक्रियालाई प्राथमिकता दिएको यस स्कुलले अतिरिक्त क्रियाकलापमा पनि उत्तिकै जोड दिने गरेको छ । सोही अनुसार नगर तथा जिल्ला स्तरबाट आयोजना हुने विभिन्न प्रतियोगिताहरूमा उत्कृष्ट नतिजा निकाल्न सफल भएको छ ।
हालको शिक्षामा प्रविधि र सिपको महत्व रहेको उल्लेख गर्दै प्रविधिमैत्री भएर सीपमूलक शिक्षालाई जोड दिएर अघि बढ्ने र नेपाली संस्कार सस्ंकृतिहरुका विषयमा पनि विद्यार्थी लाई सिकाएर शिक्षण सिकाइ गर्ने स्कुलको तयारी छ । कलेजसहित गरेर ८ वटा स्कुल बस सञ्चालनमा छन् भने करिब ५० जना कर्मचारी कार्यरत् छन् ।
कञ्चनजंगा इङ्लिस बोर्डिङ स्कुल
इटहरीका उदाहरणीय संस्थागत विद्यालयहरू मध्ये कञ्चनजंगा इङ्लिस बोर्डिङ स्कुल पनि पर्छ । यो विद्यालय २०६२ सालमा स्थापना भएको थियो । स्थापना भएको केही वर्षमा नै विविध कारणले बन्द हुन पुगेको यो विद्यालय २०६८ सालमा पुनः स्थापित गरिएको थियो ।
पुनःस्थापनाका बेला हुँदा कक्षा ५ सम्मको अनुमति लिएको यस विद्यालयमा सुरुवातमा करिब १ सय जना विद्यार्थी थिए । हालको अवस्थामा यस विद्यालयमा ६ सय ५० भन्दा धेरै विद्यार्थी रहेको विद्यालयका प्रधानाध्यापक हरि आचार्यले जानकारी दिए ।
यस शैक्षिक वर्षमा २१ जना विद्यार्थी एसईईमा सहभागी रहेको प्रधानाध्यापक आचार्यले जानकारी दिए । विद्यालयले आउने शैक्षिक वर्षबाट शिक्षण सिकाइलाई प्रभावकारी बनाउन केही योजनाहरू समेत बनाएको छ ।
प्रविधिमैत्री शिक्षा र व्यवहारिक शिक्षालाई जोड दिँदै विद्यालयले प्रविधियुक्त स्मार्ट बोर्डहरू राख्ने तयारी गरेको छ । विद्यालयले आउने शैक्षिक वर्षबाट नै १२ कक्षासम्म सञ्चालन गर्ने योजना बनाएको छ ।
विद्यालयले जागिर खाने नभई जागिर दिने शिक्षा प्रदान गर्नुपर्छ भन्ने विद्यालयको मान्यता रहेको र सोही अनुसारको शिक्षालाई प्रभावकारी ढङ्गबाट प्रवाह गर्दै आएको प्रधानाध्यापक आचार्यको भनाई छ ।
विद्यार्थीको मनोविज्ञानको अध्ययन गरेर क्षमता अनुसारको शिक्षामा जोड दिने यस विद्यालयले अभिभावकत्व जिम्मेवारी समेत ग्रहण गर्ने गरेको छ ।
अतिरिक्त क्रियाकलापमा पनि उत्तिकै अब्बल रहेको यस विद्यालयले नगर तथा जिल्ला स्तरमा भएका विभिन्न प्रतियोगिताहरूमा समेत उत्कृष्ट नतिजा निकाल्न सफल भएको छ ।
७० जना कर्मचारी रहेको यस विद्यालयमा विद्यार्थीहरुको सहजताका लागि ३ वटा स्कुल बस सञ्चालनमा रहेको प्रधानाध्यापक आचार्यले जानकारी दिए ।
युनिभर्सल इङ्लिस बोर्डिङ स्कुल
इटहरी उपमहानगरपालिका वडा नम्बर ४ मा रहेको अर्को उत्कृष्ट विद्यालय हो युनिभर्सल इङ्लिस बोर्डिङ स्कुल । २०६० सालमा स्थापना भएको विद्यालयमा हाल गणेश भण्डारी प्रधानाध्यापकका रूपमा कार्यरत छन् ।
