इटहरी : इटहरी १४ स्थित श्री शान्ति सिर्जना माध्यमिक विद्यालयका प्रधानाध्यापक कमल तिम्सिनाले उपमहानगरबाट गएको बढी रकम फिर्ता गरेका छन् । बढी रकम गएपछि प्रअ तिम्सिनाले उक्त रकम घोटाला गरेको प्रमाणसहित पहिलोपटक प्रदेश खबरले समाचार सार्वजनिक गरेको थियो ।
समाचार सार्वजनिक भएसँगै उपमहानगरले छानबिन समिति बनाएको थियो । निरन्तर समाचार फलोअप र उपमहानगरको दबाबपछि अन्ततः प्रअ तिम्सिनाले रकम फिर्ता गरेका हुन् ।
समाचार सार्वजनिक भएसँगै उनले स्थानीय अभिभावक, विद्यालय व्यवस्थापन समितिसँग भने आफूबाट गल्ती भएको स्वीकार गर्दै बचाइदिनसमेत आग्रह गरेका थिए । ‘म बाट गल्ती भयो, मेरो पद र जागिर जोगाइदिनुहोस्’ भन्दै उनले हारगुहार गरेका थिए ।
आर्थिक वर्ष ०७९।८० मा शिक्षकको तलव शीर्षकको बजेटमा उपमहानगरले श्री शान्ति सिर्जना माध्यमिक विद्यालयलाई ८ लाख ७३ हजार ६८३ रुपैयाँ रकम जानुपर्ने भएपनि ७८ लाख ६३ हजार बढी गएको प्रमुख प्रशासकीय अधिकृत रामचरित्र मेहताले बताए । उनका अनुसार ८,७३,६८३ रुपैयाँ जानुपर्ने रकम ट्रान्सफरको क्रममा एउटा ६ बढी थिचिएका कारण गएको थियो ।
‘यो रकमलाई कसैले खाएर अपचलन गर्छु भनेर नसोचेपनि हुन्छ,’ प्रमुख प्रशासकीय अधिकृत मेहताले यसअघि भनेका थिए, ‘१० प्रतिशत हर्जनासहित रकम फिर्ता गरिन्छ । त्यसबेला यहाँको लेखा शाखाबाट पनि संवेदनशील रूपमा हेरिएन, विद्यालयबाट पनि हामीलाई जानकारी भएन ।’
उक्त रकम भुक्तानी भएको करिब दुई वर्ष ९२२ महिना०सम्म प्रअ तिम्सिनाले उपमहानगरमा कुनै जानकारी गराएका थिएनन् । तर, आन्तरिक लेखा परीक्षणबाट भने सो रकम बढी गएको खुलेपछि भने घटना सामसुम बनाउने प्रयास गरिएको थियो । तर, समाचार बाहिरिएसँगै भने प्रअ तिम्सिना छटपटीमा परेका थिए ।
इटहरी उपमहानगरले लेखा अधिकृत लखन चौधरीको संयोजकत्वमा प्रशासन अधिकृत सञ्जीव खड्का र कानुन अधिकृत कमलराज पोखरेल सदस्य रहनेगरी छानबिन समिति बनाएको थियो ।
छानबिन समितिको म्याद आज (शुक्रबार)सम्म छ । साउन मसान्तभित्र छानबिन समितिले प्रतिवेदन बुझाउनुपर्ने तयारी थियो । उता, प्रअ तिम्सिनाले भने बुधबार (साउन ३०) गतेसम्म भने रकम फिर्ता गरेका छन् । उनले १० प्रतिशतका दरले हर्जना बुझाउनुपर्ने र कूल १२ लाख हर्जनामध्ये सात लाख भने बुझाएको उपमहानगर स्रोतले जनाएको छ ।
उपमहानगरका अनुसार प्रअ तिम्सिनाले साउन ७ र साउन १४ को मितिमा सात–सात लाख रकम फिर्ता गरेका छन् । यसैगरी साउन ३० को मितिमा ६४ लाख ६५ हजार र साउन ३० कै मितिमा सात लाख ८६ हजार तीन सय रकम उपमहानगरलाई फिर्ता गरेका छन् ।
यसरी हेर्दा हालसम्म प्रअ तिम्सिनाले ८६ लाख ५१ हजार तीन सय रकम फिर्ता गरेको देखिन्छ । उनले अब करिब सात लाख रुपैयाँ हर्जनाबापत उपमहानगरलाई बुझाउन बाँकी रहेको उपमहानगरले जनाएको छ ।
