इटहरी : बसको सिट क्षमताभन्दा बढी विद्यार्थी बोक्ने विद्यालयको बस चालकलाई इटहरी उपमहानगरले निगरानी बढाएको छ ।
केही दिनयता उपमहानगरका मेयर हेमकर्ण पौडेल, इलाका प्रहरी कार्यालय इटहरीका प्रहरी नायब उपरीक्षक लक्ष्मी भण्डारी, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीका प्रहरी नायब उपरीक्षक रामेश्वर त्वातीसहित सुरक्षाकर्मी र स्थानीय जनप्रतिनिधिहरूले बस चालकलाई निगरानी बढाएका हुन् ।
इटहरी आसपास गुड्ने विद्यालयका बस चालकहरूमाथि निगरानी बढाएपनि निजी विद्यालय सञ्चालकहरू भने अटेर गर्दै आएका छन् ।
बसमा सिट क्षमताभन्दा बढी विद्यार्थी नबोक्न पटकपटक ताकेता गरेपनि विद्यालय सञ्चालकले भने अटेर गर्दै आएका हुन् ।
मेयर पौडेलले सिट क्षमताभन्दा बढी विद्यार्थी बोक्ने स्कुल बस चालकसहित विद्यालयका सञ्चालकलाई कारबाही गर्ने बताए । विद्यार्थीको जीवनमाथि नै खेलवाड गरिरहेको भन्दै विद्यालय सञ्चालकलाई सचेत गराइएपनि अटेर गरेपछि कारबाही नै गरिने उनले बताए ।
‘यो काम नितान्त विद्यार्थीहरूको हितमा छ,’ उनले भने, ‘तर कतिपय सञ्चालकले भने बुझ्दैनन् । जसले बसमा सिट क्षमताभन्दा बढी विद्यार्थी कोच्छ, उसलाई कारबाही हुन्छ ।’
नाबालक विद्यार्थीहरूको जीवन र भविष्यमाथि नै चरम लापरबाही गरी सिटमा भन्दा उभ्याएर नै बसमा यात्रा गराएको कारण निगरानी बढाइएको उनले बताए ।
नियम विपरीत स्कुल बसमा आवश्यकताभन्दा बढी विद्यार्थी बोक्ने विद्यालयका प्रधानाध्यापकहरूलाईसमेत विद्यार्थीहरूको सुरक्षामा लापरबाही नगर्न र उनीहरूको सुरक्षामा उच्च सतर्कता अपनाउन सचेत गराइएको मेयर पौडेलको भनाइ छ ।
खासगरी इटहरीमा निजी विद्यालय सञ्चालकले पटकपटक उपमहानगरको निर्णयलाई लत्याउँदै आएका छन् । यसअघि उपमहानगरले स्कुलको पोसाकमा एकरूपता ल्याउने निर्णय गरेपनि उक्त निर्णयविरूद्व निजी सञ्चालकहरू उभिएका थिए ।
त्यससँगै पटकपटक उपमहानगरको निर्णयको बेवास्ता गर्दै आएका निजी विद्यालय सञ्चालकलाई उपमहानगरले कानुनअनुसार बसमा सिट क्षमताभन्दा बढी विद्यार्थी नबोक्नका निम्ति नियमन गर्न आवश्यक देखिएको जानकारहरू बताउँछन् ।
यी हुन् सिट क्षमताभन्दा बढी विद्यार्थी बोक्ने विद्यालय
उपमहागनगरले मंगलबार गरेको अनुगमनका क्रममा विभिन्न १५ वटा विद्यालयले सिट क्षमताभन्दा बढी विद्यार्थी बोकेको पाइएको छ ।
उपमहानगरका अनुसार पशुपति सेकेण्डरी बोर्डिङ स्कुल, नोबेल एकेडेमी, हाम्रो इङ्लिस बोर्डिङ स्कुल, अक्सब्रिज मन्टेश्वरी स्कुल, कोसी सेन्ट जेम्स, सगरमाथा कलेज, जनता मावि, जयन्ती विद्यावासिनी विद्या सदन, पिसजोन स्कुल (मन्टेश्वरी), एसओएस बालग्राम, एडुटेक कलेज, रामधुनी सेकेण्डरी इङ्लिस बोर्डिङ, सनराइज इङ्लिस बोर्डिङ र मिनील्याण्ड इङ्लिस स्कुलले सिट क्षमताभन्दा बढी विद्यार्थी बोकेका थिए ।
यी विद्यालयका बस चालकलाई ट्राफिक प्रहरीसहितले सचेत गराएका थिए भने विद्यालयमासमेत सम्पर्क गरी सिट क्षमताभन्दा बढी विद्यार्थी नबोक्न निर्देशन दिइएको थियो । यद्यपि, यीसहित अन्य निजी र सरकारी विद्यालयहरूले उपमहानगरको आदेशको अवज्ञा गर्दै आएका छन् ।
यो पनि – इटहरीमा सिट क्षमताभन्दा बढी विद्यार्थी बोक्ने बस चालक कारबाहीमा
Discussion about this post