उनी २०६८ सालदेखि युनिभर्सल इङ्लिस बोर्डिङ स्कुलको प्रधानाध्यापकका रूपमा कार्यरत छन् । भण्डारी आउँदा विद्यालयमा ९ कक्षासम्म मात्र थियो । उनी आएपछि नै विद्यालयमा १० कक्षा सञ्चालन गरिएको हो ।
हाल विद्यालयमा ५ सय ५० भन्दा धेरै विद्यार्थी छन् । भरखरै सम्पन्न एसईईमा यस विद्यालयबाट २६ जना विद्यार्थी सहभागी थिए । विगतका नतिजालाई हेर्ने हो भने विद्यालय उत्कृष्टताको उदाहरण प्रस्तुत गर्न सफल भएको छ ।
विद्यालयमा अध्ययन गरेका धेरै विद्यार्थी ले नेपालका विभिन्न सरकारी तथा निजी क्षेत्रमा उच्च पदमा रहेर काम सम्हाल्न सफल भएका छन् । आफ्नो विद्यालयमा अध्ययन गरेर प्रगति गरेका विद्यार्थीलाई स्मरण गर्दा गर्व महसुस हुने प्रधानाध्यापक भण्डारी बत्ताउँछन् ।
विद्यालयले एसईईमा सहभागिता जनाएको पहिलो पटक नै आफ्नो विद्यालयका विद्याथीए प्रकाश पाण्डे जिल्लाभरबाटै उत्कृष्ट बन्न सफल भएको प्रधानाध्यापक भण्डारीले जानकारी दिए ।
उनै पाण्डेले छात्रवृत्तिमा एमबिबिएस गर्न सफल भई हाल इटहरीको इटहरी सामुदायिक अस्पतालमा कार्यरत रहेको प्रधानाध्यापक भण्डारीले जानकारी दिए ।
आफ्नो विद्यालयमा अध्ययन गरेका धेरै विद्यार्थी उदाहरणीय बन्न सफल भएको उनको भनाइ छ । आउने शैक्षिक वर्षबाट प्रविधिमैत्री शिक्षालाई जोड दिँदै अभ्यास सहितको शिक्षा प्रदान गर्ने विद्यालयको योजना रहेको भण्डारीले सुनाए ।
विद्यालयमा हाल ३४ जना कर्मचारी कार्यरत छन् । विद्यालयले २ वटा स्कुल बस सञ्चालन गरेको छ ।
कस्तुरी इङ्लिस बोर्डिङ स्कुल
अभिभावक तथा विद्यार्थी को रोजाइमा पर्न सक्ने अर्का स्कुल हो– कस्तुरी इङ्लिस बोर्डिङ स्कुल । २०६२ सालबाट औपचारिक रूपमा थालनी भएको यस स्कुलमा सुरुवातमा १ सय ५० जना विद्यार्थी थिए ।
यस विद्यालयको ११ र १२ भने २०५५ सालबाट नै सुरु भइसकेको थियो । आवश्यकता महसुस गर्दै कक्षा ११ र १२ सँगै नर्सरीदेखि कक्षा १० सम्म पनि सुरु गरिएको प्रधानाध्यापक भूपेन्द्र न्यौपानेले जानकारी दिए ।
यस स्कुलमा हाल ४ सय ५० भन्दा धेरै विद्यार्थी छन् । अघिल्लो शैक्षिक सत्रमा २५ जना सहभागी रहेको एसईईमा यस वर्ष भने केही कम अर्थात् २२ जना विद्यार्थी सहभागी रहेको प्रधानाध्यापक न्यौपानेले जानकारी दिए ।
स्थापना कालदेखि नै उत्कृष्ट नतिजा निकाल्दै आएको यस स्कुलले नयाँ शैक्षिक वर्षमा पनि सोही नतिजालाई निरन्तरता दिने लक्षसहित आफ्ना पाठ्य पुस्तक तयार गरेको छ ।
शिक्षण सिकाइलाई प्रभावकारी बनाउन शिक्षक तथा शिक्षिकाहरूलाई नियमित आवश्यकता अनुसार विषयगत तालिम प्रदान गर्ने गरिएको छ । स्कुलले कोभिडको समयदेखि नै विद्यार्थी को अध्ययनलाई प्रभावकारी बनाउने उद्देश्यले बिहान ८ बजे देखि दिनको ४ बजेसम्म पठनपाठन गराइने गरिएको छ ।
बिहानको खाजा, खाना तथा दिनको खाजा समेत आवश्यकता अनुसार स्कुलमै व्यवस्थापन गर्ने गरिएको प्रधानाध्यापक न्यौपानेले जानकारी दिए ।
