वराहक्षेत्र : नेपाली कांग्रेस कोशी प्रदेश कार्यसमितिद्वारा सञ्चालित ‘कचनकवल – सगरमाथा जागरण अभियान’ अन्तर्गत सुनसरीको वराहक्षेत्र नगरपालिका वडा नं १, चतरामा धार्मिक पर्यटन सम्भावना तथा चुनौती विषयक अन्तरक्रिया कार्यक्रम सम्पन्न भएको छ।
कार्यक्रममा नेपाली कांग्रेस कोशी प्रदेश कार्यसमितिका कार्यालय सचिव तथा प्रदेश योजना आयोगका सदस्य नारायण कोईरलाले सुनसरीका धार्मिक पर्यटकीय क्षेत्रहरूको चर्चा गर्दै वराहक्षेत्र मन्दिर, चतराधाम, सूर्यकुण्ड, औलिया मठ, रामधुनी, बिजयपुर क्षेत्र जस्ता स्थानहरूको धार्मिक महत्त्वबारे प्रकाश पारे। पर्यटन व्यवसायी वासुदेव बरालले धार्मिक पर्यटनको सम्भावना र चुनौतीमाथि व्याख्या गर्दै कोशी प्रदेशमा आउने पर्यटक र पर्यटकीय क्षेत्रबारे कार्यपत्र प्रस्तुत गरे।
सोमबार ऐतिहासिक तथा पौराणिक महत्व बोकेको औलिया मठमा अभियानको दोस्रो जिल्ला स्तरीय कार्यक्रम सम्पन्न भएको थियो। कार्यक्रममा प्रमुख अतिथिको रूपमा नेपाली कांग्रेसका पूर्व उपसभापति तथा पूर्व उपप्रधान एवं गृहमन्त्री विजय कुमार गच्छदार उपस्थित थिए। साथै, नेपाली कांग्रेस केन्द्रीय सदस्य मीन कुमार विश्वकर्मा, राजीव कोईराला, नेपाली कांग्रेस सुनसरीका सभापति केदार भण्डारी, कोशी प्रदेश सरकारका भौतिक पूर्वाधार मन्त्री भूपेन्द्र राई, पर्यटन, वन तथा वातावरण मन्त्री सदानन्द मण्डल, प्रदेश सभा सदस्यहरू, प्रदेश समितिका पदाधिकारी, जिल्ला तथा क्षेत्रीय सभापतिहरू, महासमिति एवं महाधिवेशन प्रतिनिधिहरू सहित पार्टीका अन्य नेता तथा कार्यकर्ताहरूको उपस्थिति रहेको थियो।
कार्यक्रम नेपाली कांग्रेस कोशी प्रदेश कार्यसमितिका सभापति तथा प्रदेश सभा संसदीय दलका नेता एवं पूर्व मुख्यमन्त्री उद्धव थापाको सभाध्यक्षतामा सम्पन्न भएको थियो। कार्यक्रममा नेपाली कांग्रेस वराहक्षेत्रका कार्यवाहक सभापति युवराज श्रेष्ठले स्वागत मन्तव्य व्यक्त गरे।
नेपाली कांग्रेस कोशी प्रदेश कार्यसमितिका महामन्त्री उमेश थापाका अनुसार नेपालकै होचो भूभाग झापा, कचनकवलबाट सुरु भएको अभियान विश्वकै अग्लो भूभाग सोलुखुम्बुस्थित सगरमाथाको आधार शिविरमा पुगेर सम्पन्न हुनेछ। यस अभियानले संगठन सुदृढीकरण, ऐतिहासिक अनुसन्धान, समृद्धिका आधार खोज तथा जलवायु परिवर्तनका विषयलाई प्राथमिकतामा राखेको नेपाली कांग्रेस कोशी प्रदेश कार्यसमितिका सभापति उद्धव थापाले बताए।
Discussion about this post