काठमाडौंः भारतीय प्रधानमन्त्री नरेन्द्र मोदीको सपथ ग्रहण समारोहमा नेपाली प्रतिष्ठित उद्योगपति विनोद चौधरीलाई निमन्त्रणा आएको छ । तेस्रो कार्यकालका लागि प्रधानमन्त्री बनेका मोदीको आइतबार सपथ ग्रहण हुँदैछ ।
नेपालबाट प्रधानमन्त्री पुष्पकमल दाहाल प्रचण्ड सहभागी भएका छन् भने उद्योगपति एवं सांसद चौधरीलाई पनि सपथ ग्रहण समारोहमा सहभागीताका लागि निम्तो आएको हो । यसअघि सन् २०१४ र सन् २०१९ मा प्रधानमन्त्री बनेका मोदीले चौधरीलाई निम्तो पठाएका थिए । गुजरातको मुख्यमन्त्री हुदाँदेखि नै मोदी र चौधरीबीच सुमधुर सम्बन्ध रहँदै आएको छ ।
उद्योगपति चौधरीको भारतीय प्रधानमन्त्री मोदीसहित भारतका उच्च तहका नेताहरुसँग घनिष्ठ सम्बन्ध रहेको छ भने दक्षिण एसियाली मुलुकका साथै विश्वका अन्य देशका उच्च अधिकारीहरुसँग चौधरीको सम्बन्ध रहेको छ ।
मोदीको सपथ ग्रहण कार्यक्रममा दक्षिण एसियाली मुलुक पाकिस्तान र अफगानिस्तानबाहेक अन्य मुलुकबाट सरकार प्रमुख सहभागी भएका छन् ।
अघिल्लो वर्ष फिलिपिन्सका राष्ट्रपति बोङबोङ मार्कोसको सपथग्रहण समारोहमा नेपाली कांग्रेसका केन्द्रीय सदस्य एवं प्रतिनिधिसभा सदस्य चौधरी सहभागी भएका थिए । उक्त सपथ ग्रहण समारोहमा दक्षिण एसियाबाटै चौधरी मात्रै सहभागी थिए ।
Discussion about this post