शिक्षण सिकाइका साथै अतिरिक्त क्रियाकलापमा पनि विद्यालयले उत्तिकै ध्यान दिएको छ । नृत्य, सङ्गीत, नाटक, चित्रकला, खेलकुद लगायतका विषयहरूलाई समेत प्राथमिकता दिने गरिएको प्रधानाध्यापक न्यौपानेको भनाइ छ ।
अतिरिक्त क्रियाकलाप अन्तर्गत कक्षा ५ सम्म सबै विद्यार्थी लाई सबै विषयमा अनिवार्य उपस्थित गराउने गरिएको छ भने कक्षा ५ भन्दा माथिका विद्यार्थीका लागि आवश्यकता र विद्यार्थीको चाहनाअनुसार सिक्न चाहेको विषय सिकाउने गरिएको छ । विद्यार्थी लाई घोकाउने प्रवृत्तिको अन्त्य गर्दै सिक्ने र सिकाउने प्रवृत्तिको विकास गर्ने लक्ष लिइएको छ ।
सीमित विद्यार्थी राखेर व्यक्तिगत आवश्यकताका आधारमा शिक्षण सिकाइ गरिँदै आएको छ । स्कुल समयपछि प्रत्येक विद्यार्थी लाई निःशुल्क कोचिङको व्यवस्था समेत गरिएको छ ।
नेपालको शिक्षा विकसित मुलुकको तुलनामा केही कमजोर रहेको कुरालाई मध्यनजर गर्दै भारतका दार्जिलिङ, सिक्किम, सिलिगुडी, कोलकाता, दिल्ली लगायतका सहरमा नेपाली विद्यार्थी पठाउने परिपाटीमा कमी ल्याउने उद्देश्यसहित सोही स्थानका पाठ्यक्रमहरुको आधारमा शिक्षण सिकाइ गर्ने गरिएको प्रधानाध्यापक न्यौपानेले जानकारी दिए ।
शुक्रवार पनि पुरै कक्षा सञ्चालन गर्ने गरिएको छ भने परीक्षा अवधिमा पनि परीक्षाभन्दा पहिले परीक्षा तयारी कक्षा सञ्चालन गर्ने गरिएको प्रधानाध्यापक न्यौपानेले जानकारी दिए ।
सेक्रेट हार्ट इङ्लिस बोर्डिङ स्कुल
इटहरीमा रहेर शिक्षण सिकाइलाई प्रभावकारी बनाउने विद्यालयहरु मध्येको अर्काे विद्यालय हो सेक्रेट हार्ट बोर्डिङ स्कुल । सेक्रेट हार्ट बोर्डिङ स्कुल २०५२ सालमा स्थापना भएको थियो ।
त्यस समयमा उक्त विद्यालयको प्रधानाध्यापक पुष्कर गुरागाईँ थिए । पछि २०६४ सालमा विद्यालयमा नयाँ व्यवस्थापन सहितको नयाँ टिम आएपछि विद्यालयको ब्यावस्थापन समितिको अध्यक्ष जीवप्रसाद गुरागाईँ रहँदै आएका छन् ।
नयाँ व्यवस्थापन आउँदै गर्दा विद्यालयमा करिब ४ सय ५० जना विद्यार्थी थिए भने हाल ७ सयन्दा धेरै विद्यार्थी रहेको अध्यक्ष गुरागाईँले जानकारी दिए ।
भरखरै सम्पन्न एसईईमा सेक्रेट हार्ट बोर्डिङ स्कुलबाट ५२ जना विद्यार्थी सामेल भएका थिए । यस विद्यालयले शैक्षिक गुणस्तरलाई ध्यान दिँदै तालिमप्राप्त शिक्षक शिक्षिकाहरूबाट पठन पाठन गराउँदै आएको छ ।
आवश्यकताका आधारमा शिक्षक शिक्षिकाहरूलाई समेत समय समयमा तालिमको व्यवस्था गर्ने गरेको छ । विद्यालयमा व्यवहारिक शिक्षालाई विशेष जोड दिएर पठन पाठन हुने गरेको अध्यक्ष गुरागाईँ बताउँछन् ।
विभिन्न विषयका छुट्टाछुट्टै प्रयोगशालाको व्यवस्था गरिएको छ भने सिक्ने र सिकाउने प्रवृत्तिको पठन पाठनलाई विशेष जोड दिने गरिएको छ ।