‘प्रअले सबै रकमबारे स्वीकार गरेको र विद्यालयमासमेत खर्च गरेको बताएका थिए । तर, पैसा फिर्ता गर्नैपर्ने भएपछि परिवारसहित आएर बुझाएका छन्,’ उपमहानगर स्रोत भन्छ, ‘अब छानबिन समितिको प्रतिवेदन सार्वजनिक भएपछि कारबाही हुन्छ कि, के गर्ने भन्नेबारे खुल्छ ।’
हाल इटहरी उपमहानगरपालिकाका प्रमुख प्रशासकीय अधिकृत रामचरित्र मेहता विदामा छन् । शुक्रबारसम्म प्रतिवेदन बुझाउनुपर्ने भएपनि मेहता आएपछि प्रतिवेदन बुझाइने बताइन्छ । ‘अहिले प्रतिवेदनको ड्राफ्ट तयार भइरहेको छ,’ स्रोतले भन्यो, ‘प्रतिवेदन सार्वजनिक गर्न अझै केही दिन लाग्छ ।’
केही महिनाअघि मात्रै आन्तरिक लेखा परीक्षणको कार्यालयले सो रकम बढी गएको देखाएपछि उपमहानगरले थाहा पाएको थियो । सोहीअनुसार उपमहानगरले असार २७ गते विद्यालयलाई रकम फिर्ता गर्न पत्र काटेको थियो । विद्यालयलाई पत्र काटेपनि विद्यालयमा प्रअ तिम्सिना बाहेक व्यवस्थापन समिति र लेखामासमेत थाहा भएको थिएन ।
विद्यालय व्यवस्थापन समितिका अध्यक्ष रम्तुल मियाँका अनुसार विद्यालयका लेखापालले नै आफूलाई पैसा आएको र गएको केही पनि थाहा नभएको बताएपछि हस्ताक्षरकै दुरुपयोगसमेत भएको हुनसक्ने बताउँदै आएका छन् । उचित छानबिन गरी प्रअलाई कानुन बमोजिम कारबाहीको माग गरे ।
‘२२ महिनाअघि पैसा आएको रहेछ । विद्यालय व्यवस्थापन समितिको १६ महिनाअघि नयाँ कमिटि आयो । तर, हाम्रो कमिटि आइकन कुनै पनि जानकारी भएको छैन,’ उनले भने, ‘प्रअले सबै जिम्मेवारी म स्वयम् छु भनेपछि उहाँलाई कारबाही हुनुपर्छ ।’
आफूहरूले केही दिनअघि उपमहानगरका मेयर हेमकर्ण पौडेललाई भेटेर निलम्बन गर्न माग गरेको उनले बताए ।
‘हामीले मेयरसाबलाई भेटेर प्रअलाई निलम्बन गर्न माग गरेका थियौँ,’ मियाँले भने, ‘मेयरसाबले छानबिन गर्दैैछु, पैसा बुझाइसकेपछि कारबाही हुन्छ भन्नुभएको छ ।’
प्रअ तिम्सिनाले उपमहानगरमा रकम फिर्ता गरेको शुक्रबार बिहान जानकारी गराएको उनले बताए ।
‘अध्यक्ष ज्यू मैले ३० गते सबै पैसा फिर्ता गरेँ, उपमहानगरमा प्रमाणित गरेपछि मैले सम्बन्धित ठाउँमा बुझाएको छु भनेर फोन आएको थियो,’ उनले भने, ‘त्यत्रो ठूलो रकम घोटाला भएको छ । पैसा बुझाएपनि कारबाही हुनुपर्छ भन्ने हाम्रो माग हो ।’
अब छानबिन समितिले प्रतिवेदन के बुझाउँछ, सोहीअनुसार अगाडि बढ्ने उनले बताए । छानबिन समितिले भने सुझावसहित प्रतिवेदन तयार गरिरहेको बताइएको छ ।
अध्यक्ष मियाँले भने, ‘छानबिन समितिको प्रतिवेदन कस्तो आउँछ, त्यसपछि के गर्ने भन्नेबारे पुनः बैठक बस्छौँ ।’ प्रअ तिम्सिना अहिले भने विद्यालयमा हाजिर गर्न गएका छैनन् ।
यो पनि – इटहरीमा प्रअद्धारा ‘घोटाला’ प्रकरण : निलम्बनको मागसहित आज उपमहानगरमा पत्र बुझाइने
यो पनि – इटहरीमा प्रअद्धारा ८० लाख ‘घोटाला’ प्रकरण : विद्यालयबाट बिल, भौचर, चेक र माइन्युट ‘जफत’
यो पनि – सम्पादकीय : राज्यको पैसा ‘घोटाला’ गर्ने प्रधानाध्यापकमाथि निष्पक्ष छानबिन गर
Discussion about this post