इटहरी : इटहरी १४ स्थित श्री शान्ति सिर्जना माध्यमिक विद्यालयका प्रधानाध्यापक कमल तिम्सिनाले उपमहानगरबाट गएको ८० लाख रुपैयाँ घोटाला गरेसँगै कागजपत्र ‘जफत’ गरिएको छ ।
इटहरी उपमहानगरपालिकाले गठन गरेको छानबिन समितिले सोमबार विद्यालयबाट त्यहाँ रहेका कागजपत्र ‘जफत’ गरेको हो । छानबिनका लागि विद्यालयको बिल, भौचर, चेक र माइन्युट ‘जफत’ गरिएको छानबिन समितिले जनाएको छ ।
अहिले छानबिन भइरहेका कारण धेरै कुरा बाहिर ल्याउन नमिल्ने र छानबिनपश्चात साउन मसान्तभित्र प्रतिवेदन बुझाइने समितिको भनाइ छ ।
प्रअ तिम्सिनाले उपमहानगरबाट गएको ८० लाख रुपैयाँ ‘घोटाला’ गरेको समाचार बाहिरिएसँगै अहिले छानबिन भइरहेको छ ।
आर्थिक वर्ष ०७९।८० मा शिक्षकको तलव शीर्षकको बजेटमा उपमहानगरले श्री शान्ति सिर्जना माध्यमिक विद्यालयलाई सात लाख ३६ हजार ६६३ रुपैयाँ उपलब्ध गराउनुपर्ने थियो । तर, उपमहानगरका कर्मचारीको लापरबाहीका कारण विद्यालयको खातामा ८८ लाख २४ हजार २४३ रुपैयाँ भुक्तानी भयो ।
उक्त रकम भुक्तानी भएको करिब दुई वर्ष (२२ महिना)सम्म प्रअ तिम्सिनाले उपमहानगरमा कुनै जानकारी गराएनन् । तर, आन्तरिक लेखा परीक्षणमा भने उक्त रकम बढी गएको देखिएपछि घटना बाहिरिएको थियो ।
घटना बाहिरिएपनि सामसुम पार्ने प्रयास गरिएको थियो । तर, समाचार बाहिरिएपछि भने विद्यालय व्यवस्थापन समितिलाई यसबारे थाहा भएको बताइन्छ ।
विद्यालय व्यवस्थापन समितिका अध्यक्ष रम्तुल मियाँका अनुसार अब बुधबार व्यवस्थापन समिति, शिक्षक, अभिभावक, सल्लाहकार र सरोकारवाला निकायसँग बैठक राखिएको छ ।
‘हेडसरले अहिलेसम्म त्यो रकम कहाँ, के गरेको भन्नेबारे हामीलाई केही पनि जानकारी छैन,’ उनले प्रदेशखबरसँग भने, ‘अब भोलि (बुधबार) बैठक बस्दैछौँ । बैठकमा निर्णय गरेर हेडसरमाथि कारबाही गरीपाउँ भनेर उपमहानगरपालिकामा पत्र बुझाउँछौं ।’
उनले सोमबार भने उपमहानगरको छानबिन समितिले नै प्रअ तिम्सिनालाई विद्यालयमा लिएर आएकोसमेत बताए । मियाँले भने, ‘सरलाई छानबिन समितिले नै लिएर आएको थियो । सबै कागजपत्र लगेको छ, निष्पक्ष छानबिन होस् र दोषीमाथि कारबाही होस् भन्ने हाम्रो माग हो ।’
विद्यालयका प्रअ तिम्सिनाले विद्यालयमा थाहै नदिईकन हालसम्म उक्त रकम अपचनलको घटना निष्पक्ष रूपमा छानबिन हुनुपर्ने उनले बताए ।
यसअघि गत शनिबार स्थानीय अभिभावक, विद्यालय व्यवस्थापन समितिसहित बसेको बैठकमा प्रअ तिम्सिना आँफूले नै ८० लाख रुपैयाँ चलाएको स्वीकार गरेका थिए । उनले आँफूबाट गल्ती भएको स्वीकार गर्दै बचाइदिनसमेत आग्रह गरे ।
‘म बाट गल्ती भयो, मेरो पद र जागिर जोगाइदिनुहोस्’ भन्दै उनले बैठकमा हारगुहार गरेका थिए ।
‘यहाँहरूको गोडा छोएर भन्न चाहन्छु कि, यहाँहरूले मलाई क्षमा याचना दिनुहुनेछ,’ उनले बैठकमा भनेका थिए, ‘अरू निर्णय केही नगरिदिनुहोस्, नगरबाट पनि छानबिन समिति बनेको छ ।’
केही महिनाअघि मात्रै आन्तरिक लेखा परीक्षणको कार्यालयले सो रकम बढी गएको देखाएपछि उपमहानगरले थाहा पाएको थियो । सोहीअनुसार उपमहानगरले असार २७ र साउन १ गते विद्यालयलाई रकम फिर्ता गर्न पत्र काटेको थियो ।
विद्यालयलाई पत्र काटेपनि विद्यालयमा प्रअ तिम्सिना बाहेक अरू कसैलाई थाहा भएन । तर, समाचार बाहिरिएपछि भने विद्यालय व्यवस्थापन समिति र त्यहाँका शिक्षक, कर्मचारीलाई थाहा भएको बताइएको छ ।
अहिले इटहरी उपमहानगरपालिकाले लेखा अधिकृत लखन चौधरीको संयोजकत्वमा प्रशासन अधिकृत सञ्जीव खड्का र कानुन अधिकृत कमलराज पोखरेल सदस्य रहनेगरी छानबिन बनाएसँगै उक्त कमिटिले काम गरिरहेको छ ।
साउन मसान्तभित्रमा छानबिन सकेर प्रतिवेदन बुझाउनेगरी काम भइरहेको बताइएको छ । सत्ता र शक्तिको आडमा रमाउने प्रअ तिम्सिनाको फट्याइँमाथि निष्पक्ष छानबिन हुनुपर्ने स्वयम् विद्यालय व्यवस्थापन समितिलेसमेत बताउँदै आएको छ ।
तिम्सिना एकीकृत समाजवादी निकट प्रगतिशील राष्ट्रिय शिक्षक संगठनमा आवद्ध छन् । सोही संगठनबाट प्रतिनिधित्व गर्दै उनी नेपाल शिक्षक महासंघको सदस्यसमेत छन् । शिक्षकको नेता भनेर चिनिने उनी पार्टीको आडमा शक्ति प्रदर्शनसमेत गर्न रुचाउने गरेको स्रोतले जनाएको छ ।
यो पनि – सम्पादकीय : राज्यको पैसा ‘घोटाला’ गर्ने प्रधानाध्यापकमाथि निष्पक्ष छानबिन गर
Discussion about this post