आधुनिक प्रविधिहरूको प्रयोगबाट शिक्षण सिकाइ गरिने भएका कारण पनि विद्यार्थी ले सकारात्मक नतिजा निकाल्न सफल रहेको विद्यालयका प्रधानाध्यापक डिककुमार तामाङ बताउँछन् ।
अतिरिक्त क्रियाकलापलाई पनि उत्तिकै जोड दिएर पठनपाठन गर्ने गरिएको छ भने विषय गत शिक्षकहरूको समेत व्यवस्था गरिएको छ । प्रत्येक वर्ष यसै विद्यालयले जिल्ला भरीका विद्यालयहरूलाई सहभागी गराएर भलिबल प्रतियोगिता आयोजना गर्ने गरेको छ ।
सेक्रेट हार्ट बोर्डिङ स्कुलबाट अध्ययन सकेर विभिन्न क्षेत्रमा रहेका पूर्व विद्यार्थीहरूले पनि विद्यालयको नाम राख्ने खालका कार्यमा सरिक हुँदै उदाहरणीय बनेर आफ्नो जीविकोपार्जन गरिरहेको प्रधानाध्यापक तामाङले जानकारी दिए ।
बेबी लोन इङ्लिस बोर्डिङ स्कुल
इटहरीमा रहेर अब्बल विद्यालयका रुपमा आफूलाई स्थापित गर्न सफल अर्को विद्यालय हो– बेबी लोन इङ्लिस बोर्डिङ स्कुल ।
२०६७ सालमा स्थापना भएको यस विद्यालयमा सुरुवातम ४ जना विद्यार्थी थिए । २०७१ सालमा प्रधानाध्यापकका रूपमा पुष्प अधिकारी विद्यालयमा आएपछि ६४ जना विद्यार्थी रहेकामा हाल ८ सयभन्दा धेरै विद्यार्थी अध्ययनरत रहेको फाउन्डर पुष्प अधिकारीले जानकारी दिए ।
अघिल्लो शैक्षिक सत्रमा ३४ जना विद्यार्थीलाई एसईईमा सहभागी गराएको यस विद्यालयले यस पटकको एसईईमा २९ जना विद्यार्थीलाई सहभागी गराएको छ ।
यस अघिका शैक्षिक वर्षहरूमा उत्कृष्ट नतिजा निकाल्दै आएको यस विद्यालयले आउने शैक्षिक वर्षमा पनि सोही नतिजालाई निरन्तरता दिने अपेक्षा राखेको छ ।
यस विद्यालयले अभिभावकको सहजताका लागि प्याकेजमा अवसर समेत ल्याउने तयारी गरेको फाउन्डर अधिकारीले जानकारी दिए ।
विद्यार्थीलाई नर्सरीमा भर्ना गर्दा अभिभावकले२ लाख ५० हजार देखि ३ लाख ५० हजार रुपैयाँ सम्म जम्मा गर्नुपर्ने र त्यस पछिका सम्पूर्ण आवश्यक खर्च विद्यालयले नै बेहोर्ने फाउन्डर अधिकारीको भनाइ छ ।
त्यसपछि विद्यार्थीले कक्षा १२ सम्मै निःशुल्क अध्ययन गर्न पाउने र विद्यार्थीले कक्षा १२ समाप्त गर्दैगर्दा अभिभावकले भर्ना गर्दा बुझाएको १२ लाख रुपैयाँ जस्ताको त्यस्तै फिर्ता पाउने अधिकारीले जानकारी दिए ।
शिक्षण सिकाइसँगै अतिरिक्त क्रियाकलापमा पनि उत्कृष्ट नतिजा निकाल्न सफल रहेको अधिकारी बताउँछन् । आफ्नो विद्यालयबाट अध्ययन सकेर बिदा हुँदै गर्दा विभिन्न विश्वविद्यालयहरूमा समेत उत्कृष्ट नतिजा हासिल गर्न सफल भएका प्रशस्तै उदाहरणहरू रहेको फाउन्डर अधिकारीले जानकारी दिए ।
झन्डै ६३ जना कर्मचारी रहेको यस विद्यालयले विद्यार्थीको सहजताका लागि ६ वटा स्कुल बस सञ्चलन गरेको छ ।
पूर्वाञ्चल इङ्लिस बोर्डिङ स्कुल
इटहरी उपमहानगरपालिका वडा नम्बर २० मा रहेको उत्कृष्ट संस्थागत विद्यालय हो– पूर्वाञ्चल इङ्लिस बोर्डिङ स्कुल । २०५१ सालमा ५ कक्षा सम्मको अनुमति लिएर स्थापना भएको यस विद्यालयमा हाल कक्षा १२ सम्म अध्यापन हुँदै आएको छ ।
वार्षिक उत्कृष्ट नतिजा निकाल्न सफल विद्यालयमा हाल ८ सय ५० भन्दा धेरै विद्यार्थी अध्ययनरत रहेको विद्यालयका प्रधानाध्यापक सौधन राईले जानकारी दिए ।
अघिल्लो शैक्षिक सत्रमा ५३ जना विद्यार्थीले एसईई दिएकामा सबैको नतिजा उत्कृष्ट आएको र यस वर्ष पनि ५३ जना नै रहेको बताउँदै पुरानै नतिजाले निरन्तरता प्राप्त गर्नेमा आशावादी रहेको प्रधानाध्यापक राईले बताए ।
शैक्षिक गुणस्तर उत्कृष्ट भएका कारण पनि विद्यालयले उत्कृष्ट नतिजा निकाल्न सफल भएको उनको बुझाइ छ । विद्यार्थीहरूको चौतर्फी व्यक्तित्व विकासलाई पनि विद्यालयले ध्यान दिने गरेको गरेको छ ।
शिक्षण सिकाइसँगै अतिरिक्त क्रियाकलापहरूमा पनि उत्कृष्ट नतिजा निकाल्न सफल भएको छ । नृत्य, गायन, खेलकुद लगायतका विभिन्न विषयमा विषयगत शिक्षक राखेर दैनिक अध्ययन अध्यापन हुँदै आएको छ ।
हरेक शुक्रवार अध्ययन समापनपछि अतिरिक्त क्रियाकलाप पनि हुने भएको हुँदा शुक्रवार पनि पूर्णरुपमा अन्य बारहरू जस्तै विद्यालय लाग्ने प्रधानाध्यापक राईले जानकारी दिए ।
प्रविधिको प्रयोगबाट अध्ययन गराउनका साथै विद्यार्थीहरूलाई प्रविधिमैत्री बन्न सिकाउने शिक्षण प्रणालीको विकास गर्दै जाने योजना विद्यालयले बनाएको छ ।
प्रत्येक कक्षा कोठामा प्रोजेक्टर लगायतका आधुनिक प्रविधिहरू जडान गरिएको उल्लेख गर्दै प्रधानाध्यापक राईले आउने शैक्षिक वर्ष प्रोजेक्टर लगायतका केही शिक्षण सामाग्री थप गर्ने योजना रहेको सुनाए ।
विद्यालयमा शिक्षक शिक्षिकासहित ५२ जना कर्मचारी छन् भने ३ वटा स्कुल बस सञ्चालनमा रहेको प्रधानाध्यापक राईले जानकारी दिए ।
ब्राइट फ्युचर इङ्लिस बोर्डिङ स्कुल
इटहरी उपमहानगरपालिका वडा नम्बर २ मा अवस्थित संस्थागत विद्यालयहरू मध्यको एक हो– ब्राइट फ्युचर बोर्डिङ स्कुल ।
इटहरीको आँपगाछी चोकबाट केही पूर्वमा रहेको यस विद्यालयले विगतदेखि नै उत्कृष्ट नतिजा सहितको शिक्षण सिकाइ गर्दै आएको छ ।
२०५१ सालमा स्थापना भएको यस विद्यालयले बढ्दो प्रविधिहरूको विषयलाई मध्यनजर गर्दै सोही प्रकृतिको शिक्षा प्रदान गर्दै आएको छ । युकेजीसम्म अध्यापन गराउने गरी स्थापना भएको यस विद्यालयमा स्थापना कालमा करिब ४० जना विद्यार्थी लाई साथमा लिएर स्थापना भएको थियो । त्यसयता अनुमति प्राप्त गर्दै स्तरोन्नति गर्दै विद्यालयले कक्षा १० सम्मको अध्यापन गराउँदै आएको छ ।
हाल ब्राइट फ्युचर बोर्डिङ स्कुलमा ६ सयभन्दा धेरै विद्यार्थी अध्ययनरत रहेको विद्यालयका प्रधानाध्यापक श्याम राईले जानकारी दिए ।
भरखरै सम्पन्न एसईईमा यस विद्यालयबाट ४३ जना विद्यार्थी सहभागी भएका थिए । अघिल्ला वर्षहरूमा उत्कृष्ट नतिजा निकाल्दै आएका कारण पनि यस वर्ष समेत उत्कृष्ट नतिजालाई निरन्तरता दिनेमा विद्यालय विश्वस्त देखिएको छ ।
अध्ययन अध्यापनसँगै अतिरिक्त क्रियाकलापमा पनि उत्तिकै जोड दिने गरेको यस विद्यालयले विभिन्न समयमा प्याप्सन, नगर, जिल्ला स्तरका विभिन्न प्रतियोगिताहरूमा उत्कृष्ट नतिजा निकाल्न सफल हुँदै आएको छ ।
विद्यालयमा शिक्षक शिक्षिकासहित ३६ जना कर्मचारी छन् । विद्यालयले एउटा स्कुल बस समेत सञ्चालन गर्दै आएको छ ।
गोक्यो इन्टरनेश्नल इङ्लिस बोर्डिङ स्कुल
उत्कृष्ट विद्यालयको सूचिमा पर्नेमा गोक्यो इन्टरनेश्नल इङ्लिस बोर्डिङ स्कुल पनि एक हो । इटहरी उपमहानगरपालिका वडा नम्बर ३ मा अवस्थित यस स्कुलमा हाल ३ सय ५० भन्दा धेरै विद्यार्थी अध्ययनरत छन् ।
२०६२ सालमा तालतलैया एकेडेमी नामबाट स्थापना भएको यो स्कुल २०७८ सालमा नयाँ व्यवस्थापनसहित स्कुलको नाम पनि परिवर्तन गर्दै गोक्यो इन्टरनेश्नल इङ्लिस बोर्डिङ स्कुल राखिएको स्कुलका फाउन्डर सुनील अधिकारीले जानकारी दिए ।
नयाँ व्यवस्थापनको आगमनसँगै विद्यालयमा भौतिक संरचना तथा शिक्षण सिकाइमा समेत स्तरोन्नति गर्दै छोटो समयमा उत्कृष्ट नतिजा हासिल गर्न सफल भएको अधिकारीले जानकारी दिए । जम्मा ५ जना विद्यार्थीलाई साथमा लिएर विद्यालय स्थापना गरिएको अधिकारीले जानकारी दिए ।
नयाँ शैक्षिक सत्रबाट विद्यालयमा भएका विभिन्न प्रविधिहरूको स्तरोन्नति गर्दै आउने वर्षमा उदाहरणीय नतिजा निकाल्ने लक्षसहित स्कुलले शिक्षण सिकाइ गर्ने योजना बनाइरहेको अधिकारीको भनाई थियो ।
यस स्कुलबाट यस वर्षको एसईईमा ८ जना विद्यार्थी सहभागी रहेको अधिकारीले जानकारी दिए । आउने शैक्षिक वर्षबाट व्यावहारिक शिक्षालाई जोड दिँदै शिक्षण सिकाइलाई प्रभावकारी बनाउने योजनामा विद्यालय प्रशासन रहेको अधिकारीको भनाई छ ।
विद्यालयमा लिइएको शिक्षा राष्ट्रिय स्तरमा मात्र नभएर अन्तर्राष्ट्रिय स्तरसम्म पनि मान्य हुने सीपमूलक हुन आवश्यक रहेकोले नाम अनुसारकै शिक्षालाई जोड दिइएको अधिकारीको भनाई छ । आउने शैक्षिक सत्रबाट कक्षा १२ सम्म सञ्चालन गर्ने योजना स्कुलले बनाएको छ ।
ग्रिन पिस एकेडेमी
इटहरीका उत्कृष्ट संस्थागत विद्यालयहरू मध्यको अर्को विद्यालय हो ग्रिन पिस एकेडेमी । यो विद्यालयको स्थापना २०५६ सालमा भएको थियो । २०७० सलमा नयाँ व्यवस्थापन आएसँगै विद्यालयले उत्कृष्ट नतिजा निकाल्न सफल भएको छ ।
२०७० सालमा नयाँ व्यवस्थापन आउँदा यस विद्यालयमा २ सय ५० जना विद्यार्थी अध्ययनरत रहेकामा हाल ९ सयभन्दा धेरै विद्यार्थी छन् । भरखरै सम्पन्न एसईईमा ग्रिन पिस एकेडेमीबाट ५६ जना विद्यार्थी सहभागी रहेको विद्यालयका ब्यावस्थापन समितिका अध्यक्ष केशब खड्काले जानकारी दिए ।
यस अघिका वर्षहरूमा पनि उत्कृष्ट नतिजा ल्याउन सफल भएका कारण यस वर्षको एसईईमा पनि उत्कृष्ट नतिजा ल्याउने कुरामा विद्यालय प्रशासन आशावादी देखिएको छ । विद्यार्थीको मनोविज्ञान अध्ययन गरेर बन्धुत्वको भावनाका साथ अध्ययन अध्यापन गराइने भएका कारण पनि यस विद्यालयमा विद्यार्थीको राम्रो उपस्थिति देखिएको छ ।
व्यावहारिक ज्ञानलाई विशेष जोड दिएर अध्ययन अध्यापन गराइने गरेको अध्यक्ष खड्का बताउँछन् । विभिन्न समयमा शिक्षक शिक्षिका तथा विद्यार्थीलाई समेत आवश्यकता अनुसारको तालिममा सहभागी गराउने गरिएको छ । अतिरिक्त क्रियाकलापमा पनि उत्कृष्ट नतिजा निकाल्न सफल यस विद्यालयले विषयगत छुट्टाछुट्टै विषयका शिक्षक शिक्षिकाहरूको व्यवस्था गरेको छ ।
समय समय हुने विभिन्न प्रतियोगिताहरूमा यस विद्यालयका विद्यार्थीले उत्कृष्ट नतिजा निकाल्न सफल भएका छन् । विद्यालय हाल भाडामा रहेको उल्लेख गर्दै आउने वर्षमा आफ्नै भवन निर्माण गर्ने योजना बनाएको खड्काले बताए ।
समयानुकूल शिक्षा, प्रविधिहरूको प्रयोग गर्दै प्रभावकारी शिक्षण सिकाइ गर्नु नै विद्यालयको मुख्य उद्देश्य रहने अध्यक्ष खड्काले जानकारी दिए ।
पशुपति इङ्लिस बोर्डिङ स्कुल
इटहरीका उत्कृष्ट संस्थागत विद्यालयहरूको सूचीमा नछुट्ने नाम हो– पशुपति बोर्डिङ स्कुल । आधुनिक प्रविधिको प्रयोगबाट उत्कृष्ट पठन पाठन गर्दै आएको पशुपति बोर्डिङ स्कुलको स्थापना २०५२ सालमा भएको थियो ।
स्थापनापछि २७औँ वसन्त पार गर्दै गर्दा विद्यालयले धेरै विद्यार्थी उत्पादन गर्दै अनुकरणीय जीवनशैली बिताउने वातावरण सिर्जना गरिदिएको छ ।
२७ जना विद्यार्थीबाट सुरु भएको यस विद्यालयमा हाल कक्षा १० सम्मका विद्यार्थी को गणना गर्ने हो भने ७ सयभन्दा धेरै अध्ययनरत रहेका छन् ।
सुरुवातदेखि नै एसईईमा उत्कृष्ट नतिजा निकाल्न सफल यस विद्यालयमा अघिल्लो वर्ष ५२ जना विद्यार्थीले एसईई दिएकामा उत्कृष्ट नतिजा निकाल्न सफल भएको थियो । यस पटकको एसईईमा ४८ जना विद्यार्थी सहभागी रहेको विद्यालयका प्रधानाध्यापक सुमित थापाले जानकारी दिए ।
आधुनिक प्रविधिको प्रयोगबाट गुणात्मक शिक्षा दिँदै आएको यस विद्यालयले सुविधासम्पन्न आफ्नै भवनमा शिक्षण सिकाइ गर्दै आएको छ । व्यावहारिक शिक्षामा जोड दिँदै सिक्ने र सिकाउने प्रक्रियामा रहेर पठनपाठन गर्दै आएको विद्यालयका प्रधानाध्यापक थापाले जानकारी दिए । विभिन्न समयमा विद्यार्थी तथा शिक्षकहरूलाई आवश्यकता अनुसारको तालिम प्रदान गर्दै आएको छ ।
अतिरिक्त क्रियाकलापमा पनि विद्यालयले उत्कृष्ट नतिजा निकाल्ने गरेको छ । नगर तथा जिल्ला स्तरबाट आयोजना हुने विभिन्न प्रतियोगिताहरूमा भाग लिएको विद्यालयले धेरैजसो प्रतियोगिताहरूमा उत्कृष्ट नतिजा निकाल्न सफल भएको छ ।
खेलकुद, गायन, नृत्य तथा अन्य विविध अतिरिक्त क्रियाकलापका लागि विषयगत शिक्षकहरूको व्यवस्था गरिएका कारण पनि विद्यार्थीको चाहाना बमोजिम सिकाइ हुँदै आएको प्रधानाध्यापक थापा बताउँछन् ।
सीप र संस्कारयुक्त शिक्षा प्रदान गर्नुपर्छ भन्ने मान्यताका साथ शिक्षण सिकाइ गर्दै आएको यस विद्यालयमा शिक्षक शिक्षिकासहित ५० जना कर्मचारी रहेको प्रधानाध्यापक थापाले जानकारी दिए ।
लिटल फ्लावर्स इङ्लिस बोर्डिङ स्कुल
इटहरीका सफल संस्थागत विद्यालयहरूमा लिटल फ्लावर्स बोर्डिङ पनि एक हो । इटहरी उपमहानगरपालिका वडा नम्बर ५ मा रहेको यो विद्यालय २०५५ सालमा स्थापना भएको थियो ।
स्थापनाको २४ वर्षमा हिँड्दै गर्दा विद्यालयले उत्कृष्ट शिक्षण सिकाइ गर्न सफल भएको छ । उत्पादन पनि उत्साहजनक देखिएको छ । ६० जना विद्यार्थीलाई साथमा लिएर स्थापना भएको लिटल फ्लावर्स बोर्डिङ स्कुलमा हाल ९ सयभन्दा धेरै विद्यार्थी छन् ।
यस विद्यालयबाट अघिल्लो शैक्षिक वर्षमा ४४ जना विद्यार्थी एसर्इर्इ परीक्षामा सामेल भएका थिए । यस वर्षको एसर्इर्इमा ४३ जना विद्यार्थी सहभागी रहेको प्रधानाध्यापक राजकुमार सापकोटाले जानकारी दिए ।
अध्ययन र विद्यार्थीको सिकाइ उपलब्धिलाई मुख्य आधार बनाएर पठन पाठन हुने यस विद्यालयले उत्कृष्ट नतिजा निकाल्दै आएको छ । लिटल फ्लावर बोर्डिङ स्कुलबाट एसर्इर्इ दिएर अन्यत्र अध्ययनका लागि गएका धेरै विद्यार्थीले राम्रो सफलता हासिल गरेका छन् ।
अघिल्लो वर्ष विश्व आदर्श कलेजबाट कलेज टप गर्न सफल एलिसा कार्की, यसै वर्षमा पनि विश्व आदर्श कलेजले लिएको प्रवेश परीक्षामा एक नम्बरमा नाम निकाल्न सफल अनुस्का खतिवडा लिटल फ्लावर्स बोर्डिङ स्कुलकै उत्पादन रहेको प्रधानाध्यापक सापकोटाको भनाई छ ।
अतिरिक्त क्रियाकलापमा पनि विद्यालयले उत्कृष्ट नतिजा निकाल्न सफल भएको छ । प्याप्सन, नगर तथा जिल्ला स्तरबाट आयोजना हुने विभिन्न खेल प्रतियोगिता, तथा अन्य विविध अतिरिक्त क्रियाकलापहरूमा पनि विद्यालयले उत्कृष्ट नतिजा निकाल्न सफल भएको छ ।
आउने शैक्षिक वर्षलाई मध्यनजर गर्दै आधुनिक प्रविधिको प्रयोगबाट पठनपाठन गराउनाका साथै काठमाडौँ युनिर्भसीटीसँगको सहकार्यमा शिक्षक तथा शिक्षिकाहरूलाई विभिन्न विषयका विषयगत तालिम प्रदान गर्ने तयारी गरिएको छ ।
यसै वर्षबाट विद्यालयलाई पूर्ण रुपमा प्रविधियुक्त बनाउने तयारी गरिएको छ । सोही अनुसार प्रि प्राइमरीका कक्षाहरूमा पाठ्यपुस्तकको प्रयोगलाई अन्त्य गरिएको छ भने यसलाई निरन्तरता दिँदै अन्य ठूला कक्षाहरूमा पनि पाठ्यपुस्तक प्रयोगमा न्यूनीकरण गर्दै डिजिटल प्रविधिको प्रयोगमा अघि बढ्ने जाने तयारी गरिएको छ ।
विद्यालयमा नै स्टाफ नर्सको व्यवस्था गर्ने र विद्यार्थीका साथै अभिभावकको समेत स्वास्थ्य जाँच गर्ने तयारी गरिएको प्रधानाध्यापक सापकोटाले जानकारी दिए ।
शब्द/मनोज दाहाल
Discussion about this post